December ni 12 a neih tan Mizoram Higher Secondary School Games vawi 16-na chu vawiin khan Govt. Mizo High School Field ah khar a ni a. School Education Secretary Pi Esther Lalruatkimi chu kharna inkhawmah hian khuallian a ni.

MIZORAM HIGHER SECONDARY SCHOOL GAMES A TIAK TA

Pi Esther Lalruatkimi chuan sports chu taksa leh rilru hriselna atana pawimawh, zirlai naupangte inkara inkawmngeihna leh inpumkhatna siam theitu hmanraw tangkai a ni, a ti a. Sports hian dan (rules) a nei a, he dan hnuaia inkhel infiammite chu dik tura beisei an ni a, dikna inzirtirna atana thil tangkai a ni tiin School Games thil tum an hlenchhuak em tih hretu chu a taka tel, zirlai naupangte an ni, a ti.

Kuminah hian sports discipline chi hrang pasarih - athletics, badminton, basketball, football, table tennis, taekwondo leh volleyball te chu Pachhunga University College, Govt. Mizo High School Stadium, Hawla Indoor Stadium, Durtlang leh Republic Veng Field, Mizoram Table Tennis Hall, Electric Veng YMA Hall leh Govt.Mizo High School Field ah te khelh a ni.

MIZORAM HIGHER SECONDARY SCHOOL GAMES A TIAK TA


Higher Secondary School Games-ah hian Aizawl khawpui atangin School 14 leh Aizawl pawn atangin School 12 an tel a. A pumpuiah Govt.Mizo Higher Secondary School chu Champion niin gold 12, silver 9 leh bronze 8 an la a ni. Govt. Republic Higher Secondary School leh Govt. Higher Secondary School, Serchhipte chu pahnihna niin Durtlang Higher Secondary School chu pathumna an ni. Best Athlete (Boys)-ah Abija Lalrindika, Govt.Serchhip Higher Secondary School chu thlan niin CS Remsangpuii, Thenzawl Higher Secondary School chu Best Athlete (girls) atana thlan a ni.

Mizoram Higher Secondary School Games, 2017 kharna inkhawm hi Pu K.Laldingliana, Addl. Director, Schol Education in a kaihruai a. Pu Vanlalsawma, PEO leh School Games Organising Secretary chuan report pe in Organising Committee Vice Chairman, School Education Joint Director Pu C.Hrangthuama’n lawmthu sawiin hun hnung a khar a ni. -DIPR

Post a Comment

Powered by Blogger.