Lunglei District-a VC hnathawk tha bera thlan Salem VC ten an lawmman dawn an lawm
Tun hnaia DC Lunglei, LAD & SIRD ten Lunglei District chhunga VC hnathawk tha bera an thlan Salem veng VC te chuan nimin, Dt.15.12.2017 khan an lawman dawn chu a lawmna buatsaihin khawtlang NGO hruaitu leh sawm bik mi engemawzat ten chawhlui an kilho nghal a ni.
He hun hmanpuitu DLAO Lunglei Pu Lalchawimawia chuan Lunglei District huam chhunga RD Block 4 atangin uluk taka thlan a nih thu sawiin, VC hnathawh hrang hrang - khawtlang enkawl dante , Office lama tih tur hrang hrang an bawhzui dante leh tehfung dang kawng dang danga enfiah an nih hnua Salem VC in lawman pakhatna an dawng chu a lawmpui em em a; lawmman dawn chu an phu hle nia a hriat thu a sawi. DLAO hian tualchhung rorelna inenkawl dan chu Sorkar pawhin State dangte nen inangtlang tur leh Sorkar laipui duh dan mila her rem tum mek a nih thu a sawi bakah, LAD changtu minister hmalakna hnuaiah Panchayati Raj kalphung tihlawhtling turin inbuatsaih chhoh mek zel a nih thu a sawi bawk.
Lunglei RD Block atangin BDO, Dr.Malsawmtluanga Fanchun pawhin VC hnathawk tha ber lawmna hun hi hmanpuiin, Salem VC te chu veng dangte tan pawh Model ni zui zel thei tura hmala turin a fuih a. Khawtlang NGO te nen thawhhona boruak tha tak a awm avanga tun dinhmun thleng thei nia a hriat thu sawi langin, Office lama thawktute tan pawh VC te hawiher atang mai pawha khawtlang thawhhona tha hi a lo hriat theih ve thin a ni a ti bawk. Salem VCP Pu Lalramliana pawhin thu sawiin Tuna kan lawmman dawn hi hruaitu hmasa te hlutna tilangtu a ni a. Khawtlanga mawhphurhna neite leh mipuite tawiawmna tha tak avanga dawng thei kan ni a ti.
Tarlan tawh angin 12&13/December 2017 khan Lunglei District huamchhung VC te tana Conference Lungleia buatsaihah VC hnathawk tha lawman hi sem niin, Salem veng Village Council hi VC hnathawk tha ber atan thlan an lo ni tawh a ni.
Posted By: Jeffrey Chhakchhuak
Post a Comment