Vawiin chawhma dar 10:00 khan Government High School Hnahthial kum 50-na Golden Jubilee chu Ropuiliani Hall-ah ropui taka lawm a ni a, he hun hi bialtu MLA Pu John Siamkunga, Chairman, Mizoram State Law Commission chuan khuallian niin a hmanpui a, Golden Jubilee puala Souvenir buatsaih a tlangzarh nghal a ni.

He hun Pu C. Laldintluanga, Chairman Golden Jubilee Celebration Committee kaihhruaiah hian thu sawiin khuallian Pu John Siamkunga chuan Govt. High School Hnahthial hian result tha tak tak a nei tawh thin a, he school atang hian kum hrang hrangah zirlai top 10 a lang mi 10 lai an awm tawh a, an chhuanawm tak zet a ni, a ti a. Pu John Siamkunga  chuan zirna hi a pawimawh tak zet a, zirna tel lovin mihringte hian hma kan sawn thei lova, exam na a result leh zirlaibu ringawt hi a pawimawh ber lo tih kan hriat a tul a, zirna hian mihring chu hman tlakin a chher chhuak tur a ni a, mihring hman tlaka kan chher chhuah loh chuan a hlawhtlinna a famkim lo thin a ni, a ti.

Jubilee lawmnaah hian he Schoola zirtirtu thawk tawh a, HSLC top 10-a langte chawimawina hun an hmang a, zirlai hlui leh zirtirtu hlui te an kal tha hle a, zaithiam ten zaiin kalkhawmte an awi bawk a, Jubilee ruai an theh bawk a ni.-DIPR Mizoram

Post a Comment

Powered by Blogger.