Mizoten kan hmuh leh kan ei mai theih ei in ṭhenkhat leh an ṭhatnate han tarlang ila.Changkha:
-Thau chhia ngah tan ei tam a ṭha a, taksa a thau chhia (cholesterol, TG, VLDL) a ti tlem thei a, hei hi zunthlum (NIDDM) nei tan pawn a ṭha.
-Blood sugar level a tihniam theia ngaih a ni bawk.
Fanghma:
-Tui a pai hnem a, kan taksa a vawng daiin dehydration lakah min veng thei.
-Overweight, zunthlum, BP sang leh cholesterol sang tan ei a ṭha.
-Fibre (a kawr leh mu bikah a tam) a ṭha, inthiar lama harsatna (constipation) nei tan a ṭha em em.
-Ril a tifaiin eng emaw chenah ril leh colon cancer laka min ven theihna a nei.
-Ei mai piah lamah Vun enkawl nan pawn ṭha tak a ni a, mit hnuai val, vun tihfaite leh vun chuar ven nan te leh a dang dang atan an hmang uar hle.
Be mu chawr (Germinated seeds/sprouts):
Kel êk chânna, Motor chânna, Bekang, Moong dal te hi Mizorama kan neih theih langsar pawl an ni awm e. Heng be mu leh dal hoah hian protein a ṭhain charbohydrates a tam em em lo a, carbohydrates mamawh tam lo (overweight) te tan ei ṭha tak a ni.
Chiah puama tihchawr ṭhatna te:
-Chiah puama tihchawr hian digest a tiawlsam a, a hela ei theih khawpin a lo no a, a ṭhat dan ber pawh a hela eiin a ni. Salad-a telhin breakfast-ah leh snacks-ah te pawh a hman theih
-Vitamins leh a ṭhatna dang pawh a lo pung a, chu chuan a ṭhatna a tizual a ni.
Dahi:
Dahi (dhoi) hi a nihna takah chuan bawnghnute chhia, hrik (bacteria) in a ei chhiat tawh a ni a, heng hrikte hi hrik ṭha an ni a, kan ril hnathawhnaah nasa takin an lo pui ṭhin a ni.
-Digestion-ah a pui a, taksaa Vitamin siam chhuah kawngah te a pui a,
-Kan ril leh kan taksaa natna siam thei hrik ṭha lo thah leh balance siam kawngah a pui a,
-Ril a hrisel ṭhat chuan kan taksa pawh a lo hrisel ṭhin a, kan vun thlengin a lo nalh phah ve ṭhin a ni.
Antibiotic eite hian dahi hi ei tum hram hram ṭhin tur a ni. Dahi mai ni loin heng Dahi aṭanga siam - Lassi te leh ei tur hrang hrang pawh a huam vek. Tin, Yakult hi a ṭha em em bawk a, a theih phei chuan ni tin pakhat tal hi in thei ila duhthusam a ni.
Kan han tarlan tak ei inte khi an ṭha em em a, mahse ei chin tawk hriat loh erawh chuan kan taksa tan a pawi ve thei. Ei leh in reng reng a ṭha tih vanga pawng ei vak loin mithiam te rawn hmasak ṭhin tur a ni. Hriselna a inchen loh angin kan mamawh zat a danglam a, natna bik nei tan phei chuan mi thiamte (Dietitian) rawn phawt hi a finthlak hle a ni.
*TC Lalfakzuali (M.Sc Foods & Nutrition)Human Nutrition & Dietetic Society of Mizoram
Post a Comment