Governor Lt.Gen. Nirbhay Sharma chuan tun kar chhunga a ni thumna atan nimin khan Aizawl khawpuia hmun hrang hrang a fang leh a; Synod Office, Synod Higher Secondary School, Seventh Day Adventist Hospital leh Gan Sabra-te a tlawh.

Synod Office a tlawhnaah Governor hi Synod moderator Rev. Lalzuithanga leh hruaitu dangte nen an inkâwm a; Larsap chuan, sipaia a ṭan chhungin Mizoram tih loh India ramria state-ahte a awm tawh thu sawiin, "Mizoram chu heng ramria awm state-te zinga hmasawn chak ber pawl a ni a, hei hi kohhran, tlawmngai pawl leh mipui vang a ni," a ti.

Lt.Gen. Nirbhay Sharma chuan, faina, ziak leh chhiar thiam leh thil hrang hrangah Mizoram chu changkâng tawh hle mah se, eng vangin nge India ramah a berte zingah a tel loh tih inzawh a ngaih thu sawiin, "Sorkarin a tih tur ti mah se, mipui pawhin mawhphurhna kan nei ve a, intodelh kawngah kohhran chuan mipui a zirtir thei a ni," a ti a; mahni chauh inen lo a, mi dangte chìn dan ṭha entawn a pawimawh thu a sawi.

Governor hian Synod Higher Secondary School a tlawhnaah, zirlai naupangte chu an tumah chiang turin a chah a; an tuma an chian phawt chuan engmahin a dâl loh tur thu a sawi.

Seventh Day Adventist Hospital a tlawhnaah Larsap hi medical director Dr Eileen Lalrinpuii leh a thawhpuite'n an lo dawngsawng a, damdawi-in hmunhmáte an fankualpui a ni.

Governor chuan, damdawi-ina thawkte inpekna ropui a tih thu sawiin, "Mi dang tana thil ṭha in tih hi Pathian rawngbawlna a ni," a ti a; an hnathawhte tluang taka an chhunzawm theih nan duhsakna a hlan.

Governor chuan Gan Sabra, Zonuam a tlawhnaah naupangte chu thilpek a hlan a, intihhlimna hun a hmanpui a ni.

-Vanglaini

Post a Comment

Powered by Blogger.