Zalen thudawn danin Lengpui airport atanga khualzin lut leh chhuak an tam thin avangin airport-in a dawl theih tura ruahman zat aia tam zin veivak an awm thin a, hemi chingfel tur hian Aviation hotute chuan hma an la mek.
Zalen zawhna chhangin Saidenga, Deputy Controller, Aviation chuan Lengpui Airport chu khualzin mi 300 chhuak leh lo lut mi 300 dawl zo tur a nih laiin a dawl zawh tura ruahman aia tam khualzin veivak an awm thin niin a sawi a. Hei hian khualzin zin chhuak turte leh lo thleng thar te a tih khawtlai thin thu a sawi a. Tun hnaiah Spice Jet an kal rih tak loh avangin a thawl leh deuh tih sawiin tun thlaah hian Air Deccan an lo luh dawn thu leh hei erawh chuan a tihtawt phah lutuk an rin loh thu a sawi bawk.
Lengpui airport atanga zinchhuak thin pakhat chuan airport chu a tawt thin hle niin a sawi a, check in duh hunah a check-in theih lohva rei tak tak nghah a ngai thin niin Zalen a hrilh.
Aviation Deputy Controller chuan airport chu mipui tam zawk an veivah theih nan buatsaih tum mek a nih thu a sawi a. “Tunah hian bul tan vel chauh a ni a, building tihbelh lovin a awm sa chu siksawiin mipui tam zawk dawl thei tura buatsaih tum a ni,” a ti a. PWD architect-ten a ruangam tur duanchhinna an neih mek thu a sawi bawk.
“Thutna tha duhin flight check-in hma tura thlen hian awmzia a nei lo fo thin a, checkin area kan lut thei chuang lova, a sirah tawt takin kan nghah a ngai fo a, kan harsatna hi a len hmain siam that vat a ngai a ni,” tiin khualzin pakhat chuan Zalen a hrilh.
CCTV chung-chang zawhna chhangin Saidenga chuan CCTV chu a la tha lo niin a sawi a, tunah hian buaipui mek niin pawisa ngai zat tur an rawn thehlut niin a sawi a, hmalak mek a nih thu a sawi bawk. -Zalen
Post a Comment