Pian leh Murna : 1967 November ni 15-ah Samthang khuaah Pu Khamliana leh Pi Tawksungi te fa mipa 3 leh hmeichhia 3 zingah a tlum ber ni tura lo piang a ni. A nu Pi Tawksungi hian a boral san hma a, Pu Khamliana hian nikum (2011) khan a boral san ve leh ta bawk a ni.
CFL tih hi ‘C’ tih hian a pa hnam Chhangte tih lamin ‘F’ hian a nu hnam Fanai tih a lam thung a, ‘L’ tih hi Lai tihna niin ‘ Chhangte Fanai Lai Hmingthanga’ tihna a nih chu.
Zirna Lam : Samthang khuaah hian a seilian a, Primary School a zawhin Khawbung lamah Middle School leh High School a kal thung.
Sakhuana Lam : Kohhran-ah Samthanga an chhungkua hi Presbyterian Kohhran a awm an ni a, amah CFL-a hian Aizawl lama a khawsaknaah Lalchhungkaw Kohhran zawmin hun eng emaw chen Lalchhungkua-ah a awm hnuin, a hun hnuhnung lamah Presbyterian Kohhranah a let leh a ni.
Infiammi A Ni : Tleirawl chhuah atanga infiamna buaipui em em a ni a, Volley ball leh Football-ah a tui fal a, football-ah keeper tha tak a ni thin a, Samthang ‘A’ teamah a tel nghe nghe a ni. Samthang Games & Sports Association-ah hun eng emaw chen OB-ah lo tel tawh a ni. CFL-a hian Samthang-a a khawsak chhungin NGO hrang hrangah a tel thin a, hawlh lawr ber pawl a ni.
Zai leh Rimawi lamah : Rimawi lamah naupan tet atanga rilru pe lian em em, Tonic Solfa phei chu thiam tak a ni. 1980 bawr chho velah a thiante nen Zoawi Virthlileng Group dinin, heath hian lead guitar a perh a, Tuipuiral Beat Contest-ah pakhatna an ni nghe nghe a ni. 1983 atangin mal zaiin a kal tan a, Tuipuiral Meet-a zai intihsiaknaah a tel tawh chuan lawman pakhatna a dawng zat zat thin.
Zai Lam Hmasawn Tumin Aizawl-ah : He Samthang tlangval hmeltha leh hawihhawm, feet 5.8 zata sang CFL Hmingthanga hian zai lama hma sawn zel duhin 1989 atangin Aizawl-ah awm hmun rawn khuarin Aizawl Venghlui-a hmeithai Pi Rodi-i chu belin, Pi Rodi-i hi ‘ka nu’ tiin a ko ve mai thin. Zai thin hla phuanh bawk thin a nihna chu mite hriat vak la ni lo mahse, a album hmasa ber ‘Ngaihlai Masang’ tih chu Pi Rodi-i tanpuinain Tlangnuama Pu Sanglianthanga Studio-ah Cassette pakhat-a hla 12 awmna chu Rs. 5000/- in an siam tir a, tum khatah a copy siam tamna tur sum a neih loh avangin copies 100 bawr vel atangin cassette zawrhna thler Zion Street-ah chuan a zawrhtir ve ta a, a cover pawh thlalak bel chawpin, chu pawh chu thlalak order chawp zelin a siamtir a ni. He album hi a belchiangtu ten an ngaina hlawm hle mai a, kar lovah copy za chu an hralh a, chutah order a tam tial tial a, kar tin copies 1000 te a vanglai chuan an hralh chhuak ta mai a ni. Lelte-ah pawh ‘Tunge CFL Hmingthanga hi, a va zaithiam em em ve le’ tia zawhna kan dawng teuh mai.
A Lar Chho Ta Zel : Lelte Recording kha kha tihlai chuan zaithiam lar te belh ber a nih avangin CFL Hmingthanga pawhin Lelte produce turin album siam tumin hma an la a, cover leh engkim tih fel hnuah, ‘Roosna Hmeltha’ tih chu Otto Recording-in an produce ta zawk a ni.
CFL-a hian album chi hrang hrang 12 lai a lo siam hman a, chungte chu –

1. Ngaihlai Masang
2. Roosna Hmeltha
3. Chhanlet loh Hmangaihna
4. Kur Diam Diam
5. Tunge Hmeltha Ber
6. Lam dun ang/ I tan ka lo kir leh
7. Min hriat chhuah tir
8. Hlim la nui rawh
9. Ka Star No. 1
10. Theihnghilh ngai loh
11. Lemchan Khawvel
12. Hla Inchhang Special

