India zalenna ni vawi 71-na chu tukin zing dar 10-ah khan Tumpui Field, Kolasib-ah ropui taka lawm a ni a, Pu Lal Thanzara, Minister Health Department, I&PR etc. chu khuallian niin hnam puanzar a pawtpharh a ni.
Pu Lal Thanzara chuan Independence Day hmang tura kalkhawm zawng zawng te zalenna ni chibai bukin, ram tana inpekna thuk zawk nei tura min fuih thartu atana hmang turin a sawm a. Sorkarin mipui tan, a hna thawh te langtlang leh rintlak a nih theih nan kawng hrang hrangin hma a la a ni tiin, Minister chuan kum kalta chhunga Mizoram puma sorkar hmalakna langsar zual te a tarlang a: New Land Use Policy (NLUP) hmalakna te a tlangpuia thlirin a hlawhtling thawkhat hle a tih theih a ni tiin, Serthlum, Kuhva, Rubber etc, chingtute pawn kum reiloteah hlawhtlinna rah an la seng thuai dawn a ni a ti a. Mizoram GDP pawh za zela 7.6% a thangin, per capita income pawh 11.27% in a thang a ni a ti. New Economic Development Policy (NEDP) Comprehensive Growth strategy for Mizoram chu ngawrh taka kalpui a ni tiin, NEDP atan hian kum 2017-18 ah Rs.750vbc dah a ni a ti a. Agriculture tih hmasawn nan link road te laiin, thiamna changkang zawk nena lo neih dan te pawh zirtirna kalpui zel a ni a ti a. Inkalpawhna tihhmasawn nan Lei pathum; Chhimtuipui Darzokai, Tlawng lui Bairabi-Zamuang road ah leh Tut-ah te siam zawh a ni tiin, Kawlphetha lama intodelh nan pawh hmalak zel a ni a ti a. Hriselna lamah pawh hma kan sawn nan hmalak zel niin, Mizoramin Medical College puitling Mizoram Institute of Medical Education & Research(MIMR) kan neih theihna turin tuna State Referal Hospital, Falkawn chu tihchangtlung mek zel a ni a, State Cancer Institute, Zemabawk a mi pawh tihchangtlun tuma hmalak mek a ni a ti bawk a. Sorkar chuan infiamna a thalai ten hma an sawn zel theih nan hma ala chhunzawm zel a ni a ti bawk.Minister chuan Kolasib district a sorkar hmalakna leh hmachhawp thenkhatte a tarlang a:
District-ah dan leh thupek kenkawh kawngah thahnemngai taka hmalak zel a ni a, Police Office leh Police Station-te Crime and Criminal Tracking Network System hmangin thlunzawm mek a ni a, Subsidiary Multi Agency Centre pawh SP Office-ah dinfel a ni tawh a. Mipuiten sorkar hmalakna an ngaihdan leh lungawilohna an thlen theihna tur “Kolasib Mipui Aw” din a ni a, Minister chuan mipuite leh sorkar inpawhna tha tak tur anih angin mipuite tangkai taka hmang turin a sawm a. Damloh nikhuaa inenkawlna senso hmuhletna scheme- RSBY ah damlo 1,307 ten an inenkawlna senso Rs.64,19,654/- hmu letin, MSHCS kaltlangin damlo 107 ten an inenkawlna senso Rs.12,59,832/- an hmu let tawh bawk a ni.
NEDP hnuaiah District Hospital tihchangtlun nan khawl leh hmanraw thar engemaw zat hmuh a ni a, Diakkawn Sub-centre building cheithat chu zawhfel tawh niin, Lungdai PHC building sak pawh kumin chhunga zawhfel beisei a ni. Kolasib District chhunga buh thar te rampawna thawn liam mai a nih loh nan leh man man zawka hralh a nih theih nan kolasib district-ah NEDP hnuaiah Rice Processing Mill Rs.85lacs senga din tura hmalak mek a ni a. NEDP sum Rs. 280lacs hmangin district chhunga khaw tinah mipui mamawh hrang hrang siam a ni a, Kolasib Constituency-ah Rs.95lacs hu hna 222, Tuirial Constituency ah Rs.75lacs hu hna 52 leh Serlui Constituency-ah hna 52 Rs.110lacs hu thawh a ni. NLUP hnuaia trade hrang hrang thlangtu te hnenah tanpuina pek chhunzawm zel a ni bawk.
