ZPM hruaitu thar hlanna hun hmang Ram leh hnam tana thawk turin an intiam

Zoram Peoples' Move­ment (ZPM) - Ṭangrual Pawl chuan nimin khan Chanmari YMA Hall-ah inpuanchhuahna leh hruaitu thar hlanna hun an buatsaih a; ZPM hruaitute leh ṭhalaite ram leh hnam thawk turin an intiam.

Inkhawm hi ZPM Stee­ring Committee chairman Lalliansawta'n a kaihruai a, general secretary K Sap­danga'n ZPM din chhan, din dan leh a thil tumte a sawifiah. Rev.Dr K Thanzauva'n hruaitu tharte Pathian hnenah a hlan a, MPC vice president Vanlalhlana'n ṭhalaite thu ram leh hnam tana thawk turin thu a tiamtir. 

K Sapdanga sawi danin, Mizoram kal­phung thar hmanga mipui sorkar, hnam damna tling din duhtute'n August 15, 2017-ah thawhhona thutlung ziakin Ṭangrual Pawl hi an din a; kum 2018 Assembly inthlanah leh hun lo kal leh turah ṭangrual chhunzawm zel turin thu an thlung a ni. 

ZPM hi political party te, ram vei pawl hrang hrangte leh mimal tu pawh, Mizorama sorkar ṭha piantir duh apiangte tel theihna a ni a, a duh tan pawl ṭhiat kher loa zawm theih a ni. 

Inkhawmah hian MPC president Lalhma­ngaiha Sailo, ZNP president Lalduhoma, MPC MLA Lalthanliana, writer PL Lian­dinga, Lengzem editor Vanneihtluanga, ZPM Val Upa Council chairman Lalfakzuala, vice chairman F Lalremsiama leh member Bualhranga ten thu an sawi.

Lalhmangaiha Sailo chuan, ZPM-in hma a sawn a, an kal tluan zel thu sawiin, "Kum 30 chhung rorelna chak lo zet kalpuina hi kan duh tawh lo tih a lang chiang a, kan ram tluchhe tawh tungding leh turin ke kan pên chhuak a ni. Rawn pên chhuah ve châk mi fel tak tak an awm a ni tih kan hria a ni," a ti a; ram rorelna ṭha lo thlak turin ZPM a inpuah chah mek thu a sawi.

Lalduhoma chuan, Congress party leh MNF-te chu an policy khârchhâwngah puhin, "NEDP leh SEDP-te hi ZNP policy an lak chhawn leh mithiamte duansak a ni. Hruaitu ṭha chuan policy ṭha an nei tur a ni a, mahni policy lo chu a tuipui tak tak theih loh. Kum 30 vel state dang hmasawnna ngaihtuahin, kan ram dinhmun a lungawithlak loh hle. State sum lak luhna ber min zawhin, chhanna tur a awm lo," a ti. 

Tunlai media lama hriat tur awm ber chu inpuhmawhna a nih thu sawiin MLA Lalthanliana, MPC chuan, "A lehlam lehlamin insawifiahna an siam a, mipui tan thu dik hriat a har ṭhin hle. Inpuhmawh vak vak hian ram a la pawhin ka hre lo. Engtin nge ram kan siam ang tih ngaihtuah zawk tur a ni," a ti a; tuna sorkar mek hnathawh leh dinhmun chu mipuiin an hriat chian thu a sawi. 

Val Upa Council chairman Lalfakzuala, IAS (Rtd.) chuan Mizoram state kum 30 chuang a ni tawh tih sawiin, "Party pahnihin sorkarna an inchelh chhawk a, ram dinhmun, sorkar kalphung leh tun dinhmun thlirin a lungawithlak lo. Mizoramin sorkar thar a mawmawh a, chu chu ram dana thlen tur sorkar, mipui sorkar a ni. Mipui pawhin sorkar ṭha an duh a, rinngam leh rintlak pawl ding se an duh a ni," a ti.

PL Liandinga chuan, political party-ah awmna a neih loh thu sawiin, "Kawng ṭha leh zirna ṭha ka duh a, chuvangin, thu sawi tur hian ka rawn kal a ni. Kan ram hruaitute hi mi fel tak an ni a, an zahawm pawh ka ti. Mahse, min hruai danah ka lungawi lo. Sem policy-te hi kan duh ve lo a ni," a ti a; mi 

ṭha an nih chuan tling dawn lo tih chiang mah se, a vote tur thu a sawi. 

Vanneihtluanga chuan ZPM-ah hian hruaitu ṭha an awm dawn a, tu nge ni ang tihah a buai loh thu sawiin, "Heng mite hi kan rin ngam loh chuan tute nge kan rin chuan ang? He Ṭangrual Pawl hi vote khat a hmu dawn a nih chuan ka vote hi a ni ang. Mizoram ṭhatna tur hria kan tam a, mahse, rorelna lai tak hi a buaithlak ṭhin, Mizoram tan i ṭangrual ang u," a ti.

F Lalremsiama, IPS (Rtd.) chuan ram hmangaihtu nia a hriatte chu a theihnghilh theih loh thu sawiin, "Tun hma chuan Chakma pakhatin Tuikuk 10, Mizo pakhatin Chakma 10 a ngam tih ṭhin a ni. Tun dinhmunah hi chuan kan zirlai pawlte hi an khawngaihthlak ngawt mai. Pawl pahnih hi chu mikhual chám rei minister an neih reng hi kan hmu rei tawh lo ang," a ti a; ram leh hnam hmangaih a pawimawh thu a sawi.

Bualhranga chuan Val Upa Council pawimawhna sawiin, "Tu mah mifel famkim an awm lo. Hnam fingte chuan hruaitu fel tak tak an thlang ṭhin a, anmahni veng tur dan ṭha tak an nei ṭhin. Kan ramah chuan chief minister leh party preisident nih an kawp a, dîpdâl ngam an awm lo. 'Pathian lo chu tu mah ka ráwn lo' te an ti ngam tawh. Sorkar veng turin Val Upa Council hi a awm dawn a ni," a ti.