✍🏻 *SETANA thu hnuaiah ka pa a awm lai khân SETANA chuan theih tâwp teh meuh in kan chhungkua chu ka pa hmangin min sawisa a, kha tiang aia nasa kha tunge tuar chuang ang le? Țhenawm te an rawn tlân khawm loh leh Keini kan tlân chhuak a, Hreipui nen kan in zawng a, Zan laiah hla taka pi leh pu te Inah kan tlan luh a, Khum hnuai lamah kan unau a kan tawlh luh hrut hrut lai te kha ka ngaihtuah châng hi chuan biang a mittui luan a hnai fo țhin.*✍🏻 *Ka u te Kohhran lamah an in hmang a, kan In chhung khur erawh Setana In ang mai a ni si, zahna leh mualphona chuan min hual mai ni lovin a chîm in min chîm tak meuh a, țhian kâwm ve ila, inthlahrung reng reng in hringnun kan hmang a, mite'n min en hrek hrek a, a chhe lampang tehkhin nan kan chhungkua chu min hmang fo țhin. Țhiante'n ngaihzawng an nei a, duh ve pawh ni ila, ngaihzawng neih ve chu sawi loh țhiante bul a awm ai chuan mahni a hringnun hman a thlan awm zawk țhin a ni. Ka u te hla sak țhin Ka Nu min hrilh chu "Zua pan chawlh tui ning zu a rui țhin e, thai leh hrai duh leng zawngte"n chhingmit an meng ngam lo lenrual hma ah, thinlai nâ in Chun nu'n luangthli a nûl leh țhin." tih hi a ni.*
✍🏻 *Ka nu chu Kohhran lamah a inhmang thei vak thei lova, Nu ho zîngah a tel ve lah in, mite chuan a hlâwk thlak thu In lamah te an hâwn a, an sawi a, Ka nu ve chuan Zahna leh Mualphona bâk rawn hawn tur hi a nei meuh lo a ni. Chuta kârah Kum 7/8 vel ka nih lai ațang tawhin Kal (Kidney) leh tha nâ natna nei a tun thlengin, chung te pawh chuan Kohhran lamah tel tam thei lovin a siam ve bawk a ni. (hetiang tawng ve lo tân chuan Kohhran a inhman leh hman loh chu in hrethiam kher lo ang.)*
✍🏻 *Mualphona leh Zahna te, tihhrehawm a kan awmna te, kan chunga thleng te hi KA PA vâng a ni reng reng lova, SETANA vâng a ni e. Ka pa hmangin kan chhungkua min țhiah darh a tum a ni. Mahse LALPAN chhungkua a din tawh chu, awlsam taka SETANA țhiah darh tir mai mai chu LALPAN a tum bik lova, tun thleng hian SETANA tih duhdah chhungkua mite hmuhsit țhin kha LALPAN ala hunhim zel a, Kum 34 vel zet chu Thihna koh tlâng ațang min hum tawh a, Chhungkua mi pariat zingah pakhat pawh boral awm lovin kan hma LALPAN ala hruai zel a, Mi la hruai zel dawn bawk a ni.*
✍🏻 *SETANA'N ka pa hmanga kan chhungkua min tihduhdah țhin lai khan, Kohhran nu ho zingah hmun chang ngai lo, țhenawm khawvengte hmuhsit țhin KA NU chuan "Isaka leh a nupui Rebeki leh fapa te, Jacoba leh Esauva chanchin te, Jacoba leh a fapa Josepha chanchin te hi School ka bânah te hian min hrilh țhin a, Ni e, ka nu malpui chu ka lukham a, ka samah a chûl heuh heuh a, he thu ngei hi min hrilh nawn fo țhin a ni, tun thleng hian ka la hre reng a ni.*
✍🏻 *Kan tun hman mêkah hian Suahsualna em em pawhin a bawh buai loh Nu leh pa tam tak, Mahni fate aia ei zawnna leh hnathawh ngai pawimawh zâwk, PATHIAN thu aia mahni hna leh ei zawnna ngai pawimawh a, Fate an dam chuan ti a duh tâwk mai NU LEH PA kan tam tawh hle mai, a pawi ka ti tak zet, Chatuan thleng a i chhawm theih tur I fate ngai pawimawh ber la, Kohhran mite hma a Nau hlanna i neih laia, i thutiam kha vawng nung reng turin inti harh thar leh rawh.*
✍🏻 *I pasal chu a hman tlâk thlâwt loh a nih pawhin Beidawng suh, I pasal chiah hmanna awm se țangkaina i nei dawn lo a sin, I pasal a hman tlak loh a nih pawhin Nu berin hma i lâk a ngai alawm, chu chu alâwm NUPA a siam in nih chhan, Pathian thu chuan "Engvangin nge pumkhatah a siam, Chi thlah Pathian ngaihsak a zawng a ni" a ti a, Deuteronomy 6:7 ah chuan "in fate țhahnemngai takin in zirtir ang a, in ina in țhut lai te, kawnga in kal lai te, in mut lai te, in thawh hun tein in sawi țhin tur a ni." a ti a, chu mai a ni lova, Pathian thu theihnghilh a nih loh nan Bânah zem a, Mit leh mit inkar chalhren ah hmang turin min ti hial a, chu chu JUDA pa chuan tun thleng hian ala ti țhin a ni.*
✍🏻 *CHHUNGKAW NU BER i ni a, fate ngaihsak leh Pathian thu lama kaihhruai hi i mawhphurhna liau liau a ni e, I hnathawh ah chuan eng ang pawhin hlawhtling la, Eng ang a mi thiam leh ril pawh ni la, Kohhran mite hmaah Pathian hnena fate kaihhruai i intiamna thu theihnghilh a, Pathian thu aia thil dang lamah i pên san a nih si chuan I tum i țhelh a, I hlawhchham tho tho a ni.*
✍🏻 *Chhungkaw nu niin i hringnun chu a hrehawm hle a, i kawng chu thim in alang pawh a ni thei e, Pathian chuan awm lo ata awmah min siam vangin Kawng awm lo ah pawh kawng a siam chawp thei tih ring la, I fate chungchangah LALPA a i mawhphurhna hlen phawt la, Lalpan a tih tur ang chu a ti ve mai ang. I kawng chu zawh lai chu thim in bawm se la, kal ngaihna rêng pawh awm lo ang maiim lang țhin mahse LALPA hming a i rah chin apiang chu TIH CHAH in a awm zel ang.(Jordan lui chu dai hun a chat tur a ni e.)*
✍🏻 *Heng zawng zawngah hian kan hrehawm thu zawng sawi ka ni lova, rah țha nangmahni ah a awm beisei vang a ni e.*
*"Nun beidawng leh lungngai mêk te, ka tem ve aw i hring chan hi,i lungngaih țahna zawng kha thlen ve rawh i LAL kiangah, Kan Zalen hun alo hnai ta,"*
LALPAN ROPUINA CHANG RAWH SE.Amen
Post a Comment