Related imagePumna damdawi atana hman lar em em; Doctor-te chawh vang pawh ni lova miin a tha an tih vang leh sumdawngte'n an zawrh tlawm vang ringawta a hlawma leia chhungkua kua ei mekte an awm mek nia sawi thinte a awm avangin kan fimkhur tlan theih zawk nan 'OMEPRAZOLE' hi bihchiang lawk teh abg.


ENGE A NIH?
Omeprazole ( Prilosec) hi Pumna (ulcer)/pumpui hnun lawng/thin thip/irh thur /raso leh chawpai tawih tha lo damdawi atan hman a ni a, a nihna takah chuan pumpuia thur tam lutuk lo dolettu leh vengtu damdawi tha ber pawl a ni. Mahse, he damdawi hi antibiotic damdawi heng amoxicillin, clarithromycin -te nena tangkawpin Ulcer damdawi atana hman leh eikawp chi a ni. Amah lawng ringawta ei aiin heng antibiotic dandawite nena hman kawp hi a thawk na lehzuala ngaih a ni. Nileng zankhuaa thin thip sa vung vung leh irh thur raso luak chhuak nghulh thin tihreh nan damdawi tha tak a tling. He damdawi hi Ceprandal, Zegerid titea hriat a ni bawk a, a siamtu company chu 'Astra-Zeneca' a ni. India ramah hian Company chihrang hrangin an siam a; brand hrang awmin hming hrang hrang a ngah hle.



A HMANNA:
Tarlan tawh angin he damdawi hi irh thur, thin sa huam huam, pumpuia thur (Acid) tam lutuk tihreh nan leh ulcer hrik nei helicobacter (H. Pylori ) enkawl nan antibiotic-te nen tangkawpa hman thin a ni a, a mal pawhin hman a ni fo bawk. Gastroesophageal Reflux Disease (GERD) leh irh thur pum nuam lo damdawi atana hman tangkai leh lar a ni.


A EI DAN TUR:
He damdawi hi Doctor rawn lova ei mai mai tur a ni lo. Pum nat dan chihrang hrang a awm a, ulcer vang kher lova pumna leh na nazawngah mahnia ei ve ringawt emaw, midangte ei ve tura rinthua chawh ve ringawt chi a ni hek lo. I natnain a mamawh chiah em tih i hriat theih nan Doctor rawn hmasain ei thin ang che.

He damdawi hi zingkar riltam kawruah lai, tukthuan ei hma darkar 1/2 la awmin tuisik thianghlim rialno 1 nen dawlh thin tur a ni a, thial sawm loh tur a ni. Tin, ni khat darkar 24 chhungin vawi 1, mum 1 bak ei loh tur a ni. Chawlhkar 2 ni 14 chhung ei tura ngaih a ni a, a tul dan azirin chawlhkar 8 thleng ei pawh a pawi lo thei. A hnu zelah erawh chuan Doctor rawn lovin mahni thua eizawm reng tur a ni lo. Mizo zingah kumpuilingleta chhungkua kuaa 'OMEPRAZOLE' capsule eite pawh an awm mek nia sawi a awm. Hetiang hi thil tak tak a nih chuan sim nghal vat a tha hle. Chutiang a nih loh chuan a sawhkhawk tha lo (Side effect) avangin natna dangin a bawhbuai thei che tih hriat a tha.

A NGHAWNG THA LOTE:
Allopathy damdawiho hi natna tihdam nan chakin dam rang thin hle mah se, chemical nena siam a nih avangin a natna tak atana sipai huaisen leh ral vengtu leh dotu ni mah se nghawng tha lo (Side effect) a nei veleh vek zel a, hei vang tak hian Doctor rawn lova mahni thua ei ve mai mai hi chin loh tur a ni. Omeprazole pawh hian nghawng tha lo a nei nual a, chungte chu hengte hi a ni tlangpui:

1. Luhai
2, Ngaigtuahna mumal lo
3. Lungphu rang leh mumal lo
4. Tihrawl phu der der
5. Helhhawlh leh phawklekna
6. Kaw khawh, ek tui leh ek thi
7. Aikhirh leh maimiziala chauhna
8. Thawpik, thawk harsa khuh leh tikhur leh tihrawl phu uih uih
9. Luna, luakchhuak, kawpuar
10. Khawsik leh khuh
11. Pum nuam lo etc.

He damdawi i ei avanga khitianga nghawng tha lo khi nangmahah a awm a nih chuan Doctor pan vat la a thurawn ang zelin awm ang che. I thu thua ngawi renga i ei chhunzawm zel chuan natna khirh khan zawk i vei zui thei tih hria ang che.

