Royal Stag Aizawl Rock Fest chu December 8 zan khan Bawngkawn Filed-ah neih a ni a, khuain a zir loh bakah inbuatsaihna a ṭhat tawk loh avangin a flop!
Programme hi tlai dar 5:30 aṭanga ṭan tura tih ni mah se dar 7 velah ṭan chauh a ni. Ruah a sur avangin a entu tur mipui lam an pungkhawm chak lo a, hei vang hian a hun takah ṭan a ni lo. Ṭan hnuah pawh mipui an tam lo a, khuain a zir loh vang a ni ber ang chu. A tir lamah hian Mizo band 3 - BEE 31, Scavenger Project leh Tribal Power-te an inlan a, thawm a ṭha chho viau.
Dar 9 pelh hnuah mipui hmuh chak ber leh punkhawm chhan ber Guns 2 Roses an rawn lang. Guns n Roses Official Tribute band hian boruak an rawn nei nghal hat a, entu mipui lam pawh an phur nghal hle. Sakpui dual dual theih tur 'Knocking on Heavens Door' an rawn dinchhuahpui nghal chat a, entu lam pawh an awm mai thei tawh lo. Mahse hetianga concert boruak a hot chho ṭan mek lai hian vanduaina a thleng ta hlauh mai a, sound box dahna tower chu mipui lam hawiin a tlu ta a ni. Sound tower tlu hian a bul hnaia awm mi 3 a delh a, hliam tenau an tuar.
He thil thleng vang hian Band Vocalist Gavin chuan music titawp nghalin, band member te hian stage an chhuahsan zui nghal. Back stage lamah boruak a ṭang nghal at a, band member-te'n vanduaina thleng chu pawi an tih thu leh, thi leh hliam an awm leh awm loh finfiah turin an au chul a ni. Band member zingah pawi tihluat avanga mittui tla hial an awm khan professional an nihna a tichiang hle bawk. G2R hian vanduaina tawkte hi a hnuah an kan a, an entawn tlak hle a ni.
Vanduaina thlen hnu hian organiser leh sound duty lam an inrawn khawm a, programme hi an titawp zui ta a ni. Organiser lam chuan vanduaina thleng hi pawi an tih thu leh, mipuite chungah ngaihdam an dil tih an sawi. Rock fest main organizer Zo Events pawhin he tianga hriatlawk loh vanduaina thleng hi pawi a ti tak zet a, hliam tuarte inenkawlna senso pawh an tum sak a ni. Hei bakah hian ticket leite chu lo kawl ṭha vek turin an ngen a, ruahmanna dang siam leh an tum.
Royal Stag Aizawl Rock Fest a flop!
Inbuatsaihna a ṭha tawk em?
December thla a nih tawh avangin ruah a sur a rinawm tawh loh. Mahse chhun aṭangin ruah a sur a, zan thlengin a sur. Stage chung zar a ni lo a, khua a vawh deuh tawh avangin a perform tan pawh ruahsur hnuaia phur taka che tur chuan inpekna thuk zawk a ngai ngei ang. A pawi ber ta chu vanduaia nunna hial chan theihna tur sound box rit tak tak dah khawmna rinawm tawk lo kha a ni. Vanduai vang liau liaua tlu nge, a rinawm tawk loh vanga tlu tih chu mipui zawhna a ni. Vanduaina tawkte tan a na a, a buatsaihtu tan lah thil pawi tak a ni bawk. International tribute band meuh perform-na tur chu theih chin chinah fel fai leh rinawm taka tih a ṭha a, tun hnuah chuan mipuite himna tur leh, khawvel huapa zaithiam larten Mizoram rawn kal zel an duhna turin a buatsaihtu lamten ṭan lak a ngai a ni.
Post a Comment