inkhel chanchinMizoram Premier League Season 6-ah Chhinga Vengin final an thleng tawh a, zanin hian an khingpui tur a hriat dawn. I League champion Aizawl FC hmaah Mizoram Police an ding dawn a, tualchhung football tui tan Lammual pan ngei ngeina tur a ni.

Aizawl FC leh Police hi semifinal first leg-ah 2-2 in an inhnehtawk tawh a, second leg-ah an inhnehtawk nawn a nih chuan penalty shootout hmangin chak zawk an zawng ang. Lammuala inkhelh ṭan hun hi zan dar 7:30 a ni a, ṭhutna ṭha chang duh tan kal hma a finthlak ang.

Police an huaisen

September 21-ah Aizawl FC-in Police hi 6-1 in an sawp a, thla thum em pawh la liam lo mah se he inkhel aṭanga thlirte chu 'hre hlui' tiha chhal theih an ni. Police-in Armed Veng pa Lalbiaksanga Colney an lak hnuah engkim a danglam a, thla hniam tura ngaih tawh Police-in semifinal hial an thleng a, tawp san mai an tum lo.

Lungleiah Police hi anmahni sawp tawhtu Aizawl FC nen 2-2 in an inhnehtawk a, hetiang zat bawk hian semifinal first leg-ah an inhnehtawk. BS-a Colney naute hian F. Lalrinpuia hmangin goal an khung hmasa zawk a, AFC-in goal hnihin chhanglet mah se an buai phah lo, injury time-ah Lalfakzuala hmangin an sut.

Armed Veng tlangval Fakzuala'n goal 10 a khung tawh a, Republic tlangval Valpuia'n goal 9 a khung tawh bawk. Police forward pahniha pakhat zawk chauh pawh hi che ṭha se AFC tlarhnung tan buaina tham a tling a, mual sir lam aṭanga nawr turin Keifang tlangval Lalbiakhlua, Armed Veng tlangval Lalbiakhlua leh Dawrpui tlangval Lalsangbera te an lawm. Midfield laiah best midfielder nominee a tel pha F. Zosangliana an nei a, captain V. Lalṭanpuia hming lam hmaih a thiang lo - Tlungvel tlangval Ṭ-a hi pressure sangah chuan anni tluk an awm lo.

Aizawl FC an phur

AFC-in Police an hmachhawn zawhah Kolkata an pan nghal a, Salt Lake Stadium-ah East Bengal nen 2-2 in an inhnehtawk. Portuguese coach Paulo Meneses chuan, "Kan zin vangin kan dinhmun a chhiat phah lo. East Bengal nena kan result avang hian kan phur zawk a, Police hmachhawn tur hian inrintawkna pawh kan ngah zawk," tiin I League match vanga chhuanlam siam a tum lo.

Police an hmachhawn hunah MPL6-a goal 5 khung tawh Jonathan Lalrawngbawla inhliam vangin a la inlan thei dawn lo mah se East Bengal lama goal hnih khungtu William Lalnunfela'n MPL-ah goal nga tho a khung tawh a, MPL khel turin a dam ṭha bawk. Police tana hriat tur pawimawh erawh AFC goal khungtute hi forward chauh an ni lo, MPL6-ah AFC player 13-in goal an khung tawh a, defender Masih Saighani ringawt pawhin goal li a khung tawh.

AFC hian set piece an hmang thiam a, match hnuhnung pahniha Police leh East Bengal laka an goal khung te hi set piece aṭanga veka lut a ni. Hemi chungchang hi sawiin Police coach BS-a Colney chuan, "Kan inkhelh tawhna kha uluk takin kan ennawn a, AFC defender Masih kan ven dan a dik tawk lo. Kan tihsual nawn loh nan kan inzir uluk hle," tiin Vanglaini a hrilh.

Engtin zel?

Police coach BS-a ngaihdanah chuan an chak loh chhan hi set piece a ni ber a, amaherawhchu Portuguese coach Paulo Meneses ngaihdan a dang. AFC boss Paulo chuan, "Kan chance insiam ang te kha khung ilang chuan second leg hi hahdam takin kan khel thei tawh ang," tiin set piece loah pawh goal khung theihna tur an neih thu a sawi.

MPL6-a goal nawr na ber pahnih an inkhel dawn a, Police hian goal 35 khung tawhin goal AFC hian goal 33 an khung ve tawh bawk. Inkhel hmuhnawmna belhchhahna tur chu an tlarhnung phui lo hi a ni a, hei vang hian loh theih loin team pahnihin attacking game an khelh a ṭul dawn.

Portuguese coach hnuiah Aizawl FC-in player an neih ṭhat tel avangin passing game mawi an khel thei a, Police lamin ball inpe kual thei lo tura dan chah an tum ang. First leg-a khel thei lo Andrei Inonescu dinhmun a la chiang lo a, Romanian midfielder hi a inlan thei a nih chuan Police tlarhnung tan hna a tam sawt ang. 

Engpawh chu ni se team pahnih coach-in 'dinhmun ṭha zawk an awm lo' thu Vanglaini an hrilh ve ve a, an intumna hnuhnung thlirin an intluk tawk a, attacking football hmuhnawm tak Lammualah en tur a awm dawn tih hi tawi fel taka sawi dan chu a ni.

Danglamna thlentu tur mipui?

Aizawl FC-in I League nomawi humhim tumin entu lamah ṭan an la chho zel a, hei hian MPL lamah pawh nghawng a nei ang. RG Stadium-a awmze neia khuang nena au ṭhinte kha Lammualah an insawn lut dawn a, zanin hi Aizawl FC player-te fiahna chauh a ni dawn lo a, AFC ṭantu ruhkawl Red Army fiahna a ni dawn.

Portuguese coach Paulo Meneses chuan, "Kolkata-a ṭantu ṭha tak kan hmuh ang kha Lammualah hmuh ka inbeisei a, minute 90 chhung kan team au phur thei mipui kan mamawh a ni," tiin mipui puihna an mamawh thu a sawi.

I League club khingpui tur Mizoram Police hian veng innghahna tak nei lo mah se ṭantu lam erawh an nei chhe lo a, tam lama AFC ṭantu an el pha lo a nih pawhin thawm neih ring lamah chuan an khum loh pawhin an tluk ang.

Police coach Lalbiaksanga Colney chuan, "Kan player-te an phur a, final thlen ngei duhin an thawkrim a ni. Kan pute pawhin min phur pui a, Lammualah pawh min ṭawiawm ṭha. AFC kan hmachhawn hunah Police ṭantute kan player-te au phur tura rawn thawk chhuak leh turin kan sawm tak meuh meuh a ni,"tiin a sawi. -Vanglaini

Post a Comment

  1. Individuals that have youngsters desire to be ensured that their next-door neighbors are secure to be about as well as that no threat will certainly come to their youngsters in their visibility polk county mugshots.

    ReplyDelete

Powered by Blogger.