Zanin dar 7:00 hian Balewadi Stadium-ah MPL champion Chanmari FC-in Indian Super League club FC Pune City an hmachhawn dawn a, Pune-a friendly match khelh tur hi Mizo club leh player-te tan inphochhuahna ṭha tak a ni.
Mizo club fiahna
ISL season thar atana inpuahchahna nei mek Pune City hian Chanmari FC nena an inkhel turah hian player neih ṭhat an chhawr dawn a, Mizo club tan fiahna a ni thei ang.
Pune City assistant coach Pradyum Reddy chuan, "ISL atana inpuahchah mek kan nih avangin kan inkhel tur hi kan ngai pawimawh a, kan player-te khelhna hmun pek vek kan duh. Foreigner pariat kan nei a, ISL danah panga chiah chhawr theih a nih avangin he dan hi kan bawhchhe lo ang. Hun chanve hma lamah foreigner pali, second half-ah pali dang kan luhtir ang," tiin an khelh dan tur hmang a sawi.
ISL club hian defender pahnih Rafa Lopez (Spanish) leh Damir Grgic (Croatian), midfielder pathum Marcos Tebar (Spanish), Robertino Pugliara (Argentine) leh Jonaton Lucca (Brazilian) te an kawl a, forward-ah Uruguayan pakhat Emiliano Alfaro leh Brazilian pahnih Diego Carlos leh Marcelinho te an kawl a ni.
Inphochhuahna
Pune City assistant coach Pradyum Reddy chuan, "Mizo football nen hian tun hma aṭangin inthlunzawmna ṭha tak kan nei a, naupang chher chhuak ṭha Chanmari FC nen kan inthlun zawm thei hi kan lawm. MPL hi kan ngaihven reng a, Chanmari tan Joe Zoherliana, Muanzova, Thomas-a leh midang an khel ṭha tih kan hria a, friendly match hmang hian inelna sang zawkah hman tlak a ni dawn em tih kan fiah ang," tiin Mizo player-te chu an en chik tur thu a sawi a, Pune-a Mizo awmten inkhel hi an ngaihhlut ngei a rin thu a sawi tel bawk.
Pradyum hi Shillong Lajong coach hlui a ni a, I League club a enkawl hun lai hi Shillong club tana Mizo khelh tam lai ber a ni. Kum 41 mi hian Mizo player a ngaina a, Pune City-ah pawh hian Shillong Lajong player hlui Lalchhuanmawia leh Isaac Vanmalsawma te an awm.
Chanmari FC managing board secretary Andrew Lalremkima chuan, "Pune City nena friendly match kan khel tur hi kawng tinrengah kan hlawk pui a, inkhelh zawhah rah duhawm tak a neih ngei kan beisei a ni," tiin Vanglaini a hrilh bawk.
Engtin zel?
Chanmari FC coach H. Vanlalthlanga chuan, "Player-te tan hun ṭha a ni a, chuvangin kan hruai chin te hi chu khelhna hun kan pe vek ang. Chak tum emaw draw tum ngawr ngawrin a khelh theih dawn lo a, kan player-ten an ṭhatna an phochhuah theih turin ruahmanna kan siam ang," tiin an khelh da tur hmang a sawi.
MPL champion lai Chanmari hian Pune City hmachhawn tur hian captain Rochhingpuia chu AFC C Licence Course a kal dawn avangin an hruai thei lo a, an keeper F. Lalmuanawma chuan Inrinni khan nupui a neih avangin a zin ve thei lo bawk.
Thlanga hote hian October 19 hian Lammualah match an nei leh nghal dawn a, Ningani tlaiah I League champion Aizawl FC an hmachhawn lehnghal ang.
Source: Vanglaini
Post a Comment