“Mi tupawh an pianthar loh chuan Pathian ram an hmu thei lo vang”. (Joh. 3:3). He thu hi Lal Isuan, Nikodema, Juda hotu pakhat, pharisai zinga mi, zana a hnena lokal nena an inbiakna a sawi a ni a. Judate zirtirtu anih bakah pharisai zinga mi a ni lehnghal a.  He thu Lal Isuan a sawi hian Nikodema hian eng ang takin nge a dawnsawn ang tih hi ka ngaihtuah thin a. Nikodema chu a piangthar ta ngei em tih pawh Bible ah hian a lang leh chuang tawh lova. A hnu zela kan hmuh chu Isua an khenbeh ruang la thlatu pahnih zinga pakhatah Nikodema hi a tang ngei tih chauh hi a ni.(Joh. 19:39)
 ‘I piang thar tur a ni’ tih hi thu pawimawh tawpkhawk a ni a. Mi tupawh thlarauva an pian thar loh chuan Pathian ram tumah hian an hmu thei miah lova, nakinah pawh an hmu thei chuang lovang.  Thlarauva piang lo na na na chuan miin Pathian thu hi duhin buaipui hle mahse, Pathian ram an hmuh phah chuang lo tih ka hriatin, thlarauva pian thar a tulzia hi ka ngaihtuah chhuak leh vawng vawng thin. Miin khawvel nawmchenna te hnuchhawnin Pathian fate zingah a hun zawng zawng khawhral ve mahse thlarauvah ala pian thar miau loh chuan Nikodema ang tho hi ala nih theih. Chuvangin thlarauva pian thar a tul tlatna tak hi Pathian thu a harna lai ber a ni.
 Lei leh van ah hian tumahin midangte thlarauva pian thar tir theihna kan nei lova. Chuvang tak chuan ringtua in chhal tam tak hi thlarauva piang hauh si lo hian an inti sakhawmi em em a, an duhthlanna ngei a Krista chu thlangtu annih avangin an ngaih an titha chawp ve mai a ni. Mahse hetiang Kristian ho hian Pathian mi tirh Isua hi an hre tak tak hauh lo. An thlarau mit ala del reng a, an thlarau beng ala ngawng reng tho. Pathian aw an hre hrang chuang reng reng lo. Nikodema pawh hi chutiang mi chu a ni.
 Nikodema hian Isua thiltih makte a hmuh khan a rilru a khawih a. Pathian zawng mi anih avangin zanah Isua hnenah lokalin, “Rabbi, Pathian hnen ata zirtirtua lo kal I ni tih kan hria; Pathian an chunga a awm loh chuan heng thilmak I tih ang hi tuman an ti thei lo vang” a ti a. Nikodema chuan Isua chu Pathian hnen ata zirtirtua lo kal a ni tih a ring a, mahse a piang thar miah lo. A thilmak tihte pawh chuan a hneh hle a, amah pawh awm mai mai thei lovin zanah hial Isua chu a pan a, chik zawka a rilrua a helhkamte pawh zawh a chak a ni ang. Tin, Nikodema hian awm hle hle thei lova siamtu leh mawlh tlattu a nei a ni ang, mihring mihrinna tak pawha a induh ve dawn teh lul nen, zan zana Isua hnen rawn pan ta chu. Mahse Nikodema hian Pathian ram “MESSIA KRISTA” chu a hmu reng reng lo. A thlarau mit a del tlat. Tisa pianpui mitin Krista chu hmuh theih a ni lo. Nise tuman a tisa put lai ni khan an phatsan phal lovang. Mahse an hmu thei lo. A hmu teuh ber Petera pawhin ar khuan hma in vawi thum a phatsan leh a. 
Penticost ni ah erawh chuan thlarauvah Petera a lo piang thar ta. Messia chu a tisa mitin a hmu pha tawh lova, mahse a thlarauvah a lo nung ta. Mak ti a rawn kiltute hnenah, “Chutichuan Isua in khenbeh ngei kha, Pathianin Lal leh Krista ni fawmin a siam ta tih Israel hnam tinin hre mawlh rawh se”, a ti piap piap mai. Thlarauva piang apiang thlarau, tisaa piang apiang tisa Lal Isuan a tih ang khan, Petera tisaa Isua zuitu kha thlarauvah alo piang thar ta, a beng pawh a lo var ta. A lenlai nia alo zui alo zui tawh, a nu leh pa leh a chhung leh khatte, a lenden lai meuh pawh kalsan thaka a lo zui thin, mahse a hriatchian theih miah si loh kha fiah em emin a thinlungah a rawn inlar ta si a. A thinlunga zawhna zawng zawng chu chhanin a rawn awm ta. Petera (Isuan, ‘Setan ka hnungah kal rawh’ a tih kha) a lo thi ta a, Krista chu amahah a lo nung ta zawk a ni. Chu chu a ni thlarau pian tharna chu. Mahni ngeia Krista thlarauva hriatna nung nei lo hian thua hriattur mai hian i lo ringtu awm ve ngawt ang a, nikin niah i hrilh a hai dawn em avangin he thuchah i chhiar lai hian nangmah ngei han inzawt la, thlarauva i pian leh pian loh infiah peih rawh. 
“Tupawh Krista Thlarau nei lo chu amaha mi a ni lo,”(Rom 8:9). He thu ziak hian a ti chiai che anih chuan ila piangthar lo tihna a ni. Mangang rawh, manganna tha a ni.