Kolasib District-in kum 2012-2017 June thlengin Oil Palm Metric Tonne 6747.50 Rs.3.6vbc man hralh tawh a ni a. Vawk puitling 30 chuang kartin district pawnah hralhchhuah thin a ni bawk a. Serlui B Hydel Project a Cage Culture hnuaia New Builum, N.Chawnpui leh Bilkhawthlir ten sangha chi khat ‘Pangsius sutchi’ khawiin, quintal 505 an tharchhuak tawh a, tunah hian sangha 90,000 an khawi mek a ni. Kum 2016-2017 chhung khan Land Revenue & Settlement Office chuan sorkar sumbawmah Rs.83.102lacs an chhunglut a, District Transport Office in Rs.3.377vbc chhunglutin, Assistant Commissioner of Taxes in Rs.15.906vbc an chhungluh bakah Kolasib Forest Division chuan Rs.72.413lacs an chhunglut a ni.
Hei bakah hian sorkar laipui scheme hrang hrang pawh thahnemngai taka kalpui zel a ni a. Swachh Bharat Mission hnuaiah Open Defecation Free atan hmalak zel a ni a, inthiarna 641 sak bakah inthiarna thianghlim neilo 1225 thawmthat nan hmalak mek a ni bawk a. Solid & Liquid Waste Management Plan 2017 pawh bawhzui zel a ni a, 1st phase atan Meidum, Thingdawl, Bilkhawthlir, Hortoki leh Lungdai ah te hmalak mek a ni. Kolasib khawpuia cheng mirethei te tan PMAY-HFA(Urban) hnuaiah kum 2022 thleng atan In 890 sak tum a ni a, a thawh khatna atan 2017-2018 chhung hian chhungkaw 260 te hnenah insak tanpuina hi pek tum a ni. Online Booking of LPG chu tih tan niin, mahni kawtkaia gas lak theihna ‘Doorstep Delivery’ pawh enchhin nan Kolasib veng chhung hmun hrang hrangah tih mek a ni. Online a tui bill pekna pawh hman theih tura tlangzarh a ni tawh bawk.
Minister chuan sawrkar hmalakna hrang hrangte a hlawhtlin theih nana tlawmngai pawl te, kohhran te, mipui te leh media ten sawrkar an thlawpna chu lawmawm a tih thu sawiin tawiawm zel turin a sawm a ni. Mizorama hnam hrang hrang chengte inkarah inremna boruak vawnghim turin mimal leh politics a mahni hmasialna dahtha a ram tana pawimawh ah chuan rilru hmunkhat kan put zel a pawimawh takzet a ni a ti. Zalenna sualtuten kan ram tan an nunna hlan a hma an lakna te ngaihlu zel a chawinung zel turin kalkhawmte a chah a ni.
Vawiin Independence Day lawmna-ah hian parade contingent 18 awmin, armed contingent 1 (1st IR Battallion) leh unarmed contingent 6 (panga), school contingent 10 (sawmpakhat) leh Band Party 1 an awm a, Parade Commander hi Inspector Eldy, 1st IR Battallion, Mualvum a ni. Parade contingent titha te :-
I. Unarmed Contingent :
1. Scouts & Guides Govt. Diakkawn High School
2.Scout & Guides, St.John’s HSS
3. NCC Boys, St.John's HSS
II. School Contingent :
1. DIET, Kolasib
2. JNV School, Thingdawl
3. CZ Higher Secondary School, Kolasib
Tumpui Field a Independence Day lawmna hman zawh hnu hian 'VIP at home' mi sawm bik te tan Deputy Commissioner Bungalow ah chhun dar 12 ah neih niin, thingpui in ho a ni. Independence Day pual hian Football Tournament siam a ni a, Minister hian Final match khelh hmanpui nghalin, lawmman a sem a ni. Hei bakah hian Independence Day pual Badminton Tournament buatsaih lawmman a sem bawk. Minister hian District Hospital a Casualty siamrem thar leh pianphunga rualbanlo leh kum upa te tana hman tur bik inthiarna in a hawng nghal a ni.
India Independence Day vawi 71 na hi Kolasib District chhunga Sub-Division leh Block-ah te hman a ni a. Kawnpui Sub-Division-ah Pu K.S. Thanga, Parliamentary Secretary in hmanpuiin, Pu PC Zoram Sangliana, MLA leh MIFCO Chairman nibawk chuan Bairabi-ah a hmanpui a, Pu Lalrinliana Sailo, MLA in Vairengteah a hmanpui a ni.
WRITTEN BY JH LALPARMAWII MIS, DIPRO KOLASIB
Post a Comment