Sorkar laipuia Rural Development ministry-in October 1-15, 2017 chhunga Mission Antyodya khuhhawnna, Gram Samridhi Evam Swachhhata Pakhwada hnuaia state-te hmalaknaah hmarchhak state zingah Mizoram chu hma la ṭha ber pawl a ni a; Mizoram bikah Mamit district chu open defecation free (ODF) leh inthiarna (IHHL) siam kawnga hma la ṭha district a ni.
RD secretary Lalhmingthanga sawi danin, Mission Antyodya thil tum chu kum 2022-ah Mizoram khaw thlan bik 183-te chu mirethei zual, below poverty line (BPL) chhungkua awm lohnaa siam tum a ni. RD block leh V/C-ten an hnathawh leh thlalak an thawnna turin application thar, 'Swachhgram apps' siam a ni a, Gram Panchayat Development Plan (GPDP) / baseline survey upload-na turin 'Missionantyodya' apps siam a ni bawk. Mipui hmalakna chungchanga report-te chu www.swachhgram.nic.in ah en theih a ni.
Mission Antyodya bul ṭanna, October 1-15, 2017 chhunga programme neihah mipui leh V/C-te'n sorkar an thlâwp ṭha hle tih sawiin Lalhmingthanga chuan, "Meichher kan chhit tawh hi a mit tawh tur a ni lo. Khaw thlan bik V/C leh BDO-te chu GPDP (plan an siam) anga theihtawp chhuah turin ka ngen a ni," a ti.
RD Secretary chuan, India thar siam turin sorkar laipuiin ṭan a lak thu sawiin, "Ministry of Rural Development pawh an ṭang a, state zawng zawngte video conferencing hmangin kan inpuahchah dan min enpui ṭhin," a ti a; Mizoramah faina chungchang leh hmalakna tura ruahmanna siamte village, block leh district level-a dante RD officer-te'n a hmunah an endik a, hmun hrang hrangah an zin chhuak nasa hle tniin a sawi.
Sanitation National Level report-in a tarlan danin, India rama state 34 aṭangin report thehluh a ni a; hmarchhak state bikah Mizoram chuan faina lama hma la ṭha ber zinga mi a ni. Inthiarna, individual household latrine (IHHL), open defecation free (ODF), soak pit leh changpat leiṭha siam (vermicomposting)-ahte hma a la ṭha hle.
Mizorama khaw 185 chu pawn lama inthiar awm lohna ODF-ah puan a ni tawh a, chhungkaw 2,010-te inthiarna siamsak a ni tawh. Meghalaya chu Mizoram aiin a sang zawk a, ODF-ah khaw 287 puang tawhin, IHHL thar 6,582 an siam tawh a ni. Changpat leiṭha siam chhuah bikah erawh chuan Mizoram pakhatna a ni a, 171 siam a ni tawh. Hetih lai hian, Manipur, Nagaland leh Tripura-te chu report-ah hian ODF leh IHHL-ah 'Nil' tih a ni.
Sanitation State Level report-a a lan danin, Mamit district chu IHHL siam tam ber district a ni a, 1,943 an siam hman. Hetih lai hian, RD department hotute chuan, Mizorama district-te chu RD block an neih zat a inang lo tih an sawi.
Post a Comment