Nimin chawhnu khan Lunglei District Superintendent of Police Pu Lalthafamkima Jongte, MPS hovin a Office Chamber-ah Lunglei khawpui chhunga Bank Manager ten Bank Security chungchang sawihona meeting an nei.
Lunglei SP chuan misual leh rukru ten Lunglei khawpui chhunga Bank branch leh ATM-te an target fo thin chu pawi a tih thu a sawi a. Bank te chu Sawrkar leh mimal sum thahnem tak kawl sak tu an nih avangin Bank Manager ten anmahni Branch theuh himna (security) kawngah nasa lehzualin hma an lak a tul a ni, a ti.
Bank tinin security guard, alarm system, CCTV, leh Police Station hotline an neih theuh a tul a ni tiin Pu Lalthafamkima Jongte chuan amah ngeiin Bank Branch hrang hrang December thla chhungin tlawh kual a tum thu a sawi a. Bank manager thahnem tak meeting-ah an tel thei chu lawmawm a tih thu sawiin Security chungchangah harsatna an tawk anih phawt chuan Police-ten tanpui an inhuam reng thu a hrilh bawk. -DIPR
Post a Comment