DAMDAWI DANG NENA INKHAWIHTAWN:
Omeprazole i ei hmain Doctor hnenah eng damdawi nge ei lai i neih sawi thin ang che. A tlangpuiin heng damdawite hi i ei mek a nih pheih chuan Doctor hnenah chiang takin sawi la, inkhawihtawn pawi thei a awm avangin fimkhur hle ang che. Chungte chu:
1. Ampicilin (Pricipen, una syn)
2. Cilostazol (Pletal)
3. Clopidogrel (Plavix)
4. Cyclosporin (Gengraf, Neoral, )
5. Diazepam (Valium)
6. Phenytoin
7. HIV & AIFS medication
8. Antifungal medicine
9. Rifampin
10. Mizorambam
11. Cournadin
12. Iron
13. Diuretic (Water pill) 
14. Tacrolimus etc.


OMEPRAZOLE CHIHRANG HRANGTE:
Damdawi siamtu Company-te'n Omeprazole hi brand hrang hrangin an siam a, chuvangin, dawrah duhthlan tur leh Doctor chawh ang dik tak i lei theih nan tun lai chhuak tharlam leh lar deuh hetiang hian tarlan a ni e:
Acichek cap 20mg
Acizole cap 20mg
Aurozole cap 20mg
Coszol cap 20mg
Cozep cap 20mg
Enom cap 20mg
Kulgut cap 20mg
Lomac cap 10/20mg
Loress cap 20mg
Losec cap 20mg
Lupome cap 20mg
Nogacid cap 20mg
Ocid cap 10/20mg
Ocid Qrs cap 20mg
Ocil cap 20mg
Okacid cap 20mg
Olenac cap 20mg
Olit cap 10/20mg
Omal cap 20mg
Omalcer cap 20mg
Omecip cap 20mg
Omegacid cap 20mg
Omegold Tab 20mg
Omemax cap 10/20mg
Omenat cap 20mg
Omet cap 20/40mg
Ome-PPI cap 20mg
Omeprale cap 10mg
Omepein cap 20mg
Omeri csp 20mg
Omesiz cap 20mg
Ometab Tab 20mg
Omez cap 10/20/40 inj 40mg
Omez FF Tab 20/40mg
Omez MUPS tab 20mg
Omezol cao 20mg
Omzenix Cap 20ng
Omicap tap 10mg
Omikos cap 20mg
Omind-20 cap 20mg
Omizac cap 10/20mg
Omnilup cap 29mg
Ompep tab 20mg
Ompus cap 20mg
Opaz cap 10/20mg
Orip cap 20mg
Prazocid tab 20mg
Promisec cap 10/20mg
Prosec cap 20mg
Protoloc cap 20mg
Resec cap 20mg
Romesec cap 20mg
Rosuzol IV inj vial 40mg
Servocid cap 20mg
Siozole cap 20mg
Ulzol cap 10mg
Zolcer cap 20mg
Zomep cap 20ng
Zosec cap 10/20mg
Zosec-M tab 20mg

Heng lo pawh hi Omeprazole+Domperidone bakah omeprazole preparation chihrang tam tak a la awm a, tarlan sen a ni lo.
Doctor-in a chawh ang chiah zel lei tum la, a awm ngang lo a nih chuan Doctor bawk rawn leh thin rawh Pharmacist dik tak an nih loh chuan Dandawi dawr nghaktu sawi satliahah innghah loh tur tih hriat reng a tha.

INENKAWLNA CHIDANG

Allopathy piah lama alternative medicinces Ayurvedic, homeopathy, herbal product, Mizo tualchhuak damdawi (Indegeneos medicines) hrang hrang nghawng tha lo nei nep zawk tam tak a awm a, chungte chu sum leh pai hautak tak sen ngai lo leh Doctor leh damdawi in pan ve theilote tan heng hi hman mai thin a tha a,, mahse, damdawi pangngai ang bawkin a hun takah pelhsawlh hauh lova ei zat zat tum la hlawkna nasa tak i chhar ngei ang.

