Zotrex Adventure Club hruaitute chuan vawiin chawhnu dar 2:30 khan Aizawl Press Club-ah thuthar thehdarhtute kawmin Mizoram tuikhawhthla sang ber Vantawng khawhthla san zawng, feet 750 (Wikipediaah feet 751) nia officiala kan lo hriat thin kha a dik lo tih an sawi.
 |
| VANTAWNGKHAWHTHLA |
Thuthar thehdarhtute an kawmnaah ZOTREX Adviser Pu David Zohmangaiha chuan "tunhnaiah Khawiva Khâm (Tuikhawhthla), Kau Tlabung (Khawhthla Sang), Vantawng Khawhthla te chu a san zawng nia kan hriat leh kan pawm zirlai buah te hial kan zir chu a dik famkim lo niin kan hria a, mithahnem ngaite sum thawhkhawm hmangin a hmunah uluk takin kan teh tha leh hlawm a, tunhmaa kan lo hriat thin dan nen a in ang lo hle a ni" a ti.
Zotrek Adventure Club Secretary Tv. Malsawmdawngzela chuan Mizoram Tuikhawhthla sang bera sawi thin Vantawng khawthla chu Mission Veng Youth Adventure Club te nen tangdunin Jan 6-7 khan an teh thu sawiin, hei tum hian mi 37 an thawk chhuak a, Mi 29 uai thlain Vantawng khawhthla a tumkhata uai thla tamber Record an siam tih a sawi. Hemi tuma an hrui hman 600 ft vel atanga an chhut dan chuan Vantawng khawhthla san zawng 229 m (750/751 ft ) tih hi dik theiin an hre ta lo va. Uluk zawk leh chiang zawka teh tul an tih avangin an teh tha leh ta niin a sawi bawk. Zotrek Adventure Club Secretary chuan "Kan teh nawn leh naah a hrui leh Altimetre hmanga kan tehna atangin Vantawng Khawhthla san zawng nia hun rei tak atanga kan lo pawm thin kha a lo dik lo tawp mai tih kan va hmuchhuak ta a. He khawhthla san zawng hi 99 m (324.8 ft) a sang a lo ni" a ti.
ZOTREX Secretary chuan "Vantawng khawthla san zawng kan teh atanga kan data neih hi kan History ti danglam dawrh thei a lo ni tlat mai a. Tunah hian 750 ft tih a nih avangin India rama Tuikhawhthla Sang 10 na luah mek tu a nih laiin a san zawng hi a lo dik si lo. Feet 750-a sang nia sawi hi khawi atanga lo chhuak nge tih hriat tumin Zotrek leh Mission Veng Youth Adventure Club te chuan kan zawh kual pawhin tuman an hre lo a ni" a ti bawk.
Zotrek Club hruaitute chuan kum 2015 March ni 4 khan Kau Tlabung (Khawhthla Sang) kan lo teh tawh tih an sawi a. He Khawhthla Sang hi Hydel Project Tuikhuah a nih tak hnu hian kumtluana tui khawhthla a ni ta lo va. Fur tui tam lai chauhin tui khawhthla hi hmuh tur a awm tawh avangin Tuikhawhthla tia han chhal hleih theih a ni tawh lo va. A khawh thla hi chhawrdawh awm lo a ni a, metre 120.1 feet 394.7 a sâng a ni. A san zawng hrim hrimah chuan Kau Tlabung (Khawhthla Sang) hi Vantawng khawthla Mizorama tuikhawthla sangber nia kan hriat aiin feet 69.9 in a sang zawk a ni an ti.
Zotrek Adventure Club chuan Mizorama Pûk te, Khâm te, Tlâng te leh Kan Historical Place te dinhmun diktak hi zirchian a, Document fel tak nena chhinchhiah vek tumin hma an la mek thu an sawi.
Post a Comment