Saitual khaw mipuite chuan Saitual district headquarters-a puan tawh a taka tihpuitlin phûtin nimin khan Saitual leh Keifangah kawng an zawh a; nimin zing khan Aizawlah mi eng emaw zat an pung khawm bawk.
Saitual leh Keifanga kawngzawh hi chawhma dar 10-ah ṭan a ni a; Saitual PWD kâwn leh Keifang Dawrkâwn aṭanga zawh ṭan niin, SDO(C) Complex kâwnah an intâwk khawm. Saitual district tihpuitlin phûtin an au rual a, thuziakte an keng bawk.
Kawngzawhah hian Saitual leh Keifang bakah, Ruallung, Rúlchàwm, Sihfa, Dilkhan, Tualbung, North Lungpher, Buhbàn, Thanglailung, Phullèn, Mualpheng, Lènchím, Ṭawizo, Saichal leh Phuaibuang mipuite an tel a, mi 4,000 vel an ni.
Saitual PWD kâwna kawngzawh bul ṭanna inkhawm chu Saitual V/C-III president Ngursailova Sailo-in a kaihruai a, Rev. K Lalmuanpuia, BCM-in hunserh hmangin, Saitual Joint V/C chairman Zonunthara'n thu a sawi. Keifang Dawrkawna kawngzawh ṭanna inkhawm chu Keifang V/C president Lalremruata'n a kaihruai a; Rev. H Lallianzara, PCI-in hunserh hmangin, Saitual Group YMA vice president C Lalkima'n thu a sawi.
SDO(C) Complex kâwna kawngzawh khârna inkhawm chu Saitual District Implementation Demand Committee vice (SDIDC) chairman K Ramchhuanmawia'n a kaihruai a, SDIDC chairman Rohmingliana leh Saitual Group YMA aiawhte'n thu an sawi.
SDIDC Chairman chuan, kawngzawh chu rálmuang taka tharum tel loa sorkar karna a nih thu sawiin, kumina Independence Day pawh a ropui thei ang bera lawm an duh thu a sawi a, "August 12, 2017 ral hma ngeiin sorkarin DC rawn dah se kan duh. DC hoa kumin Independence Day kan hmang thei dawn lo a nih chuan kan thil duh hauh loh pawh tih lo ṭul ta se, Saitual mipui thiam loh ni loin, district function min tiamtu sorkar thiam loh zawk a ni tawh ang," a ti.
Aizawla pun khawm hi Saitual Town Youth Organisation (STYO) huaihawta neih niin, Zodin Square-a Mahatma Gandhi lim bulah an pung khawm a; Saitual town area chhunga khaw hrang hrang - Sihfa, Ruallung, Rulchawm, Keifang leh Saitual welfare, Aizawla awmte telin, Saitual district tihpuitlin ngiatna thuziak an ken bakah, an au rual a ni.
STYO president leh Saitual Welfare Committee, Aizawl chairman VL Krosshnehzova chuan, AICC vice president Rahul Gandhi-a'n, 'The still-born district headquarters, announced by the MNF govt. shall be made fully function by the Congress Govt.' tiin kum 2008 inthlan dawnah Saitual khelmualah a sawi tih a sawi.
Gandhi-a lim bula pun khawmnaah hian Keifang Welfare president Lalnunsanga, Ruallung Welfare chairman R Lalṭhatluanga leh mi dangte pawhin thu an sawi.
Aizawla pun khawmnaah hian, 'Saitual district hi tihpuitlin ni rawh se' tih te, 'Mizoram sorkar hi a thutiamah ding rawh se' tihte leh, 'Saitual district tihlawhtling theitu sorkar kan duh' tihtein an au rual a ni.
Saitual district tihpuitlin phût ngiat nan July 27, 2017 aṭang khan Saitual khawpui huam chhunga in tinah leh Aizawla Welfare member-ten puanvar an zár mek bawk.
Saituala kawngzawh resolution
1.September 12, 2008-a Mizoram sorkarin Saitual district a lo puan tawh, min bialtu MLA & Home minister R Lalzirliana pawhin tun sorkar term chhung ngeia tihpuitlin min lo tiam tawh chu vawiin thlenga tihpuitlin a la nih loh avangin, Mizoram sorkar chak tak hian August 12, 2017 ral hma ngeiin min tihpuitlinsak ngei turin kan phût.
2.SDIDC-in Saitual district min function sak thuai tura Mizoram Chief Minister hnena July 16, 2016-a memorandum a lo thehluh tawh chu Saitual town NGO hrang hrang - YMA, MHIP, MZP, MSU te, Saitual Group YMA te, political party zawng zawng leh V/C zawng zawngte'n kan thlawp tlat a ni.
3.July 31, 2017-a Saitual town mipui kalkhawmte hian Mizoram sorkarin Saitual district tihlawhtling tura August 12, 2017 ral hmaa kan duh min tihpuitlinsak loh chuan sorkar kar nan a ṭul ang zelin na taka hmalak ni rawh se.
Source : Vanglaini Mizo Daily
Post a Comment