India ramin zalenna a hmuh champhaphak vawi 71-na chu ram chhung hmun dangte rualin vawiin khan Lawngtlaiah ropui takin hman a ni a. A lawmna pui ber CYLA Playground-ah chuan Food, Civil Supplies & Consumer Affairs, etc. changtu Parliamentary Secretary Pu TT Zothansanga chu Khuallian a ni.
Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Chawhma dar 10:30-ah CYLA Playground-ah Khuallianin hnam puanzar pawt pharhin, hnam puanzar chibai buktu parade contingent 27 te chibai buk a chhang let nghal bawk.
Khuallian chuan India ramin zalenna a hmuh theih nana an theihna, thiamna leh an nunna hial hlantu hnam pasalthate zahna chibai bukin, mipui pung khawmte chu zalenna chibai a buk bawk a. Ram zalenna ni chu mi tin kara inremna din tharna nia hmang tur leh zalenna sualtute hmathlir tihlawhtling tura lung rual taka thawk ho turin kal khawmte chu a chah a ni.
Khuallian Pu TT Zothansanga chuan Mizoram leh Lawngtlai District hma sawnna hrang hrang a tar lang a. Mizoram sawrkarin mi retheite'n lei rem an rah theih nan NLUP a kalpui reng a. NLUP vang hian thingtlang lo neih 40%-a tla hniamin, thar chhuah chu 53%-in a pung thung tih a sawi a. New Economic Development Policy hnuaiah kum 2017-18 atan 'tang puihna' tur sum Rs nuai 75,000 ruahman niin, hemi hnuaiah hian hmasawnna hna hrang hrang thawh mek a ni, a ti.
Lawngtlai District-in hriselna lama hma a sawn theih nan Health Department kal tlangin hma lak chhoh zel a ni a. Tun hnaiah Lawngtlai District Hospital-ah sawrkarin doctor pathum a dah belh a, NEDP atangin endoscope leh ultrasound khawl thar lei a ni a, Kayakalp Award dawng turin hma lak mek a ni bawk tiin, hriselna kawng leh hri danna pek chungchangah National Health Mission hnuaia programme hrang hrang hlawhtling taka kalpui chhoh mek a nih thu a sawi.
Khuallian chuan Myanmar nena insumdawn tawnna kawngpui tur KMMTTP kawng laih mek chu 68% zawh a ni tawh tih sawiin, kum 2018 December thlaah zawh fel hman beisei a ni, a ti a. Hei hian Lawngtlai District chu sumdawnna chhuahkaah a siam dawn a ni, a ti. Sawrkarin inkal pawhna kawngpui a ngaih pawihmawh thu sawiin, tunlaia kawng chhia sawi awm thin pawh hi kawng tha kan neih dawn avanga inbuatsaihna a ni, a ti a. Agriculture lama thar chhuahte phurh chhuah zung zung a nih theih nan, kawng km 416-a thui laih a ni a, kawng 95 thawm that niin, NEDP hnuaiah km 773-a thui leh RKVY hnuaiah km 86-a thui kawng laih mek a ni, a ti.
Sawrkarin zirna a ngai pawimawh hle tih sawiin, Khuallian chuan Chhingchhip-a Sainik School chu kumin atanga hawn tan a ni a, hei hian zirlai thiam zawk leh chhawr tlak zawk tam tak a chher chhuah belh dawn a ni, a ti a. Mizoram district hrang hrangah Polytechnic building sak a nih thu leh Lawngtlaiah pawh sak mek a nih thu a sawi. Zirlaite chu chhawr tlak thiamna nei turin tunlai changkannain a ken tel social media hrang hrangte khawih lo ngam turin a chah bawk.
Khuallian chuan Mizoram hmun hrang hrangah buhfaia harsatna a awm loh thu sawiin, kawng chhia vanga duh anga phurh thlen lawk theih loh chu awm bawk mah se, buaina tham a nih loh thu a sawi a. Sawrkar laipuiin a beisei leh phut aia thain buhfai sem theih zel a nih thu a sawi.
Khuallianin thu a sawi zawh hian, Lawngtlai Bawrhsap Dr A. Muthamma IAS chuan pung khawmte chu India ram thar din tura intiamna (New India Pledge) a sawi rualtir a. Hemi hnu hian parade contingent ti thate hnenah lawmman sem nghal a ni. Unarmed Contingent-ah Don Bosco School NCC chu pakhatna niin, pahnihna Don Bosca Scouts & Guides leh pathumna Govt Model English School Guides te an ni a. School contingent-ah Downtown English School Girls chu pakhatna niin, pahnihna Jehova Jire English School Boys leh pathumna Ngurnunsangi English School Boys te an ni. Mizoram Police Armed Contingent leh Govt Model English School Pipe Band te chu special participation prize hlan niin, parade contingent dang zawng chu participation prize hlan an ni bawk.
He'ng bakah hian Independence Day Football leh Badminton Tournament lawmman sem nghal a ni a. Football-ah hian Lawngtlai Vengpui-II Football Club chu champion niin, Lawngtlai Chandmary Football Club chu pahnihna an ni. Badminton category hrang hrang zingah men's singles-ah Lalromawia a champion a. Lawngtlai District-a mimala thisen pe hnem ber Pu Elvis Lalthangzuala (unit 28) leh nikum chhunga a thlawna pawl hminga thisen pe tam ber College Veng Pastor Bial LIKBK Thalai Pawl (unit 98) te hnenah chawimawina hlan a ni bawk.
Vawiin Lawngtlaia Independence Day lawmnaah hian Lawngtlai DC Dr A. Muthamma IAS, LADC CEM Pu T.Zakunga, LADC Chairman Pu V.Zirsanga leh Lawngtlai SP Pu Lalsanglura MPS te bakah, LADC-a member te, state leh district council-a officer leh staff te, political party leh tlawmngai pawl ai awh te, khawtlanga mi challang tak tak leh thu thar theh darhtu te, sikul naupang leh mipui thahnem tak an tel a. Muala hun hman zawh hian Circuit House-ah VIP At Home Tea Party hlimawm tak hman chhunzawm a ni.
Kumin Independence Day pual hian Lawngtlai District Independence Day Celebration Committee chuan Lawngtlaia damdawi in pathum - District Hospital, Lairam Christian Medical Centre leh Christian Hospital Lawngtlai bakah, Lairam Motherless Home leh District Jail-ah te tanpui Rs 2,000/- theuh an hlan a ni.
Post a Comment