India rama football inelna ngaihhlut hlawh ber Indian Super League chu nizan khan khelh ṭan a ni a, match hmasa berah hian Kerala Blasters leh Atletico de Kolkata inhmachhawnin he thuziak buatsaih a nih lai hian an result kan hre hman lo. 
Zanin dar 8:00-ah NorthEast United chuan ISL club thar Jamshedpur FC an mikhual dawn a, inkhel hmuhnawm a beisei ngam ang. Highlander-ah hian Mizo pathum Lalrindika Ralte, Robert Lalthlamuana leh Lalrempuia Fanai te an awm a, Steve Coppell enkawlna hnuaia khel tur JFC hian Jerry Mawihmingthanga an kawl thung. 
Pathianni tlai dar 5:30-ah Chennaiyin FC leh FC Goa an inkhel dawn a, Goa-in Mizo player kawl an neih loh laiin Chennai club-ah hian an player chhuanvawr Jeje Lalpekhlua leh rawlthar duhawm Jerry Lalrinzuala te an awm; Jeje-a'n inkhel bul a ṭan ngei a rinawm.
Naktuk zan dar 8:00-a inkhel tur Bengaluru FC leh Mumbai City hi hmuhnawm nghal tura beisei a ni. A vawi khat nana ISL khel tur Bangalore club tan Mizo goalkeeper Lalthuammawia Ralte a inhliam a, draft hun a tawp hnua an lakluh Gurpreet Singh Sandhu chuan si ban a nghak thei dawn.
Bengaluru-ah hian Thuama bakah Malsawmzuala leh I League-a Aizawl FC champion puitu Zohmingliana Ralte te an awm bawk a, AFC Cup khel tura an chelh Daniel Lalhlimpuia chu Bangalore club-ah hian la cham mah se reserve team-ah a awm avangin player inhliam an awm a nih loh chuan ISL squad-ah dah a ni rih dawn lo. 
Mumbai City-ah Mizo pakhat chiah a awm a, season hmasaa Mumbai FC tana khel Lalchhawnkima chu Maharashtra club tan hian a inlan ang. -Vanglaini

Post a Comment

Powered by Blogger.