DECEMBER 18, 2017 (MONDAY) : Mi dangte nunna chhan a tumna lama a nun hlàntu Lungsen tlangval Lalvenpuia, kum 23-a upa chu nimin (Pathianni) chhun dar 12 khan Lungsen Venglaia an chenna inah mittui nen vuiliam a ni.
Inrinni (December 16, 2017) khan Lungsen Venglai branch YMA hnuaia Vanapa section-te chu an khua ațanga km 20 vela hla Belpei khuaah intihlim turin an kal a; picnic tura kal ve tho R. Lalmuanzuala chu an ball ben chhar a tumna lamah chesualin tuiin a lên thla ta a ni.
R. Lalmuanzuala chu amah hmutu Malsawmtluanga'n țanpui tumin a pan nghal a; an inchhan mai theih loh avanga an talbuai zui chu ei rawng bawllai Lalvenpuia hian hmuin, anmahni chhan tumin tuiah a zuang lut ve nghal. Lalmuanzuala zawk chu Lalvenpuia hian a chhan chhuak phawt nia thu dawn a ni.
Hetih laia tuiin a len Malsawmtluanga chu awm hmun siamrem tawh Lalmuanzuala hian maupum nen chhan a tum veleh a; a chhan mai theih loh vanga an pahniha an invai buai lai chu Lalvenpuia hian chhan tumin a pan leh ta a ni. Tui khauhah duh anga an chet tlàn theih loh avangin, tuiin an pathum hian a lên ta niin thudawnna chuan a sawi.
Hemi hnua Lalmuanzuala rawn lángchhuak chu mi dangten an lo man hman bakah, Malsawmtluanga pawh a thlang deuha hnam dang putarin a lo man bawk. A hmangaih, a thiante nunna chhan tuma inbarhlut Lalvenpuia erawh láng chhuak leh ta loin tuiah a pil hlen ta a ni.
Inrinni vêk khan tlawmngaia amah zawngtu Lungsen khaw mipuite leh, an chetsualna bulhnaia miten Lalvenpuia ruang an hmuh hnu-ah, Belpeia missionary-te chenna inah lakluh phawt niin, hemi zan vêk dar 8:30 vel khan Lungsen Venglaia an chenna in thlenpui a ni a; ruang lumenin mi tam tak an tlaivar a ni.
Mi dangte tana a nun hlàntu Lalvenpuia ruang hi nimin (Pathianni) chhun dar 12 khan bialtu pastor Rev. PC Lalrinawma'n a vúi a, vanduai ta Lalvenpuia thih dan runthlak takin mi rilru a khawih avangin mi tam takin mittui nen an thlah liam a ni.
`
Tlabung SDO (C) Pu M. Misael leh, Lungsen BDO Pi V. Lalmuanpuii-te chuan, ruang zawnnaa a țûlna apianga hman atan tangkafai Rs 2000 ve ve an pek bakah, silpaulin hman tur an pe ve ve a; hei bakah hian, MZP Sub-Hqrs. Lungsen vice president Lalvenpuia ruang zawng tur hian Tlabunga MZP Sub-Hqrs. president P. Vanlallawma-hoin member dang eng emaw zat chuan vanduaina thlenna hmun an pan nghal a ni.
Mi tlawmngai leh rilru tluang Venpuia hi tui thiam tak, tia sawi tur ni lo mah se, mahni pil lohna tur khawp chuan a invai kâng thei niin amah hrechiangtute chuan an sawi. Nimahsela, thihna kotlanga dâk mek a thiante thlabar hmel a hmuh hnu-ah, chu tui chu a tan eng tianga țihbaiawm nge tih a hmu ta lo a; a eirawng bawllai tlànsanin a thihna hmun tur tih a hriat loh chu a țhiante tan a pan a ta a ni.
- MI DANGTE TANA NUN HLÀNTU LUNGSEN TLANGVAL LALVENPUIA VÚILIAM -
Posted By:
Post a Comment