 |
22nd September, 2017 (MSR) : October ni 2 hian khawtlang thianfai tura trum khata thawk chhuak hnem ber “Largest number of volunteers in community work on cleanliness” World Record siam tum a ni.
State Level Cleanliness Week Committee (SLCWC) chu nimin khan an Chairman Pu Zodintluanga, UD&PA Minister hova thukhawmin faina hapta hman dan tur an rel a. Cleanliness Week hawnna inkhawm hi October ni 2,Thawtanni zingah Aizawl Sipai Lammualah neih tum a ni a, District Headquarters dangah DC hova neih tur niin khawpui dangah chuan hawnna inkhawm hman dan tur hi Town Level Committee ten an rel ang.
Kharna inkhawm hi Aizawl khawpui ah chuan Aizawl Municipal Corporation kaihhruaiin October ni 9 ah neih tum a ni. Khawpui fai inelna 2017 buatsaih niin khawpui hrang hrang ten ngawrh takin khawpui thenfai hna an thawk mek a, tunah hian endiktu thlanchhuah ten khawpui fai endik hna thawkin lawmman hi October ni 2 ah sem tum a ni.
October ni 2 hian khawtlang thianfai tura trum khata thawk chhuak hnem ber “Largest number of volunteers- in- community- work on cleanliness” World Record siam tum nise tiin hemi atan hian UD&PA leh tlawmngai pawl ten hma la se tiin an rel a. Aizawl khawpui chauh nilo Census Town tin ah hei hi neih tum niin khawtlang tifai tura thawk chhuak zat hi chhiar vek tum a ni. October ni 2, 2017 atanga tanin October ni 1, 2018 thleng hi Cleanliness Year atana hman nise tiin meeting chuan a rel bawk.
He meeting-ah hian AMC Mayor Pu PC Lalhmingthanga, GAD Secretary Pu Zothankhuma, LAD Secretary Pu Rodney L.Ralte, DP&AR Secretary Pu V.Lalremthanga, Sports Secretary Pu HL Rochungnunga, Central YMA President leh Secretary bakah sawrkar official dangte an tel a ni.
Post a Comment