Mizo tleirawl hockey khel thiam Lalremsiami chuan Asian Cup khelh zawh takah India chu champion nomawi a chawipui. Pathianni khan Kakamigahara, Japan-ah final khelh niin India hian penalty shoot out-ah China 5-4 in an hneh. India hi nakkuma khelh tur Hockey World Cup atan an tling nghal.

India leh China te hi hun pangngaiah 1-1 in an inhnehtawk a, penalty hmanga chak zawk zawn niin India goalkeeper Savita Punia chuan Chinese nula vuak a dan sak bakah Indian skipper Rani Rampal chuan chakna goal a khung a ni. 

Asian ranking-ah India hi palina niin world ranking-ah chuan 12-na an ni a, final-a an hneh tak China hi Asian ram zinga chuan ranking sang ber (8) an ni thung. India hian final an luh theih nan hian inelna thlengtu leh hockey thiam ram Japan an hneh bawk avangin Asia khawmualpuiah chuan team ṭha ber an ni rih tih a chiang.

Kum 2004 hnua India nulaten Asian Cup an chawi theih nan sulsutu pawimawh coach Harendra Singh chuan, "Tournament ṭantir aṭangin kan khel ṭha nghal em em a, final-ah pawh hlauhthawnna nei loin kan khel. Kan duh leh tum ber nomawi kan chawi a, chumi bakah World Cup kan khelh dawn avangin lawmna tur hlir a ni," tiin a sawi.

Mizo tleirawl

Kumin Asian Cup-ah hian Kolasib tleirawl duhawm Siami hian inkhel zawng zawngah bul ṭanin a inlan kim vek a, goal hnih a khung zinga pakhat zawk chu Japan an hneh ṭumin a ni hial; a goal hmasa zawk pawh group match lamah Singapore an hneh ṭumin a khung bawk a ni.

India player pasarih inzir chhuah tawhna Thenzawl Women Hockey Training Centre aṭanga zir chhuak Siami hi a tirah chuan Bangalore lamah India Junior team training zingah a tel; training-na hmuna a chetla hmutu India coach Harendra Singh chuan Siami hi Senior team zinga khel tlakah ngaiin a ko.

Coach berin a thiamzia a hrechiang a, Siami tana hna pawimawh chu rim taka thawh chhunzawm a ni. September thla khan Netherlands-ah test match khel tura hruai a ni a, chumi hnuah player 33 awmna Senior team-ah telh niin Asian Cup khel tur hian player 18 thlan chhuah zingah a tel leh thei a ni.

Siami a lawm

India senior team zinga naupang ber Siami chuan, "Lawmthu sawina tur hlir a ni. Hockey Mizoram, min kaihruai tawh ṭhintu coach hrang hrang, kan senior player leh ka tan ṭhahnem ngai taka min ṭawngṭai puitute chungah ka lawm a, Pathianin ka thawhrimna mal a sawm a ni," tiin Vanglaini a hrilh.

Hmasawn a tum thu sawizuiin Siami chuan, "India tan inlan chhunzawm zel thei turin ka bei zui dawn a, tunah chuan Junior camp lamah ka awm leh rih phawt dawn a, heta ṭang hian hmasawn ka tum. Nakkuma neih tur Hockey World Cup-ah ram aiawha inlan ngei theih nan theihtawp ka chhuah zui ang," tiin a sawi.

Sports and Youth Services (SYS) coach Lalrampari leh Lalroṭhuami (Btei) te kaihhruaina hnuaiah Mizo tleirawl ten hockey huangah hma an sawn chho mek zel a, India tana inlan phak tam tak an chher chhuak tawh. Nikum khan Lalruatfei Hnialum chu Rio Olynmpic-ah a inlan tawh a, tun dinhmunah Siami bakah hian Lalrindiki chu India Junior camp lamah a awm mek bawk a ni. 
-Vanglaini

Post a Comment

Powered by Blogger.