MIZO NATIONAL YOUTH FRONT (MNYF) HEADQUARTERS, AIZAWL PRESS RELEASE

MIZO NATIONAL YOUTH FRONT (MNYF)

HEADQUARTERS, AIZAWL

PRESS RELEASE

“Ram hi unau inpeizawna kaihhruai mai mai chi a ni lo”

MNF Țhalai chuan, Health Minister Pu Lal Thanzara’n, a department chan a ni lo chung leh Cabinet Minister-in Cabinet Minister dang a pui thei lo chunga a u Chief Minister Pu Lal Thanhawla department chan Public Works Department leh Power & Electricity Department pui ni âwm taka department hotute a ko khawm fo mai leh, thu a sawi fo mai hi țha kan ti lo va, Mizoram kaihruaitu lute an nihna angin dân phal bâka che lova an department chan hneh taka enkawl mai turin kan duh hle a ni.

Kum 2013-a Congress an sawrkar rual khan Pu Lal Thanzara hi Minister of State niin department eng emaw zat a chan bakah a u Pu Lal Thanhawla department enkawl eng emaw zat a pui bawk a, chung zingah chuan Public Works Department leh Power & Electricity Department pawh a tel. Kum 2014 January ni 7-a sawrkarin thu a chhuah leh khan Pu Lal Thanhawla department chan zawng zawngah a pui zui ta bawk.

Nimahsela, Pu Lal Thanzara hian HP Food Products chungchangah leh Sunshine Overseas Company chungchangah dân phal lohva thil a lo tih avangin kum 2015 khan MLA leh Minister a nihna ațangin a bang a. By-Election-a thlan tlin leh a nih khan Minister niin Health & Family Welfare, Information & Public Relation leh Information & Communication Technology department te a chang leh a; Chief Minister pui tura sawrkar thuchhuah a awm hriat zui a ni lo. Chuti chung chuan PWD leh P&E Department-ah Chief Minister pui ni âwm takin, he department pahnih hotute (official)-te vawi eng emaw zat țhutkhawmpuiin an hna a enpui a, January ni 6, 2017-ah phei chuan Vanglaini-in, “PWD enkawlnaa Chief Minister puitu…” ti hialin a hun hman dan an tarlang a ni.

Hetih lai hian The Frontier Despatch chanchinbuin Chief Secretary an zawhnaah Cabinet Minister-in Cabinet Minister (Chief Minister) a puih theih loh thu chiang takin a lang a. Hei hian kan ram hruaitu lu berte’n dân an pawisak lohzia a tilang a; Cabinet Minister Pu Lal Thanzara’n a u Chief Minister Pu Lal Thanhawla a pui nia ngaih theiha thil a awm hi MNF Țhalaite kan ram leh hnam tan a him lo niin kan hria a, tun hnuah ram inrelbawlna țha zawk leh felfai zawk a awm theihna turin dân phal baka anmahni department chan lohva inrawlh tawh lo turin Cabinet Minister pahnihte hi kan phût a; tun achinah ram hi unau inpeizawna kaihhruai mai mai chi a ni lo tih lo hre tawh turin kan duh bawk a ni.

Sd/-

(LALNUNSANGPUII)

Joint Secretary

Information & Publicity Department

Memo No. 014/MNYF/PR/2017-18

Dated Aizawl 23rd August, 2017