Dt.13-11-2017 ZNP OFFICE
MY POLITICAL TESTIMONY
Kan hriat angin kan rama political party hmasa ber chu Mizo Union a ni a. A policy langsar ber chu "Lal ban" a nih avangin, mahni leh mahni inbeihna leh inhuatnain Mizote hian politics bul kan tan a ni. Chu chu kan political system ah intuh nghet zelin, hnam dang tih dan entawn tlak loh tak tak te thlengin kan ching chho ve ta zel a. Mi mal insawichhiatna leh tlin lohna lai in hmuhsak tum reng rengin, chutiang remchang dap chuan kan hmanhlel a, a vehin kan inveh ta reng mai a. Ram siam thatna tur hmun chu indona leh hmelma siamna hmunah kan chantir a ni ta ber mai. Ringtu kan nihna hi kan politics ah hian a lang hleithei ta lo.Politician chu mi bum hmang, dawt sawi thiam, tlinna tur a nih chuan engmah pawisak nei lo, mi dangte sawichhe thiam ni tura ngaihna a len tak em avangin, mi tha tam tak leh Kohhrana in hmang tak te phei chuan tel vena tlakah an ngaih loh phah a. Chu chu ram tan hlohna nasa tak a ni.
Ka politics zin kawng ka han bih let hian, mi dangte sawisel thiam leh hrat tak, an thil tih that pawh fak thei lo, an chet chhiatna lam erawh sawi nuam ti tak mi ka ni thin tih ka inhmu a. Chu chuan tun hnai deuh atang khan ka thlarau a tina a, ka nun hi a hahdam thei ta tlat lo. Hruaitu kan lo neih tawh thinte kha a hun lai mil zela Pathian min pekte an ni tih pawm duh loin ka lo bei chiam thin a. Thil sual leh dik lo chu huai takin kan doin kan sawi zel tur chu a ni tehmeuh mai a. Mahse Pathian thu chuan, "Tu sual pawh sualin thungrul suh u.....in phuba la suh ula, Pathian thinurna kian zawk rawh u, phuba reng reng keima lak tur a ni, keiman ka thungrul ang" (Rome 12:17-19) a lo ti tlat mai. Kan hruaitute hian an lo tisual a nih pawhin, an chunga roreltu tur chu keini ni loin Pathian kuta dah mai tur a lo ni zawk tih te, thil tha ti tur chuan kan hmanrua pawh a tha tur a ni tih te Pathian Thlarau zarah ka lo hrethiam ve ta a ni."A theih phawt chuan nangmahni lam tal, mi zawng zawng nen inremin awm rawh u" (Rome 12:18) tih thu leh "Mi tinin inngaitlawm takin, mahni aiin mi dang tha zawkah ruat theuh rawh se" (Phil.2:3) tih thute hi a sengluhna tur ber chu politics field a nih tehlul nen, mahni pawh engmah ni bik si lo va mi dang ka lo sawisel nasat thinzia te ka ngaihtuah a, mihring pawi chauh ni loin Pathian pawi pawh ka lo khawih nasa hle tih hriattir ka ni a. Chuvangin, vawiinah hian, ka tih theih chhun chu, Pathian lakah leh an rilru ka lo tihnat sak zawng zawngte laka ngaihdam dil hi a ni.
A bikin MNF leh Congress hruaitute leh an mipuite hnenah ngaihdam ka dil a. Zoram mipuite pawh ngaihdam ka tulna apianga min ngaidam turin ka ngen bawk a ni."Mi, a awm danin Lalpa a tihlawm chuan, a hmelma nen lam inremin a awmtir thin" (Tf 16:7) tih thu hi, Pathian chakna rinchhanin, vawiin atang hian ka nun kaihruaitu atana hmang turin thutlukna ka siam ta a, ka lawmin ka hahdam a ni. Party tin hian khakna te, inhuatna te, in itsikna te tel loin kan ram rawng hi bawl tlang dial dial ila, kan ram hi a dam ngei ang. In tawngtainaah min dilpui zel turin ka ngen a che u."
Ka lawm e.
Post a Comment