Chief Minister Pu Lal Thanhawla chuan Zofate chu Pathian in a siam danglam bik tih sawiin chenna te hrangin tawng hrangte pawh hmang hlawm mahse inbe pawp thei vekin an tawng an in man tlang a; chutiang ang chu hnamdangah a awm ve lo a ti a. Duhlian tawng, a hnua Lusei tawng, a tawpa Mizo tawng lo ni ta phei hi chu Zohnahthlak hnam peng hrang hrangten an hrethiam vek a, tawnghrang ena en loin insuihkhawmna tawng, hnam anga pumkhata insiamna leh inpumkhatna tawngah hman ni se a tha hle ang a ti a. Mizo tih hian Mizoram chhungah pawh Mizo tih chauh tur tumah an awm loh thu sawiin Mizo nihnaah lungrual a pawimawh tih sawiin chu chu Mizoram chhung leh pawnah hnam anga Mizote tizahawm leh tichaktu a ni ang a ti. Chief Minister chuan Hmarchhak state te chu hnam hrang hrang awmna leh tawng thuhmun pawh awm ve loh na a ni a. Chuti chungin Nagaland bikah phei chuan Naga nihna neitu bik pakhatmah an awmlo a; Mahse an state pawnah chuan Naga tihah lakhran theih lohin thukhat an vua a an entawn tlak hle a ni a ti a. Mizoram mipuite pawh, Chief Minister Pu Lal Thanhawla chuan state pawna Zohnahthlak unaute, Mizoram, an Jerusalem anga rawn en thin te chungah that chhuah zual sauh tur leh an tawngdanah te leh an khawsak dan lo danglam deuhte pawh zawldawh taka enturin a chah a ni.
MJA President Pu Vanlalrema Vantawl leh a thawhpui, MJA member ten Chief Minister Pu Lal Thanhawla hi an tawiawm a ni.
Manipur Zohnahthlak Journalist te hi Pu Min Thang Naulak, Tullo Tv News, Pu Lungmuan Langel, Skynet Media, Pu Biakmuan Tonsing, Angel's Vision, Pu B.Lalbai Gange, Eini Times, Pu K.Mung, Hornbill Cable Network, Pu Siembawi Gangte, TC Network leh an hruaitupa Pu Alex L Minthang Guite, The Imphal Free Press te an ni.-DIPR
Post a Comment