Mizoram sorkara cabinet minister hlui, Col. Lalchungnunga Sailo (79), MPC senior vice president chu November 10, 2017 zanlai pelh hnu, dar 12:15 a.m. khan New Life Hospital-ah a thi a, Inrinni khan vui a ni.
Col. Lalchungnunga hi Lunglei district-a Sertlangpuiah September 15, 1938-ah a piang a, Mizoramah pawl 6 thleng a zir hnuah Shillong-ah zir chhunzawmin, kum 1961-ah St. Anthony's College aṭangin B.A a zo. Kum 1962-ah Union Public Service Commission buatsaih sipai officer laknaah inziak tlingin, Indian Military Academy, Dehradun-ah a training a, Mizote zinga UPSC laka sipai officer hmasa ber a ni.
Kum 1963-a commission officer a nih hnuah India ram hmun hrang hrang - Jammu & Kashmir, Sikkim, Karnataka, Meghalaya, Tamil Nadu, Uttar Pradesh leh Nagaland-ahte a awm a; sipaia a ṭan chhungin huaisen chawimawina, Sena Medal a dawng. Kum 1985-a colonel-a a kaisang hnuah Shillong-a Assam Regiment Centre-ah a awm a, kum 1994-ah a pension a ni.
Col. Lalchungnunga hian sipai aṭanga a chhuah hnuah MPC party a zawm a, kum 1998-a Mizoram Assembly inthlannaah Aizawl West-I bial aṭangin MPC ticket-in MLA atan thlan tlin a ni a; kum 1998-a MNF leh MPC-in sorkar inṭawm an siamah cabinet minister a ni a, Social Welfare leh Labour & Employment department-te a enkawl. Mizoram Ex-Service League leh Mizo Chief Council-ah president a ni tawh bawk.
Col. Lalchungnunga Sailo hian a nupui Lalrammawii leh an fate pathum leh tu panga a kalsan a; Inrinni khan Zarkawta an inah vui a ni a, sipai chawimawina nen thlah a ni. -Vanglaini
Post a Comment