THINLAIAH I HLUI LO
FAMCHANG HNU KA CHUNNUNNEMI,
Kum sawm sul a liam ta...fam dairial i channa:
Mahse i dai chuanglo,thinlaiah i hlui lo ve,
I sakhming mawi zaiinka rawn chawi zel dawn e....
A thar zel aw! nang, ngaih lai,
Ka chunnunnem thinlaiah i hlui lo,i hlui lo,
I sakhming tham ral mai tura'n zawng
Ka phal lo,zaia chawiin
Ka au zel dawn che....
Tawn loh kar khua rei chhung hianin maw,
Biahthu tinkim hlan tur he a tam lua ka ti:
Theih chang se,vawikhat tal intawng leh ila,
Ka hlan nang che lungchimte'n lo ngai teh ang che....
Fam i chan dawn a piang i hraite,
Khuannu hualin mawite'n,damte'n a seilian e:
I hraichawi dangte pawn lanu,val an chang zo ta:
Kei pawn thlangkhuandimin hrai duhleng ka awi e....
I silhpuan hlui zawngte thlir changin,
Kan en ning thei lo asin,awmkhawhar min hnem:
Duhte'n ka vawng zel e,mahse,hrilh tihai sei thlawn,
Kirtiang relin hringmi i hraileng min awm rawh....
Zawlkhawpui lamtluang zau fan changin,
Mite zawng an chun nen nau ang an nuiza:
Saisenteta min chawiliantu Chun tawn ni awm lo,
Dawn a sei,lung ka vai....thinlai na dam thei lo.....
(Kum 1982 kum a pi Zualbawihi'n a nu angaih em em Kum 10
liam ta a boral ta hriat reng nan a phuah ani)
Post a Comment