mizoram mihausa ber robert romawia royte24th December, 2017 (MSR) : Pu Robert Romawia Royte (TT Royte Group) neitu te nupa chuan kum engemaw zat kalta atang khan kumtin an tih thin angin Mizoram hmun hrang hrang leh Mizoram pawnah Christmas thil pek an sem chhuak.
Mi-harsa zawk leh kum upa lam te tan Chite Vengah leh Armed Veng South-ah te Blanket, shawl lum leh lukhum lum an sem hnuah December ni 22 khan Tuithiang veng Branch YMA ten an veng chhung atanga an thlanchhuah mi harsa zual deuhte tan blanket leh MUP te tan shawl leh lukhum lum an sem a, thilpek semna hun hi Tuithiang Branch YMA President Pu Lalthianghlima chuan kaihruaiin Pu Robert-a leh a nupui Pi Lalrampari ten hetianga thilpek mi harsa leh mamawh te tana an neih ui lo a an sem thin chu lawmawm a tih thu a sawi. He huna kal MUP member kum 80 chin tan Christmas present pawisa fai an pe tel bawk a ni.
Saron vengah pawh veng danga an tih ang thoin Br YMA ten an thlan chhuah te hnenah blanket sem lehin MUP te hnenah shawl leh lukhum lum an sem leh bawk a ni.
Heng thil semna programme-a tel, MUP member kum 80 chin te hnenah tangka fai pe in Saron veng hall-a an mamawh tak mai chair pawh Pu Robert Romawia te nupa hian christmas present atan pek an tiam a ni.
Dr. C Lalchhandama, Saron Veng Branch YMA President chuan hetiang thil hi an veng chhunga la thleng ngailo a nih avangin lawmawm a tih thu a sawi a, Pu Robert-a ten an hall-a an mamawh tak mai Chair, Christmas present atana pek an tiam avang pawhin lawmthu a sawi a ni.
Saron Veng CPD home tan lukhum lum leh shawl lum branch YMA hnenah hian Pu Robert Romawia Royte te nupa hian an hlan bawk.
Nimin khan Armed Veng YMA kaihhruaina hnuaiah thlanchhuah bikte hnenah blanket sem leh a ni bawk a, MUP member thilpek semna huna kal zawng zawngte hnenah Pu Robert Romawia Royte te nupa hian shawl lum pein an kawppui kal ve thei lo te tan pawh shawl lum hi an hawn tir vek a ni.
He programme-a kal, kum 80 chin chunglamte hnenah pawisa fai an pe leh bawk a, Armed Veng branch YMA leh MUP te chuan hetiang Christmas thilpek Pu Robert-a ten an sem hi lawmawm an tih thu an sawi.
Nimin vek khan Chhinga Veng leh Dawrpuiah veng danga an tih ang thoin Thlanchhuah bikte leh MUP member te tan Blanket, Shawl lum leh tangkafai engemawzat Krismas thilpek an sem leh bawk a. Chhinga Venga Christmas thilpek semnaah hian MUP ten Advance Krismas hmang nghalin Zaithiam Lalruotmawii chuan a telpui a, kalkhawm ten nuam an ti hle.
Heng an thil sem zawng zawngah hian blanket 200, shawl lum 1500, lukhum lum 300 leh tangka fai engemawzat atel a ni. Pu Robert Romawia Royte hian hun engemaw kalta atang khan kumtin hmun hrang hrangah Christmas present a lo sem tawh thin a, tum khatah cheng nuai 20 man vel a sem ral thin.
Kuminah hian Pu Roberta hian a Firm-a thawk zing-a thlakhata Rs 10,000/- chin hnuailam hlawh Drivers, Handyman leh Site Assistants 130 zet te hnenah Krismas present atan Rs 2000/- theuh a pek bakah hmun hrang hranga NECS hnathawktu Mistiri leh Labor 1,000 chuang tan Krismas Ruai an mahni hnathawhna hmun theuhah a thehsak vek bawk.
Heng bakah hian Nagaland, Meghalaya leh Tripura-ah Krismas thilpek hi sumfaiin hmun hrang hrangah an sem bawk a, tuntumah hian cheng nuai 21 a sem ral niin thudawnna chuan a sawi.
Mizote zingah mahni hausakna pumbilh tum lova midang tana luangchhuak thin Pu Robert Romawia Royte te nupa ang hi rawn pung zel teh se.

Post a comment

Powered by Blogger.