- LR Pachuau -

     Awmze neia ‘Ri’ (sound) chhuak tawh phawt chu ‘music’ (rimawi) a ni, tiin hrilhfiah a ni thin a. A huang a zau khawp mai. Khuang kan vua a, kan zai a, tingtang kan tum a, kan vaw ri bwk a, tin, thil engpawhin awmze nei leh kalhmang fel tak neia ‘ri’ a chhuah tawh phawt chu ‘music’ chuan a huam thei ta vek mai a ni. Chuti a nih chuan mihring nunah hian music chuan a tha zawng emaw, a chhe zawngin emaw hna a thawk thei dawn tihna a lo ni! Music huangchhung atangin kristiante tan Rock Music hi luhchilh a rem lo e, setana hmanrua a ni tih thu-ah ngaihdan a phir thin hle a nih kha! Hnamtin hian hnambil music hi kan lo nei theuh awm a sin. Khawvel mihringte hian hma kan sawn zel angin rimawi pawh chuan hma a sawn ve zel tih erawh a lang reng a ni.

    Kohhran huangchhung atanga rimawi kan hmelhriat tlanglawn te han bihkual thuak thuak ila a tha awm e. Kohhran mipuite kan tel vek theihna chu Pathian biak inkhawma kan zaiho hi a ni phawt mai a. Chutah chuan khuangpu pahnih, hla hriltu pakhat, tin keyboard kan hmang tangkai hle tawh bawk a. Heng kan sawite hi nuam ti taka kan zaiho theihna tura dinhmun pawimawh taka awm te an ni....

    Zaipawl (Choir/Chorus) han tih chuan zaia rawngbawltute ti ila a chiang ber awm e. Kohhran hunruat pawimawhah zaipawl zai ngaihthlak tur a awmloh chuan a kimlo riauin kan hre tawh a nih hi. Conductor, Convener/Director leh member-te infinkhawm chuan ‘Zaipawl’ a siam ti mai ila a fiah tho awm e. Chutah member te chu Soprano (S), Alto (A), Tenor (T), Bass (B) ti tein thliarhran an ni leh a. SATB tiin an sawi mai. SA hi hmeichhe sak niin TB hi mipa sak tur a ni ve thung.

    Soprano (S) chu hmeichhe aw in music note a sak theih sangber hi a ni mai a. Music composer te chuan chi hrang hrangin an thensawm leh teuh mai. Alto (A) hi contralto tiin kan hre bawk a. Hmeichhe aw laihawl bass part nena inzul tak a ni a, a thum tur erawh a ni hauh lo a, a rik dan tur hi man fuh a ngai khawp mai. Tenor (T) hi mipa sak tur niin mipa aw tlin theih sangber a ni. Bass (B) hi mipa sak tur niin mipa aw in a tlin theih hniam ber a ni. Soprano hi leading part ti ta i la, a dang te hi a pawlhmawitu an ni a tih theih ang. Amaherawhchu, zaipawl ni tur chuan SATB hi a awm kim vek a ngai a ni.

    Zaipawl ti-zaipawl-tu ber chu sol-fa a ni ti mai i la a sual tam lovang, sol-fa note hmanga zai thin a nih avangin. Conductor te an hah thinna em em pakhat chu memberten sol-fa kan nello leh kan thiam tha tawklo hi a ni fo! Memberten zaipawl conductor chu music instructor a nilo tih hria i la, chutih rual chuan sol-fa chungchanga memberte harsatna sutkianpui chu a tihtur a ni thung ang. Memberten sol-fa kan manfuh tawk loh avanga tihsual hlau reng renga kan zai hi a tam awm a sin.

    Double Chorus hi zaipawl sak mi tho memberte pawh tam tham deuh ngai a ni a. Music composer thiam tak chuan SSAATTBB tia then hrangin hla an siam thin a ni. Tichuan, zaipawl hlawm hnih hlawm thum awmin a rualin hla pakhat chu music/note hrang siin sak theih a ni dawn tihna a ni.

    Solo - Solo chu mi pakhat (mipa/hmeichhia) sak tura music remkhawm hi a ni mai a, chung hmanga hla satute chu soloist an ni. Music kalphung a zirin hei pawh hi thensawm a ni leh nual mai. Duet - Hei hi mi pahnih inkawpa sak tura music duan a ni. SATB form a awm ve tawh lo. Trio - Hei hi mi pathum inkawp sak theih tura music remkhawm a ni. Quartet -Mi pali sak theih tura music remkhawm a ni.

    Group Singing - A hmasaberin member pali chauh awmna zai chu group singing a tling lo a ni tih hriattur, quartet tih mai zawk tur a ni. Member 5-8 awmna zai hi group singing ti ila a fiah mai awm e. Tunlaiah zaipawl leh group singing hi kan sawipawlh ta nawk nawk mai. Member 10 pawh tlinglo te hi zaipawl kan ti ta zel mai!

    Music zirmite tih dan ah chuan male voice (group singing) ah chuan SATB form hmang tawh lovin TTBB - Counter Tenor, Tenor, Baritone leh Bass angin an sawi thin a. Mipa aw a nih dawn avangin tenor aia sanga music an siam chu counter tenor an ti mai a, tenor part pahnih a awm tihna a ni. Mipa aw tlanglawn ber bass leh tenor inkara awm turin music an siam a, chu chu Baritone a ni.

    Female voice (group singing) Hmeichhe aw hi hlawm lian tak chi thumah then hran an ni a - Soprano, Mezzo-soprano, Contralto tiin. Mipa angin bass a awm ve tawh lo. Heng chi thum hmang hian hmeichhe sak tur music remkhawm a ni thin a ni. Music-ah chuan hmeichhe aw bika a sangber chu soprano a ni tih kan hria a, contralto pawh hmeichhe aw bika a hniam theih ber a ni tih kan hre bawk a. Soprano leh contralto inkarah hian hmeichhe awin a sak tur music note an siam leh a, chu chu Mezzo-soprano an ti a ni.

    Hengte hi a tlangpui an ni mai a. Zaipawl a ni emaw, music term ah chuan thensawm a la tam em em a ni. A tawp berah chuan music lama hma kan sawnna tur rahbi pawimawh tak pakhat chu sol-fa kan thiam hi a ni e!

Post a Comment

Powered by Blogger.