- Dr. VR Râlte


MIZORAM ah ‘MIZO SOCIETY’ kan chēn hona ah KRISTIAN ni(duh) hauh lo, kan hnamdang unau HINDU sakhua vuantute zinga boral (thi) an awmin a tam zawk te chu kan YMA te’n an buaipui (sãwngbawl) ţhin a, chutah chuan board tarna ah KOHHRAN – HINDU tia dahsak ni ţhin hi kan hmu ta fo mai a, a ngaihmawhawm hle. Hei hi a inhmelo mai ni lovin a thiang lova, a him lo bawk a ni. KRISTIAN leh HINDU hi sakhaw hrang hlak, (PATHIAN chu pakhat a ni tia sawi duh awm ţhin mah se-) Pathian biak in ang lo, serh leh sâng in ang lo tak a ni. Chuti a nih lai chuan (Mizoramah Gorkhali Kristian unaute an lo awm ve ták nualah chuan-) Kristian tura ka ngaih Gorkhali nu pakhat chu kan inbiakna ah “Eng Kohhran nge in nih?” tiin ka zawt a, tîm miah lohvin “HINDU KOHHRAN kan nia.” zuk ti ngam a!!! (An sakhaw mi leh sa te chutianga chhång ţhin turin an infuih ţhin nge maw ni?!)
Tlemin han sawi zau deuh ila -

BIBLE-ah, KOHHRAN chu Pathian tana serh hran “PATHIAN NUNG BIAK IN THIANGHLIM” a nih thu Ephesi 4:1-6 leh 2:20-21 ah te kan hmu a, Paula’n KOHHRAN chu Krista mo thianghlim ni turin, Krista ngei chu a pasal atan hualsakin thianghlima awm tura a hauhna kan hmu [ 2 Kor.11:2 ]. Chutih rual chuan KOHHRAN chu Pathian chhungte, Serh hran, Thutak ban leh innghahna [ 1 Tim.3:15 ], Kohhran leh Krista inzawmzia leh inpumkhatzia te kan hmu bawk a ni [ Eph.1:23, Kol. 1:18 & 24 ]. KOHHRAN chu “Krista Isuaa tihhran, mi thianghlim ni tura kohte; Pathian be ho tura ringtu awmkhawm niin [ 1 Kor. 1:2, 11:18 ] Ringtu zawng zawngte Krista taksaah an inthlungkhawm a ni.


Kohhran chu huapzo a ni a, Amah CHHANDAMTU LAL ISUA ringtu hnam tin, chi tin a huap vek a, Amah ringlotute HINDU ho a huap ve rêng rêng lo. Kohhran chu khawvela pawl indin satliah ang mai ni lo, THLARAU THIANGHLIMIN A DIN, A UAP a nih avangin Thlarau Thianghlim ring ve lo HINDU chu engti kawng awzawng mahin Kohhran a ni thei lo.
Mahni chauh dik bera in ngaite, midang (Mizo Kristian)te rem thei hauh lote chu kohhran nihna dik kan vuahsakin an invuah thianglo va, kohhran hi pawl pakhat ang leka palzam chi a ni lo.
Sawi tawh angin Kohhranho, amah ringtute chu Pathian Biak In thianghlim tia sawi a ni a, a tikhawlotu chu Pathianin atikhawlo ve dawn a ni. [ 1 Kor.3:16-17 ] i fimkhur ang u.
Chuvangin Kristian nilo an boralin KOHHRAN tih dah tel tawh lova, SAKHUA – HINDU emaw BUDDHIST emaw SIKH emaw ISLAAM emaw dah sak mai tur a ni. Chu chu sakhua kan INZAHSAK tih lantirna pawh a ni ang a, a him zawk ngei ang. YMA thil tum chu “KRISTIAN NUN VAWN ŢHAT” a ni a, YMA leh KRISTIANNA chu inkungkaih nghet tlat a ni si a.

Post a Comment

Powered by Blogger.