SILCHAR MISSION COMPOUND AH KRISMAS LAWM A hmaa kan lo chhiar tawh angin he Festival hi a ropui takmeuh a. Tlai dar nga vel atang kha chuan vai ho chu compound chhungah an rawn lut tam hle tawh a, dar sarih velah chuan kawnga kal harsa khawpin mipui hi an khat tlat tawh a ni. Mission Choir lam pawh an che ṭha hle, Zaipawl, Vailam, Live Band, Cheraw lam leh Short Play awmze nei tak te bakah buatsaihtu lam aṭangin Item engemawzat neih a ni bawk.

Thil mak deuh chu khati taka mihring tam si buai miah lo te, zurui hmuh tur awm lo te, meizial zu reng reng hmuh tur awm miah lo kha a ni. Police leh Compound lam duty te awm miah lo mahse kan buai a rinawm chuang lo tlat. Chhim tura lokalte hi Silchara mi hnuaihnung leh daikil kar ami an ni lo tih an chezia leh an incheina aṭang pawhin a lang theiin ka hria. Bawng in lem kan siam chhunga nausen Isua lem kan dah te chu chibai an buk a, Biak in compound chhunga Isua lim awmsa pawh chibai an buk nasa hle a ni.

Bible leh Bible Tract tam tak sem chhuah a ni a, Bible dawngtu zinga nupa pakhat te chu an hmel en pawhin kum 70 chunglam an ni tawh tih a hriat a, an smart dun hle bawk. Bible an han la chu an pa chuan a nupui hnenah," Hei hi Bible a nih hi," a ti a. An nu chuan, " Eng nge Bible chu," tiin an zawt let a, heta an pa chhanna hi a makin a hlimawm khawp nia. "He Bible chhungah hian ka hmangaihna thu vawi tamtak ka lo hrilh thin che HMANGAIHNA THU HI A KIM VEK A NI " a ti. An nu lah a lo zak ve deuh bawk nen a hlimawm viau a ni. Kan Bible hi hmangaihna thuchah a ni tih hi alo chhiar tawhte hian an lo hai hauh lo nia..A va ropui em!. Pathianin hna a thawk chhunzawm zel ang tih beisei chungin beidawng lovin i tawngtai ang u.

- Davida, Mission Compound Silchar

Post a comment

Powered by Blogger.