Kohhran leh kohhran hruaitute'n BJP hlau se ka duh - Hawla

Congress party pre­sident Lal Thanhawla, chief minister ni bawk chuan, Mizote tana hlauh tur dik tak chu Hin­du kulmûk BJP-te leh Barang Dal-te an niin a sawi a, "Kohhran leh koh­hran hruaitute pawhin hlau se ka duh," a ti.

MPCC president Lal Thanhawla hian nimin khan Thenzawl Joint YMA Hall-a Serchhip Constituency Congress party Joint Block Con­ference a hmanpuinaah thu sawiin, "Hlauh tur dik tak Hindu kulmûk BJP leh Barang Dal-te an ni tih Congress mite'n hria ila, Kohhran leh kohhran hruaitute pawhin hlau se ka duh khawp mai," a ti a; kohhrante an ṭit dêk laiin vai rama Kristian-te chu BJP leh Bajrang Dal-te an sorkar loh nan an ṭawngtai niin a sawi.

Lal Thanhawla chuan, remna leh muanna duh vang­in Congress-in lal-ṭhut­thleng an kian nia sawiin, "Hetianga remna leh muanna duh vanga lalṭhutthleng ken hi khawvel history-ah a awm leh ang em tih ngaihtuah tham a ni," a ti.

Eptu party-te'n kawng chhia tih bak sawi tur an hre lo a, Congress sorkar dik lohna leh eirûkna sawi tur an hre lo nia sawiin Hawla chuan, "Kawng chhia chu khuarel chhiat­na a ni a, khuarel kawng­zawh khum te, bandh siam khumte a malsawm ang em? March thla aṭangin ruah a la sûr reng a, sorkarin lo hâl hun pawh a pawhsei phah a ni," a ti. State dangah pawh an kawngpui a chhe ve tho a, thih phah pawh an awm nia sawiin, Mizoramah chuan kawng chhiat vanga thi an la awm lo niin a sawi.

MPCC President chuan, NLUP-in a tum ber chu kut hnathawkte leh mi chhumchhia, hmeithai leh pachhiate chawikan a nih thu sawiin, Isua lamṭang a nih avangin a hlawhtling chho zel niin a sawi a; NLUP chu mamawh an awm chhung chuan an sem zel dawn thu a sawi bawk.

Lal Thanhawla chuan, Congress party a sorkar leh theihna turin Mizoram politics a insingsa mek tih sawiin, "Sorkar leh turin Pathianin min buatsaih a, chumi tichhe theitu chu keimahni chhungkuaa mi kan ni a, rinawm takin, tichhe lo turin i ṭang ang u. Tumah vuivai mai lo a, ka hun a la thleng lo a ni tia awm chu mi tak tak tih dan tur a ni," tiin an party mite a fuih.

Thenzawla Congress Joint Block Conference-ah hian resolution pali an pass a; an resolution-ah chuan, kum 2018-a Assembly inthlanah Congress pary aṭanga Serchhip biala ding turin Lal Thanhawla bawk an duh thu an tarlang. Con­ference-ah hian MPCC president Lal Than­hawla'n Congress party zawm thar mi 163 a lawm lût nia thu dawn a ni.