Vawiin chawhma khan DC Office leh SBI Champhai Branch tangkawp buatsaihin I&PR Auditorium Champhaiah mipui nawlpui hnena Digital/Cashless payment chungchang hrilhfiahna leh zirtirna hun hman a ni.
Programme kaihruaitu Pi Lalsangpuii Hmar, Addl DC Champhai District chuan Prime Minister Award for Excellence in Public Administration tih inelna hnuaiah kumin bik atan hmalakna pali thlan tur a awm thu sawiin heng zinga mi ‘Promotion of Digital Payment’ tih programme chu Champhai District atan thlan a ni, a ti a. Tha taka kalpui aniha lawmman dawn anih ngei theih nan hmalak a ni a; hlawhtlinna hmu tur chuan sawrkar, bank lama thawktute leh mipuite tanho angaih thu a sawi a. Hemi inelna huangah hian Group I hnuaiah North East State pariat leh Hill States pathumte an awm bawk a ni, a ti a. Hmalakna hrang hrang neih anih tawh thu tarlangin, sumdawngte leh School naupangte hnenah digital payment zirtirna te chu neih anih tawh thu leh vawiin ni a mipui nawlpuite hnena zirtirna neih a ni leh thei chu lawmawm a tih thu a sawi a. Kalkhawm mipuite chu Digital payment hmalakna a lo hlawhtlin theih nan an thil zir leh hriat te midangte hnena zirtir chhwng ve zel turin a chah nghal bawk a ni.
He hunah hian Champhai khawpui chhunga Bank 6 te an tel a. An hnen atangin Digital Payment chungchnga presentation ngaihthlak a ni a. Digital payment tih dan zirtirna leh bank kaltlanga hemi kalpuina tura hmalakna leh tih theih an neihte sawi zauna hun an nei a ni. He hunah hian Bank kaltlanga application hrang hrangte zirhona neih a ni bawk.
Programme khuh hawnna hi Pu SP Sarmah, CM, Lead District Manager-in a nei a. Pi Rebecca Laldinmawii Hrahsel, SDC Champhai-in lawmthu sawina neiin hun a khar a ni. He hunah hian khawtlang hruaitu, NGO leh Champhai khawchhung mipuite an tel a ni. -DIPR Mizoram
Post a Comment