Hengte hian nghawng tha lo a nei ve em em lova a hautak lo bawk a, dam nghal vut vut lo mah se. a dam a chiang a, a rintlak hlea ngaih a ni tih hriain tangkai taka hman tum thin ang che.
1. Balhla hmin pum 1 bawnghnute tui pawlh loh no 1 nen nitin vawi 2 zingkarah leh tlai riltam laiin ei thin tur. Iron ngeih lo tan erawh chawei kham hnu minute 15-20-ah ei thin tur.
2. Yogurt rialno 1-ah drumstick hnah rawt sawm 10gm chawhpawlh in thin tur.
3. Saptheite atanga siam bawnghnute nitin zingkarah leh tlai riltam laiin rialno 1 zela in thin tur.
4. Coconut tui rialno 1/2 zelin ni 1-ah vawi 4-5 in thla 1 chhung tal in thin tur.
5. Nitin zikhlum hel tui sawr (Cabbage juice) rialno 1 zelin zingkarah leh tlai riltam laiin thla 1 chhung in thin tur.
6. Aloevera tui nitin zingkarah leh tlai riltam laiin rialno 1/2 zelin ni 40 chhung tal in thin tur.
7. Thingfanghma hnah darkar 1 chhum hnuah a tui thlifim nitin rialno 1 hmum 1/3 zelin zingkar, chhun leh tlai riltam laiin in thin a tha. A hel densawm tui pawh hman theih tho a ni a; mahse, chhum hmin hi tha zawka ngaih a ni. Thla 3 chhung tal in thin a tha.
8. Japan hlo hel hnah densawm tui thlitfim rialno 1 hmun 1/3 zelin nitin zing, chhun leh tlai riltam laiin in thin tur. Japan hlo hi chhum hmin pawhin a tha tho a, ei pawh a nuam zawk. Thla 2 chhung tal in thin a tha.
9. Mizo aieng hel densawm tui thlitfim rialno 1/2 zelah khawizu thirfiante 1 pawlhin nitin zingkarah leh tlai riltam laiin in thin tur. Chaw ei kham apianga in pawh a tha tho bawk.
10. Nitin chaw vawi 3 zing chhun leh tlaiah tlemte tea eiin chaw ei kham apiangin sawhthing hring tharlam kutzungpui tiat vel ei thin a tha. A tui in emaw a dip ei ei pawh a tha bawk. Thana leh hriatna thazam tha lo tan erawh hman loh a tha.
11. Tlangsam (Pholeng) hnah densawm tui rialno 1/2 zelin nitin vawi 3 zing, chhun leh zanriah ei hmain in thin a tha a, a chhum tui pawh a tha tho bawk.
12. Kaihzawl pil chhum tui thlitfim nitin vawi 3 rialno 1/2 zelin zing, chhun leh zan mut dawnah in thin a tha.
13. Kawlthei hmin hrisel tha nitin vawi 2 tukthuan leh zanriah ei kham apiangin pum 1 tal ei thin a tha a, a tui (guava juice) pawh in thin a tha. Kawlthei hian ril hnathawh a tanpui nghal bawk.
14. Alu hel kawr kheh loh densawm tui nitin vawi 2 zingkar leh tlai riltam laiin rialno 1/2 zela in thin tur.
15. Meihawl tui (Eucalyptus hawl) thlitfim vawi 1-ah rialno 1/2 zelin nitin zing leh tlaiah in thin tur. Meihawl tui hi vawi 1-ah in teuh emaw rei tak in a tha kher lo.
16. Fartuah pil chhum tui thlitfim rialno 1/2 zelin nitin vawi 2 zingkarah leh tlaiah in thin tur.
17. Fartuah parvar chi hnah chawhma lama lak kher chhum tui thlitfim nitin vawi 3 rialno 1 zelin zing, chhun leh zanriah ei hun hmaa in thin tur. Hei hi ril tha lo tan a tha lehzuala ngaih a ni.
18. Ailaidum densawm tui thlitfim nitin vawi 3 vawi 1-ah rialno 1/2 zelin zingkar, chhun leh zanriah ei hmaa in thin tur.
19. G. Mix Ephraim Herbal, Pu David LS Pakhuangte siam nitin vawi 2 chaw ei khamah rialno 1 zela in thin tur.
20. Liicorice zung atanga siam powder thirfiante 2-ah khawizu thirfiante 1 chawhpawhlin nitin v3 zing, chhun leh zanah thla 3 chhung tal ei tur.
21. Hnim hnah nem chikhat Slippery Elm pil den dip rialno 1/2 leh tui chhuansu rialno 1/2 pawlhin nitin v2 zing leh tlaiah khel lova ei tur.
22. Nitin purunvar mum 4-5 thial sawma eiin tui rialno 1 in zui thin tur. Hei hi thla 2 chhung tal tih thin tur.
23. Hmarchapui hmin dip Nimbu tuiah tlem phula chawhpawlh in thin tur. A tirah rialno 1/2 vela inin tihtam tial tial thin tur a ni.
24. Theihmu chikhat Bilberry rah hmin nitin ei thin a tha. Hei hian ril thali thlengin a venghim thei.
25. Pa ei chi marshmallow phoro dendip thirfiante 1 leh tui thianghlim chhuanso rialno 1 chawhpawlhin nitin zing leh tlaiah in thin tur.
26. Noni tui nitin zingkar leh zan mut dawnah rial no chanveah Noni tui 20ml telha in thin tur.
Khing Alternative Medication-te avang khian Allopathy treatment hi hnualsuat tur tihna a ni kher lo, mimalin duh a thlang mai zawk tur a ni. Natna enkawlna chi vek an ni a, a eng zawk pawh khi hnual suat chi a ni lo. A kalkawp reng zawk tur a ni a; chutih rualin Allopathy hi mithiam bikte kut a nih avangin pawng basa ngam lutuk loh a thain fimkhur a ngai zual bik tih hriat reng erawh a pawimawh hle.

Post a Comment

Powered by Blogger.