tihte an ni.
Heng bakah hian Collection hrang hrangah zai tura sawm a nih angina a zai nual a, a hunlai na na na kha chuan Collection-a a zai a tel tawhna-ah chuan an hralh thei bik tih a ni thin.
Hlaphuah Lam : Tleirawl chhuah atanga hla phuah hrat tak, a rilru a chak em avangin hla phuah pawh a awlsam hle a ni. A album hmasa ber ‘Ngaihlai Masang’ tihah hian khatih laia Lalchhungkua a a rawngbawlpui Pi B. Lalremtluangi (Mrs R. Vanlalzauva) khan a album-ah hian a zaipui nasa em em a, a hla sak tam zawkah khan a part a pek sak vek nghe nghe a ni.
A hla phuah hi chhut danin 100 bawr vel niin a hriat a, a album 12 a hla zawng zawng hi amah CFL-a phuah deuh vek a nih avangin, a tlem berah za hi chu a phuah hrim hrimah ngaih a ni.
A hla phuah pakhat,’Intawng leh ngei ang’ tih audio a C.Lalkhumi (L) nen an inchhawnna hla phei chuan LPS Top 10 Count Down-ah thla thum chhung kha number one a hauh a, hei bakah hian kum 1992 chhunga kum khat chhunga LPS hla thlangtu ngah berah puan a ni bawk.
1991 atangin AIR : Aizawl-ah hla a record tan a, chhinchhiah danin hla 45 a record a, a hla tam zawkte hian AIR : Aizawl hla thlan hun a luah hlawm a ni. Radio-ah hian B High Graded Artiste a ni nghe nghe a ni. Aizawl Doordarshan-ah pawh Music Video-in hla 12 bawr vel a record a, local channel-ah hian tum li hla a record bawk.
A Mak A Makin A Lar : 1991-1995 bawr chho velah chuan Mizo mipa zaithiam lar leh album pawh hralh tla ber a ni chho a, he a larna hi atan harsatna thlentu a ni ang tih hria se zawng a buai em em lo tur. A hmel a tha a, a zaithiam a, rual pawl dan thiamine, nula try dan hrang hrang pawh a zei hle a ni ang. A bik takin a zai leh hmel hian Zokhaw nula lam a awi thlu deuh zel a, a nungchang duhawm lo laite chu nula tam takin an hai der tlat a ni mai e.
Hun Hnuhnung : Zaimite tan hautak tak mai ‘Zu’ leh ‘Nula’ chu atan pawh thlemtu lian an ni a, hei hi a chhiatpui a ni ta ber. Kum 2000 a rawn herchhuah meuh chuan a takin a nitin nun hman dan chu tlin bik ta hek lo le, a rawn lang chhuak tan a, zawi zawia awngrawpin, zai lamah phei chuan a inhmang hlei thei ta lo a ni ber. Mipui hmaah pawh a zai thei ta meuh lova, mipui hma a a zai hnuhnung ber nia hriat chu 2010 June ni 10-a Samthang Community Hall-a a zai kha nia hriat a ni. Kum 2012 a rawn her chhuah meuh chuan tlangval hmeltha leh sang thlerh thlawrh chu thimin a kap zo ta, TB natna a lo vei bawk nen, Samthang lamah khawsa chhoin tlem tlema tha chho deuha a inngaih lain September ni 7 khan a insawiselna a zual deuh a, Khawbung PHC panpui a ni a, September ni 9, 2012 zan chuan a darker telin a hniam thla zel a, dar 10:45 a thlen mueh chuan CFL-a a awm ta lo tih a lo ri ta.
Nupui Fanau Lam : Zaithiam lar tam tak hi nupui pasalah an tluang lo tih hi ani chungah pawh a thleng dik ve khawp mai. Nupuia sawi hi eng emaw zah an awm na chungin a boral lai hian nupui a nei lo thung. Fa erawh 4, fapa 2 leh fanu 2 a nei a, chungte chu – Vanlalrema, Lalremtluangi, Hmingthanpuii leh Lalthangliana te an ni a, Mizoram khaw hrang hrangah an awm hlawm.
Zoram Mipuiin An Sun : CFL Hmingthanga boral thu Mizo mipuiin an hriat hian an ngaihtuahna chu amah vui ni hian Samthang lam a hawi thup a ni ber a, AIR : Aizawl chuan CFL Hmingthanga pualin darker chanve zet hun a hmang a, a chanchin leh a zai record tawhte a tichhuak hlawm a ni.
Cable TV pahnih ZONET leh LPS pawhin CFL-a pualin hun an hmang a, a Music Video te pawh an tichhuak nasa a ni. Cable TV News leh Aizawl chanchinbu zawng zawngah CFL-a chanchin hian a lailum a luah vek a, khawlai titi lian ber a tling.
Mizo zaimi Inzawmkhawm Gen. Hqrs pawhin thuchhuah siamin CFL Hmingthanga an member an uizia an sawi a ni.
Champhai Promoters Club-in Ral : Champhai District-a zai leh rimawi lama hma la liantu ber Champhai Promoters’ Club chuan CFL Hmingthanga ruang nghah tuk September ni 11, 2012 khan Champhai atangin Samthang-ah CFL-a ral turin Car 3-in an member 20 zetin Samthanga CFL-a te inah an va ral a, Champhai Promoters’ Club hian hun remchang hmasa berah CFL-a Tribute Concert pawh Champhai-ah buatsaih an tum thu an puang nghal bawk. November 22, 2012 zan khan Champhai Parish Hall-ah hlawhtling takin an buatsaih a ni.
Champhai Promoters Club aiawhin Pu C. Huaisavunga’n CFL-a chanchin a sawi a, Pu Hruaia, Pu R. Rosiamliana leh zaithiam eng emaw zah an tel a ni.
( Source : Joel Lairemsanga )

Post a Comment

Powered by Blogger.