Zoram mipuiin intluktlânna sorkar an duh - ZPM General Secretary
Ṭangrual pawl, Zoram Peoples' Movement (ZPM) chuan nimin khan an pisaah inkhawm an buatsaih a; thusawitu, ZPM general secretary K Sapdanga chuan, Zoram mipuiin party sorkar ni lo, Mizo zawng zawng intluktlanna sorkar an duh thu a sawi.
K Sapdanga chuan, thingtlang lama chengte'n ZPM an ngaihven chhan chu, thuneihna semzâi, mipui sorkar an duh vang a nih thu a sawi a, "Kut hnathawktute dinhmun hima dah kan duh. Kawlphetha hnianghnâra nei turin hydel/solar project siam thingtlang mite'n an nghakhlel a, party sorkar ni lo, Mizo zawng zawng intluktlanna sorkar an duh a ni," a ti.
Thingtlang mipuite'n politics thar an beisei nia sawiin ZPM General Secretary chuan, "An chân khâna chhuak chu keini hi kan ni tih an pawm a, mipuiin sorkar an hrawn mek leh hrawn tawhah an beidawng em em a ni," a ti a; thingtlang mite'n khawpui aia an tawrh nasatna sawi tur an ngah thu a sawi.
K Sapdanga chuan, thingtlang lamah puitling chin chu eng political party-ah emaw inziak lut deuh vek ni mah se, an inziah luhna party vote ngei báa inhria erawh an tam lo niin a sawi a, "Sorkar sum an dawn mek vanga lem chang ngam an tam. Vote zawn nana sum sem kha ruling party sum ni loin, sorkar sum a ni tih an chiang a, an duh thlanna phuartir an tum lo," a ti.
ZPM General Secretary chuan, kohhran hrang hrangte leh revival team-te beihpui thlak chuan thingtlang lamah rah ṭha a chhuah mek nia sawiin, "Sum fai sem, sum sem tiam leh ruai ṭhehte kohhran mipuite'n an nuihzat tawh. Kristianna leh Hindutva inhal dan pawh piangtharte chuan an hria a ni," a ti a; Mizoram zu hmuna siam chu kohhran mipuite'n an kham tawh thu a sawi bawk.
Post a Comment