-Dr. C. Lalhrekima
Rilru hrisel kan neih theih nan, ni tin nuna kan inzir theih dan tur tlem han tar lang ila. Sawi kim tak tak sen erawh a ni lo ang.1) Taksa hriselna ngaihpawimawh tur: Taksa leh rilru hi a inzawm tlat. Taksa in fit zek zawkte rilru hi a hrisel duh bik. Rilru helhkam ngah leh harsatna nei ten taksa natna an nei duh bawk. Taksa insawizawi hi uar tur a ni. Insawizawi hian chuap leh lungte a tihchak bakah endorphin an tih mai, kan rilru tizangkhai thei leh min tiphur thei chemical chu thluak a\angin a siam chhuak thei. Lungngaihna, lungkham leh hlauhthawn bakah nun nguina hnehna \ha tak chu insawizawi hi a ni. Kawt kaia motor dah, tawite kalna turah pawh scooty ken tum zel, \hu chunga hnathawk, zing mu rei \hin ho hi kan insawizawi tlem khawp. Ni khatah darkar chanve tal insawizawi a \ha. A hranpaa hun kan nei lo a nih pawhin lirthei tel loa kal phak chinah tal hian kea kal tum hram ila. Inkhawm kawng leh kan len velnaahte hian pen hnelh hnelh lo hian kal chak ve tur a ni.
2) Hna thawh tur: Hnathawh hi rilruin a ngeih. Thawkchhuak nun, nun \angkai apiang an hlim. Mi tih sa, mi thawh sa rin ringawt hian rilru a hlim thei lo. Nula tlangval lehkhazir tawh lo, hnathawh tur hre mai si lo tan inhlawhna tur a awm. Mi in saa inhlawhfak te, mi awmpuia \an te hreh lem tur a ni lo. Singapore ah chauh mi ina awm duh, Mizorama mi awmpui nih zah leh tlat si te hi a fel lo. Tih tur dang kan ti hreh a nih pawhin awmpui nei hian ban ila, kan awmpuite thawh ang kha keimahni inah thawk mai ila, hna kan nei ve a ni mai alawm! Hlawh kan nei ve a ni mai alawm! Kan hlim zawk dawn bawk si.
3) Hahchawlh ve tur: Mut \hat tur. Mut hi kan chakna lak tharna a ni. Hah taka thawh reng hi a hahthlak ve a nia. Ei leh in tih\hat tur. Ei tur leh in tur hrisel hi kan rilru leh taksain a mamawh. ““Ni lum ai tam rawh : Ni eng hian rilru a tithawveng a, min tihlim thei. Thlasik ni tawi laia Depression nei chite zuk awm a! A hranpaa nia i inpho hman lo a nih pawhin insawizawi pahin, hnatlan pahin, huan a kal pahin, feh pahin nilum a ai pah theih.
4)Rui suh: Zu, ruihtheih thil dang leh mei zial zukte hian thluak an khawih chhia a, thluak hi rilru awmna a nih avangin rilru a tichhe thei.
5)Hriatna panga duat rawh: Kan hriatna panga – mit, beng, lei, vun leh hnarte hi duat tur. Hmuhnawm i tih te, ngaihnawm i tih te, tui i tih te, nuam i tih te, rimtui i tihte hi ngaipawimawh ve rawh. Heng kan hriatna ho hi an hah ve thei, an duhzawng khilai ve tur a ni. Mahse rilru kaihruai \ha thei lam ni hram se! Ka mitin blue film a enchak, kan khilai teh ang tih lam zawng rilru hrisel lohna bul a ni zawk!
6)|angkai ve rawh: Hlawh hmuh nan kher loa hnathawh hian kan thinlung a hlim a, rilru a nuam a, kan inchhuang ru \hin. Chu chu kan rilru hian a ngeih. Mi dang tan \angkai la. Hnatlang, khawtlang thil, kohhranah inhmang ve la. Mi \anpui hi rilru hian a ngeih. I hlimpui tur thil tih ching ve la. Nuam tih avang liau liaua thil tih hi a \ha ve. Hahdam hun insiam ve la. Infiam hun insiam ve rawh. Engto nei hauh loa hun thawl neih ve zeuh zeuh hi rilruin a ngeih.
