Toni Râlte



(Ka groupah chuan ka post tawh a. Request a awm a vangin ka rawn post leh a ni e.)
.

Writer
A sex video ka hmuh hmasak ber zan chuan, a chhip samah kekin chhuatah ka theh phar dawr dawr a. Ka pasal tiang ken lai chu chuhin a hnungzâng vual tut khawpin ka hlap hrep a! Chu chu ka la duhtawk lo, rei tak chhung pawn chhuak thei lo turin a ngal chu ka vaw duk vek a. A naute chuan min thlir țhap a. Ka pasal pawh ngawi rengin a ding a. Ka zahna leh thinrimna chuan pawisak min neih tir thei tawh lo. 
.

"Tenawmnu, kum 18 i tling chauh a, sex video ka siam e i ti amaw? Min tihzah zia leh tihmualpho zia hi i hria em? Ka fanu ni tlak pawh i ni tawh lo" ka ti hlawih hlawih a. Ani erawh a ngawi ngal a. A tet lai atanga luhlul leh ngeng ngalh ani tih ka hriat avangin mak ka ti lo. A mittui far fap fap chu a kut dinglam in a hru a. A kut veilamin a ngal chu a dawm bawk a. 
.
"Nu, reilote a falin ka kawm thei che angem?" A ti tham țiak a. 
.
"Sawi dun tur kan nei lo e. I thiamthu sawi ka ngaithla peih lo. I pa mitmei ven pawh a na zozai ta e"
.

Ni 2 hnuah Police hmel kan hmu a. Hlauthawng takin kan hawihai a. 
.
"Muansangzuali nu i ni em?" A tih chuan ka lo bu nghat a. 
.
"Kar kalta nilaini khan i fanu hian Pu Nunpuia te tlereuh dawr ami cheng 10000 man hú awm vel a ru nia hriat a ni a. Kan lo hruai dawn a ni"
.
Ka thaw huai a. Ni e, min tizak ngun tawh a. Tunah chuan rei tak chhung a hmel hmu loin kan awm thei tawh dawn anih hmel. Pawi a khawih tawh lo deuh anga, rilru pawh a thlamuang zawk ang chu.. ka fanu chu ngawi rengin an hruai ta a. Kan gate pelh dawnah chuan, " Nu, ruk ka ru lo" a rawn ti a. Ngawi rengin kawngkhar chu ka khar ta a. 
.

Theihtawp chhuaha mi țha tak ni tura enkawl ka tumna te hi a hrethiam thei ngai lo. Ka fanu anih vangin ka thlauhthla thiang lo a. Ka kalsan ngawt thei hek lo. Țhatna hmanga hneh theih mihring a lo ni lo pawh aniang e. Jail-ah tang se, nun tuihalna te pawh a rawn chhar chhuak maithei asin.
.

Central Jail-a an dah thlak hmain ka zuk kan a. A cherin a dawldang hle a. Kut ka thlakna hmuamhma leh hliam te kha a la dam fel chiah lo nen..a ruk tak chuan ka khawngaih hle. Mahse, nem taka biak chu tlawm thlak ka tih vangin ka be ram hmak a. A mamawh tur te chu ka leisak a. Engmah a sawi lo. A tleirawl chhuah tirha ka chhuan thin vei nen..a hmelțhat avanga a lerh mai ang tih hlaua ka zilhna zozai te kha vawiina a nungchang siam nan hian a lo tawk zo lo tihna em ni ang?
.
Ka haw dawn chuan," Nu, ka pa ka ngai hle mai" a ti sap a. Ka va melh hrâwk a. A mita mittui tling piau chung chuan tilui tih hriat zet hian min lo nuih a. Ka kalsan ta a.
.

Chumizan, zanlai Dar 12:45 velah chuan phone call ka dawng a. "MUANSANGZUALI A INAWKHLUM" tiin. 
.

Ka shawl kensak hmang khan Lock-up chhungah a lo inawkhlum a nih chu!! A tum hle tih a lang, Duty te inthlahdah hun lai a chang ran anih a rinawm. Ka vei ka vei a. Ngaihtuah tur ka hre lo a. Ka rilru erawh a buai hle si. A ruang chu an rawn zawn lut a. Ani(aunt) leh a nuteii te ho chuan țah hla nen an lo kuah a. Kei erawh ka hul si! Ka fanu hmel chu ka zuk en a. A hmai dang lep chu powderin an chulh var phuak a. A hmui duk cher tawh chu an hnawihsen hlar bawk a. Ruang cheimawi chawp nimahse, ka mitah chuan ka fanu aia hmelțha an awm ngai lo anih kha mawle..
.
Mi â ang maiin ka hawi ka hawi a. Ka zahna thlen fô tu leh ka fanu ni tlak lo a ka ngaih thin khan tunah chuan khawvel a chhuahsan ta a. Thawveng hawk awm tak ka nih laiin ka ippik lutuk chu puahkeh chakin ka rûm ka rûm a. Na hi ka va ti êm!! Ti nge ama nunna chu a lak kher le? Jail-a luh chu thih ai pawn a lo hreh zawk ani maw? Engvangin nge ka bail chhuah mai loh ? Kiltin atang chuan keimah ka inhuat theihna tur thil chuan min rawn deng tluk tluk a.
.

