Tahrik ni 23 - 26 November, 2017 chhung khian International Chin Christian Youth Conference (ICCYC) chu a vawikhatna leh a hmasa ber ni turin, Lawngtlai ah neih ani dawn a, Lairam Isua Krista Baptist Kohhran (LIKBK) Assembly in a thleng ang. Inbuatsaihna pawh ngawrh taka kalpui mek zel a ni. He conference ah hian Pu. Lal Thanhawla Chief Minister chu khuallian niin Conference hi a hawng dawn a ni.
Kum 2014 ah khan Lawngtlai ah International Lai Christian Leaders Meet neih a ni a, he Meet ah hian khawvel ram hrang hranga Laifa kohhran, sorkar leh NGO a hruaitute an kal khawm a, Hetah hian International Chin Christian Fellowship din nise, tiin an rel a. He Pawl hi tunah chuan a hming hi International Chin Literature Society tia thlak a ni. Meeting-ah hian kum 2015 November thlaah Lawngtlaiah International Chin Christian Youth Conference neih nise, tiin an lo rel a, nimahsela, kum 2015 fur lai khan leimin avangin Hakha in chhiatna nasa tak an tuar a. He thil thleng avang hian thulh lailawk niin kumin 2017 ah hian neih nise, ti a rel a ni leh ta a ni. He Conference hi khawvel hmun hrang hranga Chin mi awmte, a bikin thalaite hmel inhmuhnate neiin chu chuan inpumkhatna tha zawk a siam ang a, thalaite tan pawh hmasawnna a thlen beiseina a ni a, Conference thupui atan pawh "Unity" (Joh. 17:21) thlan a ni nghe nghe.
Conference awm theihna tur atana bul tantu chu a chunga kan sawi tak International Chin Literature Society (ICLS) hi a ni. ICLS hruaitute chu:
President - Rev. Dr. C. Duh Kam (USA)
Vice President - Rev. C. Hrangzuala (India), Secretary - Rev. Dr. Dennis Shu Maung (Australia),
Asst. Secy - Rev. Dr. Lal Uk (Myanmar),
Treasurer - Rev. Tial Lian (USA),
Members :
1. Rev. Ceu Mang
2. Rev. Thimkhup Buiting
3. Rev. Dr. Khawl Lian
International Chin Literature Society (ICLS) ah hian Kohhran leh Pawl hrang hrang an tel a, chungte chu :
1. Chin Association for Christian Communication (CACC), Hakha, Chin State
2. Chin Baptist Churches USA (CBCUSA), Indianapolis, Indiana
3. Chin Christian Association of Europe (CCAE), Europe
4. Chin Christian Council in Australia (CCCA), Australia
5. Evangelical Christian Church (ECC), Bawm, Bangladesh
6. Hill Tract Churches Fellowship [HTCF], Bawm, Bangladesh
7. Lairam Jesus Christian Baptist Church (LJCBC), Lawngtlai, Mizoram
ICCY Conference inbuatsaihna atan hian Budget-ah Rs. 50,00,000/- (Nuai sawmnga) ruahman ani a. Pandal hi Lawngtlai AOC Veng Field-ah sak mek a ni a, peihfel tep a ni. Pandal sak hna hi LIKBK AOC Pastor Bial Thalai Pawl in Rs. 450,000/- (Nuaili singnga) in an thawk a.
Conference a hla sak tur bik hi Lai hla 15 thlan a ni a, tunah hian demo hi Youtube hmangin tihdarh ani tawh a ni. Conference schedule draft siam a ni a, vantlang inkhawm vawi 8 leh workshop vawi 1 nei tura ruahman a ni a, vantlang inkhawm vawi 8 ah khian vawi khat ni 25 November, 2017 (Inrinni) chawhnu leh zan hi Chin Talent & Culture leh Chin Cultural Night neih a ni ang a, hei hi Cultural program tura duan a ni. Workshop ah hian Resource person atan hian khawvel pumhuapa mi lar deuhte hmang tura ruahmanna siam a ni. Conference pual hian Souvenir lehkhabu buatsaih tum a ni a, khawvel hmun hrang hrang Chin mi hruaitu tha tak tak ten Article ziahtir tura ruahman a ni.
Conference inbuatsaihna leh boruak siamna atan Conference pualin T. Shirt, Stickers, Music Video etc. siam a ni a, tin, sawmna video clip siam ani a, Mizoram Miss Nl. Rody H. Vanlalhriatpuii video clip a sawmna thusawitu atan hman a ni. Ushering lam hneh taka kalpui turin Ushers tur atan mi 80 select an ni a, training hi neih mek a ni.
Conference a mikhual foreign atanga rawn kal turte hi a tam ber chu Myanmar atangin an ni ang a, Bangladesh in a dawt ang a, USA, Australia leh Europe atang te pawhin mikhual engemaw zat an rawn kal dawn a ni.
ICCYC Media
Post a Comment