Vawiin chawhnu khan District AIDS Prevention and Control Unit (DAPCU), Champhai District buatsaihin Champhai Venglai Community Hall-ah World AIDS Day puala hun hman a ni a. He hunah hian Pu Vanlalngaihsaka IAS, Deputy Commissioner, Champhai District chu khuallian a ni. Kum 1988 atang khan khawvel pumah World AIDS Day hi hman thin a ni a. Kumin thupui atan ‘Increasing impact throught: Transparency, Accountability and Partnerships ( Nihna anga lan ngamna, Mawhphurhna hlen ngam leh thawhhona tha)’ tih chu thlan a ni.
Khuallian Pu Vanlalngaihsaka chuan AIDS natna hian hnam leh ramri kham a neih loh thu sawiin kum 1984 kuma HIV hrik hmuhchuah anih hnuah mi tam takin nunna an chan tawhin vei mek mi tam tak tak an awm a ni, a ti a. AIDS natna darh zau zel tur ven chu khua leh tui tinte mawhphurhna anih thu sawiin nun uluk leh inkaidarh theihnate hriata pumpelh angai a ni, a ti a. A district ang zawng pawha tan lak a hun tawh tak zet thu sawiin AIDS natna chu vawiin chauh ni lovin engtiklai pawha kan doa kan ven reng a ngai a ni, a ti a. He natna hian kan ram min chenchilha kan bul hnaia awm reng anih avang hian a la vei lo ten an kai loh nana tan lak angai a; mipui, khawtlang hruaitu leh sawrkar tanho zel angai a ni, a ti bawk.
CHAMPHAIAH CHANCHINTHAR- WORLD AIDS DAY PUALA HUN HMAN A NI
Vawiin programme-ah hian Dr Vanlalnghaki, CMO Champhai District-in kalkhawmte lawmna thu a sawi a. World AIDS Day thupui (theme) hawnna leh sawi zauna Pi C.Lalruatfeli, District Programme Manager, DAPCU-in a nei a. Dr Samuel Laldinthara, Medical Officer, ART Centre, District Hospital Champhai hnen atangin Champhai District chhunga HIV positive dinhmun tlangpui report ngaihthlak a ni a. Pu Lalthlamuana Ralte, DIS, DAPCU-in lawmthu sawina neiin hun a khar a ni.
AIDS natna hi kum 1986 khan India rama hmasa ber atan Chennai atangin hmuh chhuah a ni a. Mizoramah chuan kum 1990-ah hmuhchhuah niin Champhai District bikah chuan kum 2002 khan hmuhchhuah a ni. Mizoramah chuan August 2017 thleng khan thisen 6,34,201 test tawhah HIV positive 15,633 hmuhchhuah tawh a ni a. Kum 2016-2017 chhungin kai thar 2,048 hmuhchhuah a ni tawh a. Champhai District chhunga inkaichhawnna bulpui ber chu inchiuna Syringe leh hriau thianghlimlo hmanpawlh vang a ni a, hemi vanga kai chu mi za zela 42.86 niin Mizoram pumah chuan za zela 26.16 a ni. Sex atanga inkaichhawn chu za zela 51.02 niin Mizoram pumah za zela 67.69 a ni. Nuin nau chunga a kaichhawn hi tlem tial tialin za zela 4.40 a ni a, a chhan leh vang ber chu tha taka ART an lak thin vang a ni. Heng bakah hian chhan hriat loh atanga kai za zel a 1.73 an awm bawk a ni.
Kum 2011 atanga October 2017 thlenga chhinchhiah danin Champhai District-ah HIV Positive 1,521 an awm a, heng zinga 166 chu nuin nau chunga kaichhawn niin a bak 1,355 chu thil dang vanga kaichhawn (general) an ni. Kumin bikah kai thar 103 awmin heng zinga tam ber hi inchiuna hriau thianghlimlo hman vang a ni. Kum bithliahah chuan kum 25-34 zingah vei thar an tam berin mi 46 an ni a. Mipa bikah kum 25-34 inkar tam berin hmeichhia kum 25-49 inkarah kai thar an tam ber a ni. Mipa zingah hriau thianghlimlo hman pawlh vanga kai an tam ber laiin hmeichhiaah chuan sex vanga kai an tam ber ve thung a ni.
Vawiin World AIDS Day hmanna hunah hian Health department-a thawktu, sawrkar official, Home a thawktu, NGO leh zirlai thahnem tak an tel a ni. -DIPR Mizoram
Post a Comment