Ṭangrual pawl, Zoram Peoples' Movement (ZPM) chuan nimin khan kumin atana an pisa khârna inkhawm an hmang. MPC president Lalhmangaiha chuan, an thawhhona chu a nghet tih sawiin, "Keh darh mai mai tur kan ni lo,” a ti a; ZNP president Lalduhoma chuan, beidawng ataka awm mek Zoram mipui tan ZPM-in Zoram siamṭhat hna an thawh dawn thu a sawi bawk.
ZPM-a tel MPC party president Lalhmangaiha Sailo chuan, "Tun ṭum kan thawhhona hi ni dang ang mai mai a ni lo, kalphung mumal tak nei kan ni a, a nghet a ni. Keh darh mai mai tur kan ni lo,” a ti. ZPM pian chhan sawiin, kum 2018 inthlan turah mipui aṭangin non-Congress, non-MNF tih a rîk rin em avangin a piang tih a sawi.
Lalhmangaiha Sailo chuan, Mizoram sorkar hnuaia thil ṭha lo hrang hrang zingah foreigner issue chu a pawi zual nia sawiin, "Ni khat pawh âwl loa hmalak nghalna chi a nih laiin, kan sorkar hian hma a la lo tawp niin ka hria. Kan hmachhawn tur a ni a, dan loa lo pém lut foreigner-te hi kan dodal tur a ni," a ti.
Ṭangrual pawl, Zoram Peoples' Movement (ZPM)
MPC President chuan, sorkar ṭha lo hnuaiah mipui an rálmuang lo tih sawiin, "Kum 2018 inthlan turah hian tuin nge SEDP, NEDP sem tam zawk thei ang ti lo a, tuin nge ram himna min pe thei ang, mipui himna pe thei ang, tih ngaihtuah ang u," a ti a; ram leh mipui himna pe thei tur ZPM vote turin mipui a sáwm a ni.
ZNP president Lalduhoma chuan, Mizoramah beidawnna a langsar ta hle tih sawiin, 'Tute pawh sorkar se, eng an ni bik chuang lo ang,' tih sawi ṭhin chu beidawng au aw a nih thu a sawi a, "Mipuiin beidawnna an neihnaah hian kan la tel ve lo a, mipui la tibeidawng ve lote'n siamṭhat hna kan thawk dawn a ni," a ti.
Lalduhoma chuan, “Kan ram hi neutral san hun a ni tawh lo a, ṭha tih leh ṭha lo tih pawh sawi ngam lo khawtlang paràwn ni ve si hian khawtlang an siam ṭha lo," a ti a; neutral rual, Mizoram mipuiin ram hruaitu atana an ît em emte an pên chhuak a, sakhaw rawngbawltute'n hma an hruai chu lawmawm a tih thu a sawi.
ZNP President chuan, ZPM-in hma an lakna turah khawtlang nun siamṭhatna tura hma an lak tel a ṭul thu a sawi a, "Harhna kan nei a, kan crime rate a tlahniam chuang si lo. Biak-in chhung nunah kan lungawi a, páwn lam nun chhiatzia kan ngaihthah ṭhin," a ti.
Hunserh hmangtu Revd. Chuauṭhuama chuan, Mizoramin chhantu a ngai hle tih sawiin, "ZPM hi chhantu a ni thei dawn em tih mipuiin an enthla mek. Kan ram hruaitute hian hna an thawk tam tâwk lo emaw tih turin eng eng emaw tlangzarhnaah an tawm leh reng ṭhin. Kan ram hi chhan tlak a la awm a, chumi tur chuan ZPM hi kan beisei che u a ni,” a ti.
Ṭangrual pawl, Zoram Peoples' Movement (ZPM) inkhawm hi Steering Committee chairman Lalliansawta'n a kaihruai a; ZPM general secretary K Sapdanga'n report a pek bakah, ZPM Val Upa Council aṭangin Bualhranga'n thu a sawi bawk.
Post a Comment