7)Lawmna tur zawng rawh: Thil lawmawm i tawnte ngaihtuah tam la. Mi sualna te, thil dik lo te, lungngaihna lam te aiin mi \hatna te, thil \ha te, lawmna tur lam ngaihtuah hi ‘practice’ la, zir theih a ni. Hawi vel la, lawmna tur a tam lutuk. Lawm lohna tur ringawt ngaihtuah hi a awl viau. Ngaihtuahna chhe zawk a lo luh veleh ngaihtuah dan \ha zawk a awm em tiin thlir dan dang zawn tur a ni. Thil thlir zau rawh. A hrehawm leh nuam lo ngawt thlir chuan nun hi a hahthlak. ‘Min tihlumtu a nih loh chuan min tichaktu a ni,’ tih thufing pakhat a awm. Harsatna te, buaina te kan tawh hian, kan thihpui a nih si loh chuan nakin zela min tichaktu a lo ni ngei \hin.
8) |hian kawm rawh: Ina tawm reng a, mahni pindan a\anga tihfel mai theih hi a tam khawp. Tunlai phei chuan bazar kal ngai lo in on-line in thil tam tak a chah theih a, mahni bed room a\angin nula a rim theih ta. Mahse rilru hrisel tur chuan a taka mi bula awm a, titi a, nuih ho te a \ha. Computer leh phone ringawta \hian kawm loin, hmaichhanah \hian kawm ang che.
9)Titi ve rawh: Chhungkaw chaw ei lai ten \awng ve la, nuihzate siam ve la, nui ve bawk bawk la. Chaw ei khamah chhungte bualahte \hu vein I thil tawnte sawi ve siam siam rawh. I harsatnate mi dang hrilh hreh lo la. In titi dun avanga thil \ha zawk chhuak hluai tur a awm loh pawhin rilru insawithawl ve hrim hrim hian min chhawk thei.
10) Engkim i ti thei lo tih pawm teh: I tih theih piah lam tih hram tum suh. I tlin bak thawk kher suh. Engkim hi kan chingfel vek thei lo. Kan theih loh na na na vei tlatte hi a sawt lo. Lungkham nei lo tura Isua zirtirte kan ni. Tunge lungkham avanga mahni dung lam tawng khata tisei thei awm?
11) Ngaidam rawh: Khawvel famkim lova cheng kan nih miau avangin tihsual chang a awm thei. Mi dang ngaihdam hi zir la, mi kan ngaidam hian kan dam! Kan ngaihdamte an dam! Pathianin min ngaidam bawk!
12) Fiamthute thawh ve teh: Tak ngul reng mai, muk run reng hi a hahthlak. Pumpui na a chhuak duh! Fiamthu ve la, uang ve la, hoh nite pawh nei ve teh. Mi fiamthuahte nui ve la. Inti engemaw taka fiamthu engemaw deuh hlek haw zel, nui \ha duh lo, whatsapp velah pawh mi dang khap tum hramte hi rilru te zia a ni. Fiamthu \ha lo sawi ve rawh tihna erawh a ni lo. I rilru zau ve rawh se tihna mai a ni e.
14) Tanpuina zawng hreh suh: Kan ram dinhmun leh kan rilru puthmang tlangpui han thlir hian hmasawnna tur kan nei. Rilru lamah harsatna kan nei a nih chuan \anpuina kan zawng hreh tur a ni lo. |anpuina mamawh lo mihring kan awm lo a, \anpuina dik hian min chhanchhuak thei si. Khawvela mi thiam kan tihte hnena kan kal duh lo a nih pawhin rilru lam daktawr ropui ber, mi dang hriat hauh lova tupaw’n kan pan theih Psychiatrist ropui ber Lal Isua a awm. Kan manganna leh lungngaihna zawng zawng a hnen thlen turin min sawm a ni.
Post a Comment