Indian Super League match hmasa pathumah Jeje Lalpekhlua'n khel ṭha tak chungin goal khung a nei lo a, Ningani zanah erawh Mizo tlangval hun a thleng ta - Jeje hian Atletico de Kolkata nen an inkhelah goal hnih a khung a, hun a tawp meuh chuan a team hi 3-2 a hnehna chanpuiin 'Hero of the Match'-ah thlan a ni a, Swift Moment of the Match chawimawina a dawng bawk.
Hnahthial tlangval hian minute 65-naah goal hmahruai a khung a, captain Henrique Sereno-a'n post a pet per chu Jeje ke bulah tak tlain 'The Mizo Sniper' tia hminglem an pek striker tan goal-a chantir turin harsatna a awm lo.
ATK tan Zequinha-a'n an si phurh a sut hnuah Inigo Calderon goal khung hmangin Chennai club-in hma an hruai chhunzawm. Kolkata club tan Njazi Kuqi chuan an si phurh sut leh mah se hun pek belha Mizo tlangval Jeje-a an dang zo lo a, Chennaiyin an chak.
Keane aiah Jeje
Chennai khawpuia club pahnih inhmachhawn hmain Tottenham striker hlui Robbie Keane chu sawi hlawh ber a ni - Liverpool tan pawha lo khel tawh striker hi hliam vanga a inlan theih loh reng hnuah ATK squad-ah telh a ni a, inkhelh a zawh meuha sawi hlawh zawk erawh Jeje a ni.
India international striker chuan, "Goal ka khung avangin ka lawm a, chutihrual chuan team-in hnehna kan chan avangin ka lawm zawk," tiin a mimal hmingṭhatna aia team hlawhtlinna a dah pawimawh thu Vanglaini a hrilh.
AIFF Player of the Year chuan sawi chhunzawmin, "Goal khung lo mah ila ka khelh danah a lawm avangin coach-in ka chungah rinna a nghat tlat a, chu chuan min pui hle. Team training session zawh tawh lamah pawh mahniin finishing practice ka neih chhunzawm ṭhin a, ka vannei ve ta a ni," tiin Vanglaini a hrilh a, a chunga rinna nghattu coach John Gregory rinnain a puih thu a sawi.
Champion inbeisei
Chennaiyin-in match liah vawi thum hnehna changin hma an hruai mek a, Jeje chuan, "Player inhliamte kan awm a nih ngawt loh chuan tuna kan squad-ah hian rinna sang tak ka nei a, Chennaiyin kan ṭhat ber ṭum ni hialin ka hria. Kan coach hian player enkawl a thiam a, player tinte zah takin min dawr a, club boruak pawh a ṭha hle a ni," a ti a, Aston Villa boss hlui Gregory chu player enkawl thiam a nih thu Vanglaini a hrilh.
Ningani zan ISL inkhelah hian Chennaiyin tan Jerry Lalrinzuala a inlan bawk a, Bethlehem rawlthar hian a vawi khat nan mimal lawmman lak a nei lo - mahse, lawmman a lak loh zan pawhin Jerry a khel ṭha tho a, Brighton defender hlui Calderon goal khung kha Jerry siamsak a ni.
Chennaiyin hian Pathianni zan dar 8:00-ah Mumbai City an lenchilh ang a, zanin dar 8:00-ah FC Goa chuan Kerala Blasters an mikhual ang. Pathianni tlai dar 5:30-ah Jamshedpur chuan Pune City an mikhual dawn bawk a ni. -Vanglaini
Post a Comment