Sorkar laipuia Ministry of Commerce & Industries hnuaia Jt. Director General of Foreign Trade leh Mizoram sorkar hnuaia Department of Commerce & Industries bultuma Indian Chamber of Commerce (ICC) leh Export Import (EXIM) Bank of India ten an buatsaih ICC-EXIM Summit (Energizing Entrepreneurship for International Trade) chu vawiin khan Aijal Club-ah neih a ni a, Pu H.Rohluna, Minister, Commerce & Industries Dept. chuan a hmanpui.

Pu H.Rohluna chuan Mizoram chu khawchhak ram nena insumdawn tawnna kalpui turin hmun rem takah a awm a ni tiin, hei hi kan hman tangkai thiam chuan ramin hma a sawn phah hle dawn a ni a ti a. Kaladan Multi Modal Transit Transport Project hnuaia Mizoram chhim lam atanga Myanmar nena inkalpawhna tur siam mek pawh kan ram lam atanga thawh tur zawh thawkhat a ni tawh a ni a ti. Minister chuan entrepreneur te tihhmasawnnan Mizoram sorkarin NEDP hnuaiah hmalakna hrang hrang a kalpui a ni a ti a. Mizoram chu Agriculture leh Horticulture-ah theihna tam tak a nei a, hemi tihmasawn leh kan tharchhuah te thawnchhuak thei tura hma kan lak zel a tul a ni tiin, hemi atana ICC-EXIM submit buatsaih a ni chu lawmawm a tih thu leh entrepreneur ten an hlawkpui ngei a beisei thu a sawi bawk.

North-East state te chu khawchhak ram nena insumdawn tawnna atan kawtkai pawimawh ber a nih avangin hei hi entrepreneur ten an hman tangkai a an hlawkpui theih nan ICC-EXIM summit hi buatsaih a ni a. Kum 2016 khan Agartala-ah neih tan niin, North-East State hrang hrangah neih tum a ni a, vawiina Aijal Club a neih hi North-East State pathum an tlawhna  a ni.

Vawiin summit-ah hian ramri kana insumdawn tawnna - lakluh leh thawnchhuah chungchanga hriattur pawimawh te, EXIM bank hnuaia hamthatna awmthei leh an hnathawh dan te inzirtirna neih a ni a. Gobindo Chakraborty, Deputy Director General of Foreign Trade; Pu C.Lalbiakthanga, Addl.Director, Commerce & Industries Dept; Jamkhogin Haokip, Asst.Commissioner, Aizawl Custom Division; Alok Bora, Manager, EXIM Bank; Pu Lianchungnunga, General Manager, ZIDCO; Pi R.Lalrodingi, General Manager, DIC leh Ramreisen R.Shimray, Branch Manager, Export Credit Guarantee Corporation of India Ltd. (ECGC) ten zirtirna an pe a ni.

Summit hawnna inkhawmah hian Tappan Chattopdhay, Advisor, ICC in kalkhawm te lawman thu leh summit neih chhan a tarlang a. He hun hi Commerce & Industries Dept. Secretary leh Director ten an hmanpuui bawk. -DIPR Mizoram

Post a Comment

Powered by Blogger.