Constable pakhatin min pek, A lehkha hnutchhiah chu nitin ka chhiar a. Nitin ka țap thin a ni.
.
"Nu, Âpa kha vanram a kai i ring em? Zu ngawlvei ani sia, a kai tho angem le..ka ngai thin lutuk. Chuan maw, Nu, Pu Nunpuia te dawr thil kha ka ru miah lo asin. Khamizan khan ka thianten an rawk a. Kei chu vengtu atan min dah a. Rawk lo tur pawn ka ti nasa lutuk, ruihna tur an nei tawh si lo a. An thil ruksa pawh chu min pek ve an tum a. Mahse, ka la duh lo. Engangpawhin sual mahila ruk ruk kher chu ka duh lo hrim hrim. Police ho bulah khan ka țhiante hming kha ka sawi țêp a. Mahse, Nu, Jail ka tan kha i duh zawk tih ka hriat vangin keimahin ka tuar ta mai anih kha..
.

Nu, Thu pawimawh deuh sawi tur ka nei a. Vawi tam tak hrilh che ka duh thin, mahse, hun i nei thei si lo a. Sawi loh tluan mai ka duh laiin thudik hi hria la, min huatna pawh a ziaawm ka ring deuh a. Nu, kum 13 ka nih khan ka pahrawn khan min hrairui a. I hna vanga Saihaa i zin hlan khan zantin min pawngsual thin. I lo haw har ka ti lutuk asin. "I nu bulah i sawi chuan i nu nen ka that ang che u" a tih avangin reitak chhung ka zep a. Kha kha ka piansualna bul chu a lo ni ta ani. Insum chu ka tum ve thin lutuk, mahse, mipa ka mamawh thin a, zah pawh ka sawi thei thin lo. Nang chuan ka pahrawn fel zia leh zah a țul zia hlir min chham khum thin a. Nu, i beisei ang fanu ka nih theih loh avang khan min ngaidam rawh aw. A harsa ve êm a ni. Sex video kha ka duhthlanna ani miah lo asin. Khapa khan a rukin Camera a lo fit a. Khapa kha ka bialpa neih ve chhun, min hmangaihtu emaw ka tih vangin ka taksa ka hlan a. Mahse, min timualphotu a lo ni ta zawk si.
.

Nu, kei chuan demna che ka nei lo a. Ka hmangaih che tih min lo hriatsak dawn nia. I sawi dik chiah..i fanu ni tlak ka ni lo. Țhat leh fel ve ka tum apiangin ka naute ho ngei pawn min nuihzat a. Inkhawm te hi ka chak ve thei lutuk asin. Mahse, ka ngam lo ani. Kei chu ka bawlhhlawh a. Tenawm mai ka ni. Hremhmun ka kal dawn tih hrereng chungin dam hi ka thlang chuang lo. Ka tun dinhmun leh hremhmun chu danglamna a awm vakin ka ring lo. Min ngaidam ang che"
.

Apa nen hian kum 9 lek anih laiin kan ințhen a. Zu ngawlvei anih vangin. Kum hnih hnuah pasal ka nei leh a. Mahse,ka pasal chu kei leh ka fanu nun tichhe tu a lo ni ta zawk si! Ka fanu ka lainatna chuan nitin min hliam a. Tawrhna thuk tak min siamsak a. A nunhman dan hrehawm tur zia leh inthlahrung reng renga kan inchhunga a chetla lai te kha ka mitthla a. Engang nu chiah nge maw ka lo nih le? Ani chuan ka rilru tihnat hlauin leh min venhim a duh vangin anuna thil thleng pawh min hrilh ngam lo a. A lo puitlin deuh hnua inkawmna hun min dil lahin hun tlem te pawh ka pe thei ngai lo anih kha..engdang ani lo kei anu ngei hian ka fanu kha dam reng chungin a thlan ka lo laihtir thin a ni zawk e. Ka va tlaktlai lo tak êm! 
.
"BAWIHTE,MIN NGAIDAM THEI LO ANIH PAWHIN..KA FANU I NIHNA AVANG TAL PAWHIN PHUBA CHU LA LUL SUH AW"

Post a Comment

  1. The variable you do not need to use any kind of sort of particular currently is that there are history check web websites that can be used to disclose info on anybody. These online info sources permit you to locate an individual's marital relationship link background, criminal orange county mugshots background, and particular information, in addition to bargains included just by running a search. It's phenomenal to find the quantity of information that you can find someone.

    ReplyDelete

Powered by Blogger.