UD&PA MINISTER HOVIN MIZORAMA KHAW FAI BER LAWMNA HMANG
![cleanest village in mizoram](https://blogger.googleusercontent.com/img/b/R29vZ2xl/AVvXsEjG8DvBy7ZjifvaSmyOX_WX-j2SHKX3-tjJPkn5vaWJLaLV0T9tMVENh_bOFG6ka4Gjt6uBtzW1E7rlVi4aLIXxgzayo5MASPpnNWhpY5krY6zc6KQt3M5suCkH2KI9BEctbxWmn331JIg/s320/22406388_1631546073542467_6819368772109119223_n.jpg)
![cleanest village in mizoram](https://blogger.googleusercontent.com/img/b/R29vZ2xl/AVvXsEjLSFmxZ65QYx1OaH-CApWBb5plWhEOGeHOHR35nIIKcuWLwVsUDWKHEv8bK7p8epkkcBvbTF7c229idOqQXZX0P84LYRSYEekH0tzg5bMoY4Gy_K1RS-vGDXHc5i2B7BPqu1-eb_QRfZE/s200/22448489_1631545453542529_6553568743212149939_n.jpg)
![cleanest village in mizoram](https://blogger.googleusercontent.com/img/b/R29vZ2xl/AVvXsEh6EyiIMbpLOBH3cvKnSFPDHW7h9tsXha74QS40G6-HL-AYeR0DuDIYlFvkR9qJIUIw-7ZVF5UjBvdDqSOdGpLGQfy6qMFpjf4jVZ0aqkvzb86oKKrNYyJjSGQWhHZllA_7oG9KBwa4JSo/s200/22449940_1631545566875851_2360364458891370315_n.jpg)
![cleanest village in mizoram](https://blogger.googleusercontent.com/img/b/R29vZ2xl/AVvXsEg-o-krHpXcaCtdVGpK-AUrsj5Ou2RKBABgZXXD9Rm68IBEuS9SiC9zfBlQGqepaSUMU98QEbPby24YrAMHsi70CCtopAnxgA-KypQJiI6olugdBM2eQzhHANL_on37CyPbOzPzi8soIww/s200/22489960_1631546156875792_967966872273128227_n.jpg)
Mizoram khaw fai ber inelna, 2017-a lawmman pakhatna hauhtu Biate khua chuan vawiin khan Zialung Comminity Hall, Biateah lawmna hun an hmanga. He hun hi UD&PA Minister Pu Zodintluanga chuan khuallian niin a hmanpuia. Bialtu MLA leh Fisheries Minister nibawk Pi Vanlalawmpuii Chawngthu chu khualzahawm a ni.
Pu Zodintluanga chuan Biate khuain Mizoram puma khaw fai ber nihna a hauh thei chu a lawmpui thu sawiin sawrkar puihna phut miah lova khawtlangin faina kawnga hma a lakna chu a fakawmin a ngaihsanawm hle a ni, a ti a. Faina kawnga Biate khua leh a chheh vel khuate hmalakna chu thil entawntlak tak anih thu a sawi a. Sawrkarin nasa takin faina kawngah hma a lak thu tarlangin Aizawl khawpui chhungah tunhma hman thin garbage trailer thlakin PPP Mode hmangin bawlhhlawh lakkhawm a nih thu a sawi a, faina chu hapta khat chauh a hmang lova kum tluana hman anih theih nan Fai Kum October ni 2, 2017 khan puan a ni a, hemi hian nakum October ni 2, 2018 thleng a awh dawn a ni, a ti a. Innovation India kaltlangin nakum January thla tawp lam hian Faina puala documentary siama inelna siam tura ruahman anih thu sawiin hemi kal tlang hian a tithate chu India Film Festival-a chhuah tura hmalak tum a ni a; hei hian India ram chauh nilo khawvel hmuha faina kawnga Mizoram hmalakna a pho chhuak thei dawn a ni, a ti a. Biate khua chawmtu tur tuilakna Greater Biate Water Supply Scheme pawh chak taka kalpui mek anih thu tarlangin contractor leh department hotute te pawhin an vilin an enzui reng thu a sawi a. UD&PA Minister chuan Biate khawfai lawmpui nan khawtlang hruaitute hnenah Cheng nuai 50 a hlan a, heng bakah hian bawlhhlawh bawm lian 6 leh Faina T-Shirt Sanutation Committee te a hlan tel nghal bawk a ni.
Bialtu MLA Pi Vanlalawmpuii Chawngthu pawhin thu sawiin Biate khaw hlawhtlinna chu khaw mipuite vang a nih thu sawiin sawrkar chuan a tihtur a ti ve mai a ni, a ti a. Biate khua chu khaw inlungrual tak zirna kawnga entawntlak anih thu a sawi a; Biate khua atangin mi hlawhtling leh entawntlak tam tak an chhuak tawh a ni, a ti a. Kalkhawm mipuite chu nun hmang fimkhur tura chahin faina chuan thianghlim taka nun thlengin a huam tel vek thu a sawi a. Nu leh pate tan fate nungchang leh khawsak dan te vila enzui reng hi tihtur pawimawh tak a ni, a ti a. Hrangturzo bialtu MLA chuan a bial chhunga UD&PA hmalakna avanga lawmthu sawiin, Biate khua rangva inchung rawng inang an neih theuh theih nan rawng man tumsak a tum thu a sawi a. A bial mipuite chu faina chhawmnung zela bial fai ber ni thei ngei tura tan la turin a chah nghal bawk a ni.
![izorama Khaw Fai Ber Hauhtu Biate Khua](https://blogger.googleusercontent.com/img/b/R29vZ2xl/AVvXsEjgbLnPtd6v8jF5_LaHYpVZOjZGmOZ_HOj77G7o9YEPl2jOFqfvNfY-rVv5jGw9E51QFHkmOweXmUUVH59j54dOm0V2W-1TsbcF_q_CW1TmCJUiHJWmzWBoiPOd17KMAoiNm2zucXUa_dI/s200/22528079_1631545756875832_7186059531252625025_n.jpg)
Vawiin Fai lawmna programme hi Pu RV Hluna, VCP Biatein a kaihruaia. Pu Zohmingthanga Tlau in kalkhawmte inhmelhriattirna a nei a. Pu C.Lalrinliana, Secretary, VC-in kalkhawmte lawmna thu a sawi a. Mal zai, zaipawl, recitation te ngaihthlak a ni a. Pu Vanlalmawia, Jt Secretary,UD&PA pawhin thu a sawi a. Biate khaw chhunga Faia inelna result puanna leh lawmman semna hun neih a ni bawk. Veng faiber chu Bethel Veng a ni a, School faiber chu Presbyterian English Medium School niin Restaurant fai ber chu LDT Stall a ni.
He hunah hian UD&PA, PHE lama hotute, sawkar official leh khawtlang mipui thahnem tak an tel a ni. -DIPR Mizoram
Post a Comment