Chief Minister Pu Lal Thanhawla chuan nimin (28.11.2017) tlai dar 5:00 PM khan Germany Sorkar hmalakna “International Climate Initiative (IKI) - Biodiversity and Ecosystem Services in Agrarian Landscapes" chu Advanced Research Centre for Bamboo and Rattan (ARCBR), Bethlehem Vengthlang, Aizawl ah a tlangzarh. He hmalakna hi Germany Sorkar-in khawvel sik leh sa danglam nasa lutuk tiziaawm tura Deutsche Gesellschaft für Internationale Zusammenarbeit (GIZ) kaltlanga a hmalakna niin, khawvel ram pathum – India, Kenya leh Tajikistan ah te kalpui a ni a India hmarchhak bikah chuan GIZ hian Ministry of DoNER nen thawkdunin, state pathum - Meghalaya, Mizoram leh Nagaland te chu thlan an ni.
Chief Minister chuan International Climate Initiative (IKI) hmalakna Mizorama kalpui a ni tur chu lawmawm a tih thu sawiin, GIZ leh DoNER mithiamte nen thawhhona tha tak an neih a beisei thu leh, chu thawhhona atang chuan Mizoramin agriculture lamah hma a sawn phah ngei a beisei thu a sawi a. Sik leh sa inthlak nasa in nunphung a khawih danglam dan te Chief Minister chuan sawiin, Mizoramah pawh kumin chhung ringawt a lo nei a eizawngten ruahtui tlak hma avanga harsatna an tawh thu te a tarlang a. Kuthnathawktuten hmasawnna ruhrel tha an mamawhna te sawi bawkin, buh leh bal dehchhuah kawngah tunlai thiamna hman satliah mai nilovin, hmasawnna tluantling, ramngaw leh ramsa tichereu lo zawnga hmalakna chu ngaihpawimawh a tul thu te, tuna GIZ leh DoNER tangkawpin an hmalakna thar chu hemi mil a nih avangin lawmawm a tih thu a sawi a. Mizoram sorkarin NLUP kaltlanga kuthnathawktu enemaw zat a lo chawikan tawh thu leh tunah NEDP hnuaia hmalaknate a sawi a. Mizo zingah pawh environment humhalh phur tak tak leh ngai pawimawh tak tak an tam avangin he IKI project hian rah tha a chhuah ngei a beisei thu a sawi a ni.
Biodiversity and Ecosystem Services in Agrarian Landscapes tlangzarhna inkhawmah hian Pu Lalram Thanga, PCCF chuan kalkhawmte lawmna thu a sawi a. IKI Project chungchang hi Dr. Joerg Lohmann, IKI Project Director, GIZ hnen atangin ngaihthlak niin, he hmalakna hi khawvel pum huap a kalpui a nih thu leh, Mizorama tlangram lo neih dan (jhum) chu an ngaihven hle thu te, a thalo lai paih a kalpui chhunzawm a nih theih dan te zir an duh thu a sawi a ni. Dr. Peter Gross, CCA NER Project Director, GIZ chuan India marchhak state a hmalak tawhna leh hmachhawp te sawi bawkin, Mizoram nen thawhhona tha tak an neih ngei a beisei thu a sawi bawk a. Pu SN Pradhan, Jt. Secretary, Ministry of DoNER hnen atangin thusawi ngaihthlak a ni bawk a. Hun hi Pu Lalthangliana Murray, CCF chuan lawmthu sawiin a khar a ni.
Nizan programme ah hian GIZ leh DoNER atang bakah Tajikistan ram a IKI hmalakna kalpuitu thenkhat te an tel bawk a ni. GIZ leh DoNER aiawhte hian vawiin khan Reiek RD Block chhunga tlangram lo neih thenkhat te a hmunah an en bawk a ni.-DIPR Mizoram
Post a Comment