DARLAK KHAW MI RULCHUK VANGA BORAL CHU A DAM LEH BEISEIA REITAK ENKAWL A NIH HNUAH VAWIIN CHHUN DAR 12-AH VUI A NI ANG

Vanneihthanga Vanchhawng

24th September, 2017 (MSR) : Rul chuk vanga boral, Ramdina hi September ni 19 khan Khuavangrul (Black Krait) nia hriatin a chuk a, Mamit damdawiin panpui a ni a, a tuk September ni 20 chawhma dar 11 ah a boral zui ta a ni. A boral hnu hian an khua Darlak lamah a ruang hi phurh thlak nghal a ni a, tunhma lama rulchuk vanga boral tawh pawh lo enkawl tawh thin nia sawi chu bei nge sei rundung tiin an pun ta a ni. Rei tak enkawl a nih hnuah beisei tur a awm lo tih a chian tak avangin vawiin chhun dar 12 hian vui a ni ang.

Darlak khaw mi Ramdina thihna leh a thih hnua a tih dam leh beisei a enkawl a nih chungchang hian sawi leh ngaihven a hlawh hle a, hetiang lam kaihhnawih post pawh chhiar tur a awm nual a ni.

Tun thil thleng hian ngaihtuahna fing zawk min neih tir hram se tih beiseina avangin ka post hmasaah ka ngaihdan ka sawichhuak a, thenkhatin an tawng viau tih pawh ka hria a ni. Mah se, thudik hi lem a har chang a awm thin a, sawichhuah erawh a tul chang a awm fo bawk si thin a ni.

Mizo mi nawlpui hian thil kan chian lo hle a, mi sawi nazawng pawm mai loh te pawh he thil thleng atang hian zir chhuak ila a lawmawm ngawt ang.

Doctor ten mitthi-a an puan tawh tih dam leh theih beiseina rilru mitthi chhungte rilrua lo awm kha a chhan a awm ve a, tun hma lama hetiang case tih dam leh tuma beihna lo awm tawh vang te a ni ve. Mitthi chhungte leh khawtlang lam ka dem hauh lo. Thil theih loh ti thei anga inlantirna leh mitthi chhungte khawtlang beiseina ti sang tura beih duhna thinlung kha kei chuan inbumna ka ti lo thei lo a ni.

Hetiang deuh tho hian mibo awm nikhuaah tawngtai thil hre thei nia insawi rawn kan hrat hle bawk a. Hei pawh hi tul lova in hambuaina mai a ni bawk thin. Kan hnain a zir avangin mibo zawn nikhua-ah report siamin kan buaipui ve fo thin a, heng atanga ka hmuhchian em em chu; heng tawngtai atanga thil hrethei inti ho hian an rinthu mai mai an sawi thin tih a chiang hle a ni.

Engtik kum nge ka chiang chiah ta lova, Aizawl Bungkawn veng mi taxi driver bo tum khan tawngtai thil hrethei mi pahnih pathum rawn an ni a, pakhat chuan silchar tlangdung lamah a awm thu a sawi laiin pakhat chuan Sialsuk tlangdung lamah a awm thu a sawi thung a. Khawtlang tlawmngai mi engemaw zat thuang hnihah insiamin motor engemaw zat hmangin an zawng chiam a, a hnu thla khat velah a taxi hmangtuin a that a, Lengpui kawngah, kawngthlangah a paih tih hriat a ni a, a ruang chhe tak hmuh a nih kha thenkhat chuan kan la hre rengin ka ring.

Tawngtai thil hrethei te, rul chuk vanga mi thi tawh hnu pawh enkawl dam thei anga inlantir thin te hi mipuiin i hnualsuat ngam tawh ang u. Heng mi te hian chhiat tawk chhungte leh khawtlang mipui tul lo takin min tibuai zing em em tawh a, heng hi fin nan i hmang tawh teh ang u ka ti a ni.