Mizote hian CBI hming kan hriat lar em em lain kan sorkar nena an indawr dan te hi kan hre thuk lo hle a. Mi tam zawk phei chuan Aizawla Office an neih pawh kan hre lo hial awm e.
CBI kan tih thin, Central Bureau of Investigation hi Delhi Special Police Establishment Act, 1946 hmanga din, mipui sum (sorkar sum) chhehrelh leh tihchingpen lam chhui chhuak thin tura din an ni a. Central Vigillance Commission hnuaia awm niin sorkar laipui leh Delhi sorkar hnathawhnaa sum tihchingpen te chhui thin tura din an ni a. State sorkarin an state chhunga hnathawh an phalsak chuan state sorkar hmalakna pawh chhui thei an ni.India rama state tam zawkin an state-a hnathawh an phalsak tawh a ni. Mizoram sorkar nena CBI indawr tawh dan te hi mipuiin kan hriat ngei a tul a. Kan state-a hnathawh phalsak an nih zet hnua khuahkhirh an nih dan te hriat hian rilru hi a na vawng vawng mai a nih hi!
Kum 1990 June 27 khan Mizoram sorkar hian CBI te hi Mizoram pumpuia hnathawh phalna a pe a. He hnathawh phalnaah hian IPC Section chumi khami tiin phek khat dulin hnathawh an phalsakna chin Dan bung leh changte pawh tarlan a ni (vide. No. 31016/1/85-VIG dated 27.6.90) He lehkha hi Central sorkar pawhin lo hmuin Mizoram sorkarin CBI hnathawh a phalsak tak thu hi November 15, 1990 khan chhuahin CBI te pawh hma la nghal turin a hriattir a. (vide No. 228/8/89-AVD dt. 15.11.90)
Tichuan CBI chuan hma la chhoin Aizawl, Govt Complex-ah Office an rawn hawng a, hnathawk turin an inbuatsaih chho ta mup mup a. Mahse kum 1995 December 8 a lo herchhuah a, CBI ten hna an thawh tak tak tan dawn meuh chuan Mizoram sorkar chuan central sorkar hnenah ‘Mizorama CBI te an duh ang anga hna an thawh an phalsak loh thu leh sorkar nena inrawntlang chauha hmalak an phalsak zawk thu’ an thawn leh ta mauh a. (vide No. C.31016/1/85-VIG/Pt dated 8.12.95)
Chumai ni loin kum 2002 July 15 a lo herchuah phei chuan Mizoram sorkar chuan CBI in Mizoram chhunga hna an thawk dawn anih chuan ‘eng chungchangah pawh Mizoram sorkar phalna an la hmasa ngei ngei tur a ni’ tih thu Gazette-ah a chhuah ta hial a. (vide No. C.31016/1/85-VIG dated 15.7.02)
Chu Gazette-ah chuan heti hian an ziak:
NOTIFICATION
No. C. 31016/1/85-VIG, the 15th July, 2002. In supercession of this Department’s vide letter No. C. 31016/1/85-VIG/Pt dt. 8.12.95 and all earlier Notifications in this regard, and in pursuance of the provisions of Section 6 of the Delhi Special Police Establishment Act, 1946 (No. 25 of 1946) the Governor of Mizoram is pleased to accord consent to the extension of powers and jurisdiction of the Delhi Special Force Establishment ie. CBI to the whole of the State of Mizoram for investigation of offences subject to the following condition.
1. That in every case prior approval of the Government of Mizoram should be taken.
BY ORDER AND IN THE NAME OF THE GOVERNOR
Heta tang hian Mizoram pumah CBI te hna thawhtir theih an ni a. Mahse Mizoram sorkarin phalna a pek hmasak zel a ngai tihna a ni a. CBI in hna an thawh theihnan Chief Minister a pawimawh ta ber tihna a ni. Hetianga hnathawh hi CBI pawhin an duh lo a. Chuvang chuan Chief Minister chu hnathawh phalsak turin an ngen chamchi a. A office-ah te hial an lenchilh hnu leh, CBI Director meuhin phalna pe tura a ngen hnu pawhin awmzia a awm thei ta lo a. Kum 2005 October ni 7 a lo herchhuah meuh chuan kan Chief Minister chuan CBI te chu a pet chhuak ta a ni. CBI in Mizoram puma state sorkar phalna la hmasa lova hnathawh phalsak leh tura an ngenna chu kan Chief Minister chuan a phalsak ta lo a.
Hemi chungchang hi lehkha No. CMS 16/2005/4 dated 9.8.2005 hmangin Vigillance Department-ah hriattir an ni a. Chief Minister hnen atanga an thudawn bawhzuiin Vigillance Department chuan lehkha NO. C.13016/1/05-VIG/Pt hmangin kum 2005 October ni 7 khan Silchar-a CBI SP hnenah hetiang hian an hriattir ta a ni:- “…. Mizoram pumpuia CBI mi leh sa ten thilsual an chhui theih nana Mizoram sorkar hnena phalna pe leh tura i dilna kha tihhlawhtlin theih a ni lo tih pawiti tak chungin ka han hriattir a che.” tiin.
Hetiang dinhmun anih avang hian corruption chhuichhuah kawnga India rama a ber kai CBI te chuan Mizoramah hna an thawk thei lo a. Kan thatpui nge kan chhiatpui le?
People's Right to Information and Development Society of Mizoram (PRISM)
Post a Comment