Vawiin chawhma khan Convention Centre, Lunglei-ah District Child Protection Unit buatsaihin Childrens’ Day lawmna programme neih a ni a. Lunglei DC Pi Lalzarmawii, IAS chuan khuallian niin a hmanpui.
Pi Lalzarmawii chuan Lunglei District Child Protection Unit ten Naupangte Ni pualin programme ropui tak an buatsaih chu lawmawm a tih thu sawiin naupangte dikna chanvo humhalh kawnga nasa taka hna an thawh thin avangin an fakawm takzet a ni, a ti a. Naupangte chu nakin lawka kan ram leh hnam hruaitu tur an nih avangin uluk leh thiam taka kan enkawl chhoh a tul a ni tiin nu leh pa ten hemi kawnga kan mawhphurhna a san zia kan hriat nawn leh fo a tul a ni, a ti a. Naupang kalkhawmte te hnenah fuihna thu sawiin Lunglei DC chuan “Mahni inrintawkna thinlung nen rilru nei takin lehkha zir ula, in hotute thu in ngaih pawimawh a tul a ni ” tiin hmathlir eng tak nei turin a chah a. Naupangte hamthatna kawnga hnathawk turin a inhawng reng a ni tiin Pi Lalzarmawii chuan hemi kawnga hmalak tul te inthlahrung hauh lova a hnena thlen thin turin kalkhawmte a ngen bawk.
Hemi huna thu sawitu dang Pi Lalrinkimi Hmar, DCPO Lunglei chuan programme buatsaih tura an inpuahchah dan tlangpui leh an Department hmalakna hrang hrang sawifiahna hun a hmang a. Mizoram District hrang hrangah Childrens Day pualin District Child Protection Unit te buatsaihin programme hman a nih thu a sawi bawk.
Vawiin programme ah hian a kaihhnawih sawrkar Department hotute bakah Child Welfare Committee, Special Juvenile Police Unit leh Juvenile Justice Board member te an tel a. Lunglei khawpui leh a chheh vel a home panga (5) – KK Home, Bethel Centre, Shelter Home, Observation Home leh Baptist Church Orphanage a Supervisor te leh naupang thahnem tak an kalkhawm a, programme hlimawm tak an hmang ho a ni.-Dipr Mizoram
Post a Comment