F Laltlansanga FanaiMizoram Board of School Education (MBSE) chuan a hnuaia Board Exam HSLC & HSSLC vil tura an ruat thin Sitting Supervisor-te zinga Chawngte, Kamlanagar leh Nghalimlui-a kum 2016 leh 2017 Board Exam-te vil tura ruat Sitting Supervisor Pu F.Laltansanga chu a hnathawh that leh entawntlak avangin vawiin khan MBSE Conference Hall-ah amah chawimawina Certificate leh lawmman pawisafai cheng 10,000/- an hlan.

MBSE Secretary Pu F.Lianhmingthanga kaihhruai inkhawm neihah kum 2016-a Sitting Supervisor anga a hnathawh that chawimawina chu MBSE Chairman (Rtd) Dr.Lalcungnunga’n Pu F.Laltansanga hnenah a hlan a; kum 2017-a a hnathawh that avanga chawimawina chu MBSE Secretary Pu F.Lianhmingthanga’n a hlan ve thung a ni. MBSE Secretary Pu F.Lianhmingthanga chuan Chawngte, Kamlanagar leh Nghalimlui-a MBSE hnuaia Board Exam neih thinah thil felhlel awm deuha hriat a nih avangin Lunglei DEO-te nen inbe rawnin, Pu F.Laltansanga, Selection Grade Teacher, Govt. Zotlang High School, Lunglei hming an rawn rawt chu MBSE hotuten an bawhzui nghal a, Pu Laltansanga chu bepawpin khing khaw 3-a Board Exam vil tura Sitting Supervisor-ah an ruat tur thu an hrilh chu lawm takin a pawm a ni, a ti a. Harsatna tam tak paltlangin Pu F.Laltansanga chuan a hmunah thutchilhin zirlaite exam laia entawn nasa lutuk thin chu manchhuakin a khap thei hlauh a, zirlai tumah hnawtchhuak lo leh rilru tina lovin exam felfai takin a va neihpui thei ta chu a chungah MBSE leh School Education Department chuan lawmthu an sawi takzet a ni, a ti. MBSE Chairman kalchhuak ta Dr.Lalchungnunga pawhin thusawiin Education Department hi Sodom leh Gomorra anga kan tehkhin dawn chuan Pu F.Laltansanga ang zirtirtu rinawm leh inpe zo tak mi 10 pawh state chhungah awm ni se, a chhanhim theih a rin thu a sawi a ni.

MBSE-IN SITTING SUPERVISOR TITHA CHAWIMAWI


Vawiina chawimawi tak Chawngte, Kamlanagar leh Nghalimlui-a Board Exam Sitting Supervisor Pu F.Laltansanga chuan Board Exam a vilna report chipchiar takin a sawi a, a lem nen zirlai naupangte entawn thin dan leh an lehkha mankhawm lemte a entir bawk a. Department lam hotuten ama sahimna ngaihtuahin police venhimna pek hial an tum mahse sorkarin ring zo taka Supervisor tura a ruat a ni tih inngaihtuahin venhimna mamawh lovin a mawhphurhna a hlenchhuah theih thu a sawi a. Naupang zingah discipline a chhiatzia leh zirlaite chauh ni lovin Exam Centre Superintendent leh Invigilator-te nen tangrualin exam lai zirlaite chu inentawn dan ruahman vek thin a ni tih a hmuchhuak a, seat inhnaih tak takin an lo rem a, school pakhat zirlaite chu pindan khatah an lo thutkhawmtir vek bawk a, chuvangin seat arrangement zawng zawng a siamthat tir a, MBSE hotute lo ruahman lawk angin sikul hrang hranga Invigilator-te sikul hrang hrangah a invenchhawk tir ta bawk a ni tih a sawi bawk. A sawizelnaah Pu F.Laltansanga chuan Exam Centre 3 chu a tlawh kual reng thu sawiin a kalna apiangah zirlaite hnenah thlamuanna thuchah sawi zelin “Tuma kan hnawtchhuak dawn lo che u a, exam laiin tumahin an rikrap bawk lo ang che, amaherawhchu entawn leh in thil dik lo tih thin reng reng in ti thei tawh lovang” tiin ka hrilh zel a ni, a ti.
Pu F.Laltansanga Report tarlan danah : Kum 2016 khan Chawngte HSLC Exam Centre 3 - Govt. Kamlanagar High School, Govt. Chawngte High School leh Baptist Boarding School-ah te chuan Pawl 10 zirlai 427-in exam an chhang a, Govt. Kamlanagar HSS exam centre-ah hian pawl 12 zirlai 248-in exam an chhang a ni. Kamlanagar HS Exam Centre atangin HSLC candidate 29.77% chiah an pass ta a, kum 2015 khan 89.93% an pass a ni. Govt. Kamlanagar HSS Exam Centre-ah HSSLC candidate 248 zingah 114 chiah an pass ta a, 46.15% a ni a, kumin 2017 phei chuan exam chhang 281 zingah 50 chiah an pass a, pass percentage 17.79% a lo ni ta a. Kum 2015-a an result pass percentage chu 94.89% a ni.

 Familia Fanai Laltansanga Thuziak Thazual 12 Tlangzar

Vawiina Pu F.Laltansanga chawimawina inkhawmah hian ama lehkhabu ziah ‘Familia Fanai Laltansanga Thuziak Thazual 12’ tih chu MBSE Secretary (Rtd) Dr.Lalchungnunga’n a tangzarh nghal a ni. -DIPR

Post a Comment

Powered by Blogger.