~ZR Lalthlanmawia
Mi tam tak chuan a va țul kher lo em kan ti ang a, mi țhenkhat erawh chuan kan ngaihlu viau thei bawk ang. Ni e, ngaihdan leh pawm dan inper san tak tak mihring kan mi miau a, țha ka tih em em pawh ka țhenawm nu/pa in țha a tih ve miau loh chuan ka ngaihdan leh duh dana va hneh tum ngawt chi lah ni bik hek suh.
Kawrtethawveng pa ho Helicopter-a an zin thu chauh han ziah chu a ho thei viau bawk ang. Mahse, an zin dan zawk hi a Special in a ropui danglam a, hetiang ang hi keini ramah hi chuan a vawi khat thlenna pawh a ni hial awm a sin. Pu. Lalrindika Ralte Kawrtethawveng khawchhuak, tuna Aizawl Zarkawt Babu tlanga awm mek chuan Kawrtethawvengkhuaa a pa leh a țhiante tan Helicoter Hire sakin 30th.Nov. 2017 khan Aizawlah hlim takin an thlawk lut a, Pu Lalrindika hian a pa leh a țhiante tan hian zanriah tuihnai tak a lo buatsaih sak bakah a Inah a thlen khawm tir vek bawk a ni.
Pu Rindika te chhungkua hi 17th. October 2017. khan an nu (an mahni hringtu nu) berin Cancer natna avangin a lo kal san tawh a, a pa ni se kum lama upa lam tih takah bawrhsawmna neuh neuhin a tlakbuak ve reng a. Tichuan Pu Rindika hian Zarkawtah In thar a sa ve a, Kawrtethawveng lama a pa țhiante ho chuan Aizawl lama In thar an neihte hmuhpui an chak thu te an sawi a, motor in han zin dawn sela naupan lai ațanga rim taka hnathawk an nih bakah kum upa tak tak te an ni a, tunlai kan ram kawng chhe lutukah insawh chau mai thei, hriselna lamah pawh pan ve tete an ni si a.
Tichuan, Pu Rindika pa chuan a țhianten Aizawla a fapa In thar chu hmuhpui an chak tih thu Pu Rindika chu a han hrilh ta a. Pu Rindika te unau hi an naupan lai ațanga nu leh pa thuawih leh zah tak an ni a, hetia a pa in a țhiante nena a In leh lo thar hmuh an chak thu a han hriattir hian hmanni lawka a nu sun hlim a pa leh a țhiante tan chuan an duh tihhlawhtlin sak ngei tumin hma a la nghal a, chawlkar khat vel inbuatsaihna hun an neih hnuin Kawrtethawveng khua ațangin a pa leh a țhiante chu Helicopter Hire sakin a la chho ta a ni.
Pu Rindika te unau hi mi nuntluang, nu leh pa thu hnial ngai lo an ni a, hei vang hian an eizawnna kawngah an tluangin an hmuingil a, a nu ruang chunga an unau zinga upa ber thusawi phei chu ngaithlatu mipui kal khawmten ropui an ti a, mi tam tak hnuk ulhin an mittui an hru nasa hle nghe nghe a, naupan lai ațanga an nu leh pate rilru na khawpa an siam emaw, an duh loh zawng tih luih emaw an neihawm sawi tur an hriat loh thu a sawi kha a ropuiin mipui tam tak mittui far tirtu a ni hial reng a nih kha.
Tin, Pu Rindika nu pawh khan a hun tawp dawn lamah khan a faten an theih pa tawp chhuaha an enkawlnaah leh hmangaih taka kehthei dawma an dawm avangin lawmthu a sawi chhuak hial a ni. He thuin min kawhhmuh se tia ka rawn ziahna chhan tak zawk chu, nu leh pa thuawih te hi he khawvel an damlai la la hian mi vannei, mi awhawm, mi nuntluang leh hmuingil an ni țhin, kan Pathian thu pawhin damreina a lo ti hial reng a ni. Pu Rindika pa leh a țhiante ho hian Hmuifang tlang an hmuh chak thu an sawi pawh a taka tih hlawhtlin sak an ni a, vawiin 1th.Dec.2017 hian Hmuifang tlangah len khawthawnpui an ni mek bawk a ni.
Post a Comment